Read Mongondow NEHEMIA 9 Bible Online

NEHEMIA 9 - Mongondow bible

NEHEMIA 9

¹Kon singgai in doyowa nopuḷú bo opat kon buḷan doman tatua, rayat in Israel noyosipun. Mosia in nopuasa sin moponiata kon mosia in nomanasaḷdon in nogaid kon dosa mita. Mosia in sinumondí kon intau mita ango-angoi. Nobaḻí tomponuot kon noajar in gina, nogibintoḷ in mosia bo nopoinggú in ḷobud kon uḷu. Onda intua sinimindog in mosia bo nongaku kon bayongan in dosa monia bo dosa in mogoguyang monia.

³Degá toḷu nojam in koonggotnea, buk i TUHAN, Allah monia, binaca kon i monia bo toḷu doman nojam noiduduimai mosia in nongaku kon dosa mita monia. Nopaḷut mako kon tua sinumungkud in mosia bo nosumba kon i TUHAN, Allah monia.

⁴Kon tua oyúon in mimbar sinadia kon intau mita in Lewi bo sinimindog kon tua in ki Yesua, ki Bani, ki Kadmiel, ki Sebanya, ki Buni, ki Serebya, ki Bani bo ki Kenani. Takin singog noropot mosia in nosambayang kon i TUHAN Allah monia.

⁵Ibada kon singgai tua in pinangkoi in intau mita in Lewi inta noiduduimai naa: ki Yesua, ki Kadmiel, ki Bani, ki Hasabneya, ki Serebya, ki Hodia, ki Sebanya bo ki Petahya. Mosia in noguman, “Sindog bo dayowdon in ki TUHAN Allah naton! Podayowdon kon i-Nia modapot in mononoi! Dinayo-dayowdon in tangoi-Nea inta nopuḻing in kamuliaan, tangoi inta motoyang, noiḻiu kon bayongan dodayow!”

⁶Onda intua rayat in Israel nosambayang nanaa, “Ikobí in TUHAN, Ikobí inta Totobatú tua; Inaidan-Mu in tundi bo toḷungayá, dagat bo butá takin bayongan in tombonunea, bo inogoian-Mu in kobiagan bo iḷukadan-Mu. Kon ini-Mu bayongan in kawasa kon ḷangit tumungkud mosumba; mosia in tumonsiup kon ini-Mu bo tumungkud.

⁷Ikobí in ki Allah, TUHAN inta Totobatú tua. Piniḻí-Mu in ki Abram kon yua-yuak in bangusanea. Ur kon Babel in sinaḷáanneadon, sin Iko tontaní inta nodia kon inia. Bo inogoian-Mu in tangoi inta mobagu in sia: ki Abraham, tua in pinonangoi kon inia pinangkoi kon tua.

⁸Nouḻí-Mu in sia umuran mosatia kon ini-Mu bo motoindudui. Bo inaidan-Mu takinnea in dodandian inta moroton. Butá in Kanaan, Het bo Amori, butá in Peris, Yebus bo Girgasi, tua komintan in ogoi-Mu kon inia; mobaḻí pogogutunan in bayongan buínea. Noiduduimai inintompodan-Mu in dandi tatua kon inia, sin Iko in moadil bo mosatia.

⁹Inindoian-Mu in roriga in mogoguyang nami kon tungkuḷ intua; Inindongogan-Mu in ombaḷnea kon Mesir bo kon Dagat in Teberau.

¹⁰Pinopoaid-Mu kon datu in Mesir in aid mita inta diá in poḻiuan, bo kon pogawai takin rayat kon butánea, sin kinotaauan-Mu naonda in pinororiga monia kon umat-Mu. Bo ponango-nangoiandon in tangoi-Mu noidapot in singgai naa.

¹¹Sinbá oyúon in bayáan in umat-Mu, dagat binotak-Mu; Pinopoḷoḷan-Mu in mosia nongin gantog in dagat inta modaḷom, naonda bo batu inta noitaḷom kon dagat inta mokoondok.

