Read Mongondow NEHEMIA 13 Bible Online

NEHEMIA 13 - Mongondow bible

NEHEMIA 13

¹Kon dodai in hukum i Musa binaca kon rayat, nouḻídon in katarangan tanaa: ‘Intau in Amon bo Moab in diábí motaau in dumugang kon umat i Allah;

²sin kon tungkuḷ in bangusa in Israel kon daḷan iḻumuai nongkon Mesir, bangusa doyowa tatua in diábí nobogoi in kaanon bo tubig kon bangusa tatua. Nodapotbí in mosia nonondan kon i Bileam sin mongutuk kon bangusa in i Israel, táe binaḷuaian i Allah in kutuk tatua nobaḻí barakat.’

³Naonda in kinodongogan in bangusa Israel intua, sinondídon monia in bayongan in intau ango-angoi nongkon intau mita in Israel.

⁴Kon tungkuḷ intua ki Imang Elyasib, inta pinoki ḷukadan in gopot mita inta pinotagúan kon tongkaaḷ mita kon Baḷoi TUHAN, noyobayat nopia i Tobia.

⁵Ki Elyasib in nobogoi in gopot moḷoben tobatú kon i Tobia inta sabanarnea in sinondíbí sin potagúan kon sosumba gandum, kamania, pakakat mita inta pakéon kon Baḷoi TUHAN, sosumba inta ogoi kon imang mita, persepuluhan gandum, anggur bo ḷana zaitun, inta silaion kon intau mita in Lewi, kon mogogogitog in musik bo moḷoḷukad kon ngara in Baḷoi TUHAN.

⁶Kon dodai intua nobaḻí, diá in akuoi kon Yerusalem, sin kon taong intoḷu nopuḷú bodoyowánea kon pinomarentaan i Artahsasta,[22] datu in Babel, minayá in Babel in akuoi sin molapur kon i datu. Bain degá tongonumai nosinggai bo inogoinea in akuoi

⁷nobui kon Yerusalem. Noiyaputmai kon naa, noitaḻikokog in akuoi in nokotaaumai kon ki Elyasib in nobogoibí kon i Tobia in gopot tobatú kon Baḷoi TUHAN.

⁸Sinumorú totok in akuoi bo pinogarabku kon ḷuai in bayongan pakakat i Tobia.

⁹Onda intua pinoki aidanku in upacara pondaritan kon gopot mita tatua. Nopaḷut mako kon tua sinagúkudon bui kon tua in bayongan sosumba gandum bo kamania bo pakakat mita in Baḷoi TUHAN.

¹⁰Koḻikud intua, kinobayáankumai in intau mita inta mopogogitogmai in musik bo intau mita in Lewi in nonaḷámaidon kon Yerusalem bo nobui kon gobánea-gobánea, sin rayat in diádon nobogoi kon onu in pakéon monia.

¹¹Dá sinoboḷowku in pongawasa mita sin pinomayádon mako monia natua in Baḷoi TUHAN. Bo inoiníku bui in intau mita in Lewi bo intau mita inta mogogogitog in musik bo pinotabá bui mopobayá in oaidan monia.

¹²Bo bayongan in rayat Israel buidon nobogoi in persepuluhan nongkon gandum, anggur, bo ḷana zaitun, dinia pinobayá in gopot mita pototagúan kon tongkaaḷ.

¹³Akuoi in nopotabá kon intau mita tanaa sin moindoi kon gopot mita pototagúan kon tongkaaḷ tatua: ki Imang Selemya, ki Zadok intau inta totok in nonotaau kon Hukum bo ki Pedaya intau in Lewi. Ki Hanan ki adí i Zakur ki ompu i Matanya pinoki bantunganku kon i monia. Kinotaauanku kon intau mita tatua in motaaubí pirisayaan bo mosilai kon pakakat mita tatua kon yobayat topogaidan monia kotompiaan.

¹⁴Oo Allahku, toropdon in bayongan inta ain pinomiaku kon Baḷoi-Mu bo pogundoiannea.

¹⁵Kon tungkuḷ intua inontongku in kon singgai in Sabat tongonumai in intau Yohuda nomugut kon anggur. Oyúon in intau ibanea in nodatog kon gandum, anggur, bungai in anggur, bungai in ara bo pakakat mita ibanea kon tudu in keledainea bo dinia pinobayá in Yerusalem. Diá inogoiku in mosia nopotaḷui kon Yerusalem.

¹⁶Tongonumai in intau nongkon Tirus inta nogutun kon Yerusalem nodia kon toyá bo noyagi-yagimai in pakakat potaḷui kon Yerusalem kon singgai in Sabat, sin potaḷui kon intau in Yahudi.

