Read Mongondow NEHEMIA 6 Bible Online

NEHEMIA 6 - Mongondow bible

NEHEMIA 6

¹Ki Sanbalat, ki Tobia, ki Gesyem bo musung mita nami ibanea inta nokodongog kon kami in nokoḷapatdon nonompia kon dinding, bo bubúnea in nodaitdon pinaḷonan, umpaka kon dodai intua diápa binambé nami in ḷoḻingkop mita kon ngara mita in kotá.

²Dá ki Sanbalat bo ki Gesyem nokidia mangoi in undangan kon inakó sinbá mamangoi moyodungkuḷ monia kon ḻipú tobatú kon Ḷopá in Ono. Táe kinotaauanku kon mosia tua in moniat mopobodito kon inakó.

³Tuamai in pinoki diaanku in tontubag nanaa kon i monia, “Akuoi in diábí mokopoangoi sin oyúon in oaidanku moponting. Oaidan tatua in moigogaidon aka taḷaanku sin mayá mokipodungkuḷ kon i monimu.”

⁴Noidapot in koopat mosia nokidia in sonsoma inta ná tatua kon inakó, bo tantúku doman ogoian in totubag inta notongkai.

⁵Kon iḻimaneadon intau i Sanbalat namangoi bo nobogoi in surat inta diá binakut[12]

⁶inta nanaa in pinais: “Ki Gesyem in nongakubí kon oyúonbí in unsingog mita in bangusa mita kon diugmai naa, inta noguman kon ki utat bo bayongan in intau in Yahudi in monomayá kon momarontak, dá tuamai in ki utat monompia kon dinding in kotá. Sia in noguman doman kon ki utat in dumuídon datu in Yohuda,

⁷bo notundúdon kon tongonumai in nabi sin moduí kon inimu kon Yerusalem. Unsingog mita tatua in notantú kon moiyaput kon i datu. Tuamai, angoidon sinbá yosingogon in tua.”

⁸Táe akuoi in nokidia in tontubag nanaa, “Bayongan inta pinogumanmu tua in diábí totuu bo tongábí ouman inta ai-aidan i Utat.”

⁹Mosia in moḷongasi mopogogondok kon inami sinbá gogaiandon nami in oaidan tatua. Akuoi in nosambayang, “Oo Allah, iropotai in akuoi!”

¹⁰Kon dodai intua, akuoi in minayá kon baḷoi i Semaya ki adí i Delaya ki ompu i Mehetabeel, sin oyúon in ḷabotnea in mamangoi kon inakó. Gumannea kon inakó, “Igai in kitada mayá mogadop kon Baḷoi TUHAN. Kunsían naton in bayongan ngaranea, sin oyúon in intau in moibog moḻimod kon inimu. Degá doḷom naa in ḻimodon iko.”

¹¹Táe akuoi in notubag, “Akuoi naa in deemanbí intau inta moibog moḷagui. Saḷaku intau biasa diábí motaau in akuoi tumuot kon Baḷoi TUHAN, sin matoi in akuoi. Diá, doíbí in akuoi!”

¹²Naonda in piniki-pikirkumai intua, kinotaauankudon kon tongganut i Semaya tatua in deemanbí nongkon i Allah, táe nongkon i Tobiabí bo nongkon i Sanbalat. Mosia in nobogoidon in doit kon i Semaya sin mopotaau in toḻindap tatua kon inakó.

¹³Makusud monia tua in bá moondok in akuoi bo dumudui kon singog monia dá mogaidon kon dosa. Dá mokouḻídon in mosia kon dodoyonan moporaatmai kon tangoiku modapot in akuoi in tantúdon oumanon magí-mako in intau.

¹⁴Akuoi in nosambayang, “Oo Allah, toropdon onu in inaidan i Tobia bo i Sanbalat tatua. Hukumdon in mosia! Natua doman in nabi bobay inta ki Noaja bo nabi mita ibanea inta moibog mopogogondok kon inakó.”

¹⁵Pinonompiaan kon dinding tatua in ḻima nopuḷú bodoyowá nosinggai, bo noḷapat kon singgai in doyowa nopuḷú bo ḻima kon buḷan Elul.

¹⁶Naonda in musung mita nami kon sigad in bangusa mita kon diugmai tua nokodongog kon tua, nooyá in mosia sin kinotaauandon monia kon oaidan tatua in inaidanbí pinodoyon kon totuḷung i Allah.

¹⁷Kon tungkuḷ intua itoi mita in Yahudi mokokidiaanpa in surat takin i Tobia.

¹⁸Nobayong in intau Yahudi in noyobayat i Tobia, sin sia in mototaka i Sekhanya ki adí i Arah. Apa doman ki Yohanan, ki adí i Tobia, notonibuḷoi takin i adí bobay i Mesulam inta ki adí i Berekhya.

¹⁹Umpaka in ki Tobia tantú mokidia in surat kon inakó sin mopogogondok kon inakó, táe itoi mita in Yahudi tatua in umuranbí mongonguman kon bayongan in kopopia i Tobia. Bo bayongan inta siningogku, in potaau monia kon inia.