¹²Pinongin goḷom dinia-Mu in mosia kon dodai in singgai. Bo kon dodai in doḷom daḷannea in sinimbayagan-Mu in oigi in tuḷú.

¹³Nongkon ḷangit noponag in Iko kon tudu in Buḷud in Sinai, bo nongonguman in Iko takin umat-Mu tontaní. Inogoian-Mu in hukum, atorang bo parenta inta moadil, mobanar bo oyúon in mangaḻenea.

¹⁴Singgai in Sabat inta mokudus mustibí rameon monia, bo pinongin i Musa hukum-Mu inogoi-Mu.

¹⁵Kon tungkuḷ in mosia ginogoi bo kinodaitan in kaanon, roti nongkon ḷangit pinoangoi-Mu. Bo nongkon buḷud batu pinoangoi-Mudon in tubig moḷoben inta mokoguḻí kon yogang. Pinoki ḻitúan-Mu in mosia in butá inta pinodandi-Mu kon inia takin ibot.

¹⁶Táe mogoguyang nami in mododia bo motogat in gina; parenta-Mu mita diábí dinuduian monia.

¹⁷Mosia in diá motoindudui, bayongan in kopopia-Mu iḻiongdon, bo bayongan in oaid-Mu inta mokoherang diádon kinotoropan monia. Takin kaḷakuang nomiḻí in mosia kon itoi, sin modia kon i monia mayá in Mesir, bui mobaḻí ata. Táe Iko in ki Allahbí inta moibog mongampung, mosabar, mopia in gina bo nopuḻing in tabi. Tabi-Mu in diábí in poḻiuan; Diábí sinaḷáan-Mu in mosia.

¹⁸Mosia in nomia kon berhala ná batangan in sapi. Bo mosia in noguman, ‘Naa in ki Allahmu, inta nodia kon i monimu nongkon Mesir, nongkon pinononggataan.’ Oo Allah, Iko tontaní in siningkuḻe monia!

¹⁹Táe kon padang gurun tatua diábí sinaḷáan-Mu in mosia, sin Iko in nopuḻing in totabi. Oigi goḷom bo tuḷú in diábí irabut-Mu bui, mototundú kon daḷan kon i monia singgai bo doḷom.

²⁰Pinongin kawasa-Mu inta mopia sinundú-Mu in mosia. Mosia in nokaan kon Manna bo nonginum kon tubig inta tugat kon i monia.

²¹Opat nopuḷú notaong in koonggotnea in kon padang gurun, Inogoian-Mu in bayongan inta pakéon monia. Pakeang monia diábí kon dodai in onda in nogoguyaat, sioḷ monia in diábí doman monakit andeka nobobagá,

²²Pinopountung-Mu in mosia kon nobayong in dodatuan bo bangusa kon pinosigadan in butá monia. Hesybon butá i Datu Sihon, iḻitúan monia; Basan butá i Datu Og, inutunan monia.

²³Binaḻí-Mu in buí monia naonda bo kobayong in tundi mita kon ḷangit. Inogoian-Mu in mosia in butá sin pogutunan monia, butá inta ain pinodandi-Mu kon mogoguyangnea.

²⁴Buí monia in nonaḷow kon butá in Kanaan; intau mita kon tua pinotungkud-Mu. Umat-Mu inogoian-Mu in kawasa momia kon onu in koibognea aidan kon bangusa mita in Kanaan bo kon datunea mita.

²⁵Umat-Mu nogagow kon benteng mita poḷoḷukadan, butá inta mopia bo baḷoi inta nopuḻing in kaoyúonan. Parigí mita bo bokaká mita in tubig ginamá monia, gobá in anggur, pangkoi in zaitun bo ayop mita ibanea. Iḷumongow in mosia sin mongaan kinooibogbí in gina. Bayongan in mopia inta inogoi-Mu pinaké monia.