¹⁷Sinoboḷowku in itoi mita in Yohuda bo siningogku, “Diá kinotaauan degá monimu kon nogaidon in moiko kon inta moraat sin nogaidon kon singgai in Sabat?

¹⁸Popisí in dosabí naa dá ihukumdon i Allah in mogoguyang naton bo norimumud kon kotá tanaa. Degá moibog in tanaa moiko in modugang kon torú i Allah kon Israel pinongin moporaatmai kon singgai in Sabat?”

¹⁹Tuamai in parentaanku sinbá kon pomangkoian singgai in Sabat, inta Jumaat doḷom, bonawang mita in kotá ḻingkopan naonda in moḷoḷabungdon,[23] bo diábí motaau bukatan aka diápa moitaḻib in singgai in Sabat, kon singgai in Saputu doḷom. Sinampatku in tongonumai in intauku kon bonawang mita tatua sin moḷukad sinbá kon singgai in Sabat diá in pakakat mita inta potaḷui inta diaan tumuot kon bonu in kotá.

²⁰Táe siga-sigad oyúon in tongonumai in intau mopopotaḷui bo inta mopopotaḷui in barang mita in mosiug kon ḷuai in kotá kon singgai in Jumaat doḷom.

²¹Bo akuoi in noguman kon i monia, “Diábí in mangaḻenea in pogoḷatan monimu dapot in doḷo-doḷom kon nion. Pokoingat, aka aidanpa bui monimu intua, yo mobogatbí in aidanku!” Pinangkoi kon tua diádon kon dodai in onda in mosia in mamangoi kon singgai in Sabat.

²²Bo intau mita in Lewi pinoki aidanku in upacara pondaritan kon awak bo noḷukad kon bonawang mita sin moḷukad sinbá intau mita mohoromat kon singgai in Sabat. Nosambayang in akuoi, “Oo Allah, toropa in akuoi sin soaḷ tatua doman, bo kotabipa in akuoi podudui in tabi-Mu inta moḷoben.”

²³Kon tungkuḷ intua inontongku doman kon nobayong intau in Yahudi in notonibuḷoidon in bobay mita nongkon bangusa in Asdod, Amon bo Moab.

²⁴Tongosilai kon adí monia in diábí nonotaau in singog in Yahudi, táe singogbí in intau Asdod andeka singogbí ibanea mako nion.

²⁵Sinoboḷowku bo inodi-odianku in mosia. Oyúon in binongkugku bo oyúon in irabutku in buok monia. Onda intua pinoki pongibotanku in mosia pinodoyon kon tangoi i Allah kon mosia takin ki adí mita monia in diá bidon motonibuḷoi takin bobay ibanea.

²⁶Gumanku, “Diábí degá kinotaauan monimu kon dosabí doman tanaa inta inaidan i Datu Salomo? Diábí in datu in kon dunia naa inta moiḻiu kon inia. Ki Allah in notabi kon inia bo binaḻí in sia datu kon sinangkup in Israel. Umpaka natua táe sia in dinondouḷugandon in bobay mita in bangusa ibanea sin mogaid kon dosa.

²⁷Totuu moraat in oaidmu! Moiko in mokobaḻíbí moḷawang kon i Allah pinongin mononibuḷoi kon bobay mita nongkon bangusa ibanea!”

²⁸Ki Yoyada in ki adí i Imang Moḷoben ki Elyasib, táe tobatú kon sigad i adí i Yoyada in nobaḻí mototaka i Sanbalat nongkon kotá in Bet-Horon. Tuamai ki Yoyada pinoguntunku nongkon Yerusalem.

²⁹Nosambayang in akuoi, “Oo Allahku, toropdon naonda in intau mita tatua noporaatmai kon aid monia saḷaku imang bo dodandian-Mu takin imang mita bo intau mita in Lewi!”

³⁰Natuata in pinonondaritku kon bangusa in Israel nongkon bayongan inta diá motaau aidan. Pinomiakudon in atorang mita kon imang mita bo kon intau mita in Lewi, dá mosia kon batúannea in kooaidandon tontaní.

³¹Sinompiaku domandon sinbá kon singgai mita inta ain sinantú, kayu pondungú kon pobogoian kon sosumba in motaau sadiaan bo rayat motaau modia kon sosumba bungai in boyó inta dungkuḷ. Imbuitnea nosambayang in akuoi, “Allahku, toropdon in bayongan tanaa bo barakataidon in akuoi.”