Read Mongondow NEHEMIA 2 Bible Online

NEHEMIA 2 - Mongondow bible

NEHEMIA 2

¹Kon singgai tobatú, opat nobuḷan noiduduimai, inta kon buḷan Nisan, kon dodai in ki Datu Artahsasta koyogot in mongaan, akuoi in nobogoi in anggur kon inia takin molamurú mako. Diápabí kon dodai in onda natua in akuoi kon tayowonnea ná singgai tua.

²Tuamai sia in noḻibó, “Nongonu sin koontongan in nábí moajar in ginamu bokaka diábí notakit? Tantú oyúonbí in mokoajar kon ginamu.” Noitaḻikokog in akuoi,

³bo notubag, “Mobiagdon in ki Tuang modapot in mononoi! Naondabí in bobantung diá moajar in gina, aka kotá pinoḷobongan kon mogoguyang in bobantung tanaa in dongkadon goguraatnea mita bo ḷoḻingkop mita in bonawangnea ain doman nogoguyaat pinokak in tuḷú.”

⁴Ki datu in noḻibó, “Dá, onu in koibogmu?” Akuoi in nosambayang kon i Allah inta nongawasa kon soroga,

⁵bodongka noguman kon i datu, “Aka mokosanang kon gina i Tuang bo moibog mobogoi kon onu inta poigumon in bobantung naa, potabádon in bobantung naa mayá in butá in Yohuda sin moposindog bui in kotá pinoḷobongan kon mogoguyang in bobantung naa.”

⁶Bo datu inta iḻimitú mako kon diug i buḷoinea, nobogoi kon onu inta pinoigumku tua. Iḻibónea mongo moonggot in akuoi in mogutun kon tua bo toonu in mobui mangoi, dá pinotaauku kon inia in singgai inta ain sinantúku.

⁷Onda intua akuoi noigum kon surat inta ogoi kon gubernur mita kon propinsi Eprat Toyopan,[3] sinbá poḷuason mako monia in bobayáanku modapot in Yohuda.

⁸Koḻikud intua, noigum doman in akuoi kon surat ogoi kon i Asap, intau inta moḷoḷukad kon kayuon in dodatuan, sinbá sadiaannea in kayu inta pakéon pogaid kon ḷoḻingkop in bonawang dinding kon diug in Baḷoi TUHAN, bo pakéon kon dinding in kotá bo baḷoi inta pogutunanku. Onu in pinoigumku nodait dinuduian i datu, sin ki Allah in notuḷung kon inakó.

⁹Noyotakin in tongonumai in porwira bo tontara inta sinumakoi kon kabaḷo, inta pinotabá i datu sin moyotakinku, nobuatdon in akuoi minayá in Eprat Toyopan. Kon tua surat i datu inogoiku kon gubernur mita.

¹⁰Táe naonda in ki Sanbalat, intau in Bet-Horon, bo ki Tobia, pojabat tobatú nongkon Amon, in nokodongog kon akuoi in namangoi kon kopontingan in bangusa in Israel, nobú totok in mosia.

¹¹Noiyaput in Yerusalem in akuoi, bo nogogaipa toḷu nosinggai.

¹²Kon dodai intua diábí pinotaauku kon i ineka kon ki Allah in nobogoi in raian natua kon inakó sin moposindog bui in kotá in Yerusalem. Nopoikoḷomai doḷom nobangon in akuoi bo nonongganut kon tongonumai in yobayat minayá in ḷuai in kotá. Koḻikud in keledai inta sinakoianku, diábí in kami nodia kon biag totakoian ibanea.

¹³Nodoḷompa in dodai intua, kon tungkuḷ in kami nonaḷámai kon kotá nongin Bonawang Ḷopá kon dotá in toyopan. Kami in nopobayá ná toḷatan, minayá ná Bonawang Yoyatan, nongin Bokaká in Naga. Kon binayáan tatua akuoi in nonaridi kon dinding mita in kotá inta nogoguyaat bo inontongku doman in bonawang inta ain nodait kinaan in tuḷú.

¹⁴Onda intua nongkon dotá in pomukaan kotá, kami in nopobayá ná utuan, kon Bonawang in Tubig Moitampurang bo Tabang in Datu. Táe kon tua diá in daḷan motaau bayáan in keledai inta sinakoianku tua, sin nobayong totok in rumbunnea.

¹⁵Dá kami in nosiḻig kon Ḷopá in Kidron bo nongingguput kon bobayáan doḷom tua, sindaḷan monaridi kon dinding in kotá. Onda intua kami nomurow bo nobui kon kotá nongin Bonawang Ḷopá.

¹⁶Diá tobatúmai in nongkon intau mita inta sinon itoi in rayat in nonotaau kon inakó minayá, bo onu in sinomayáku. Sin noidapot in tungkuḷ intua diápabí in akuoi noguman kon onu bo onu kon intau mita tobangusaku, pinomayá kon imang mita andeka kon itoi mita, andeka kon pogawai mita, bo kon i inekabí inta dumudui moposindog bui in kotá in Yerusalem.

¹⁷Táe onda intua noguman in akuoi kon i monia, “Indoiai in kaadaan naton inta moyoyiga tanaa! Yerusalem in dongkadon utag mita bo bonawangnea mita in kinaandon komintan in tuḷú. Koḻigai bá posindogondon bui naton in dinding mita in kotá in Yerusalem sinbá diádon in kita poonagonmai.”

¹⁸Bo inoumanku kon i monia naonda in ki Allah notuḷung kon inakó bo onu inta pinoguman i datu kon inakó. Mosia in notubag, “Koḻigai momangkoidon in kita moposindog!” Bo nosadiadon in mosia momangkoi mogaid.

¹⁹Naonda in tomayá nami tatua kinotaauan i Sanbalat, i Tobia bo i Gesyem, intau in Arab, kinosingan bo siningkuḻe monia in kami. Guman monia, “Onu in aidan monimu? Degá momarontak in moiko kon i datu?”

²⁰Akuoi in notubag, “Ki Allah inta nongawasa kon soroga in motuḷung kon inami moginḷapat kon oaidan tanaa. Kami naa in mogogundoi-Nea mita bo kami in momangkoidon moposindog. Táe moiko in diábí in hak andeka kapunyaan onuka in kon Yerusalem. Nodapot in aka intau mokoouman kon Yerusalem, tangoimu in diábí kotango-tangoian.”