²⁶Táe umat-Mu in nomarontak bo diá motoindudui kon ini-Mu, nonaḷámai kon hukum bo atorang-Mu, noḻimod kon nabi mita inta nopotoingat kon i monia, bo inta nopotabá kon i monia mamangoi bui kon ini-Mu, ki Allahnea. Oo TUHAN, pomuḷoi doman mako Iko in singkuḻeon monia,

²⁷dá pinosarakan-Mudon in mosia kon musungnea inta takin raat in nongawasa bo nondorot kon i monia. Táe kon bonu in roriga inta noiantug, mosia in nokuani kon ini-Mu nopoigum in totuḷung. Nongkon soroga inindogogan-Mu; takin tabi moḷoben sinubagan-Mu. Pinotabá-Mu mangoi in itoi bo intau mita mobarani inta nopoḷuat kon i monia nongkon musung.

²⁸Táe naonda in butá monia noamandon, baḷúdon in mosia nogaid bui kon dosa. Dá pinosarakan-Mudon bui in mosia kon musung inta nondorot kon i monia. Tongá kon dodai in mosia nosadardon bo nomanasaḷdon totok, nomaḷú in mosia kon ini-Mu nopoigum sinbá posaḷamaton. Dá nongkon soroga Inindongogan-Mu, bo binui-buimai sinuḷungan-Mu, sin noḻiai in gina-Mu kon i monia bo notabi totok.

²⁹Sinoboḷow-Mu in mosia sinbá totundú-Mu in duduian, táe diá sinarima monia in hukum-Mu takin dinumodia. Bokaka, aka hukum-Mu aidan, yo notantúbí kon koḷukadan in kobiagan. Mosia motogat in uḷu bo motogat doman in gina, doí mokidongog, bo doí dumudui.

³⁰Pomuḷoi in taong mosabar in Iko mobogoi in tompoingat kon i monia; pinongin in nabi, Roho-Mu in moguman kon i monia. Táe umat-Mu tatua in momompon kon bongoḷan, bo pinosarakan-Mu kon bangusa mita inta kon dunia naa.

³¹Táe popisí in tabi-Mu moḷoben diá in poḻiuan, diábí sinaḷáan andeka irimumud-Mu in mosia. Totuu, Ikobí in Allah inta diá in poḻiuan; moḷoben in tabi-Mu, nopuḻing in tabi!

³²Oo Allah, Allah nami inta moropot! Ki Allah inta moḷoben bo motoyang! Takin satia kinadaian-Mu in bayongan dodandian; dandi-Mu mita inintompodan-Mu bo inaidan-Mu. Pinangkoipa kon datu mita in Asyur nondorot kon inami noidapot in tanaa, nobayong in roriga in kinobayáan nami. Datu mita nami, imang, nabi bo guhanga mita in ḻipú, mogoguyang nami bo rayat, nokorasadon kon roriga mita. Dika koḻiongan in bayongan roriga tatua! Dika inggamáan-Mu kon gina-Mu!

³³Oaid-Mu in moadil, ihukum-Mu in kami inta binaradosa; Iko in umuranbí mosatia umpakabí in kami nopuḻing in aid mokotor.

³⁴Mogoguyang nami, datu, imang bo guhanga mita in ḻipú, iḻimimpat kon hukum-Mu bo diá nopandungmai. Bayongan in parenta bo toboḷow inta inogoi-Mu, diábí inindoianneamai, diá doman inindongogan.

³⁵Inogoi-Mu in datu mita inta momarenta kon umat-Mu, naonda in mosia nogutun kon butá inta mobanat bo mopia inta inogoi-Mu. Tongá diábí in mosia nonaḷámai kon kobobiag inta moraat, doí mogundoi kon ini-Mu poḷat moibada.

³⁶Dá tanaa kami naa in nobaḻí ata kon butá inta inogoi-Mu nobaḻí budel. Butá tanaa in mopia, nopuḻing in bungai in boyó, inta sabanarnea in kamibí in motarima.

³⁷Bayongan in bungai in boyó kon butá tanaa musti ogoi kon datu mita. Pongawasa mita tatua dinuí-Mu mongawasa kon umat-Mu, nobaḻí hukuman kon dosa nami kon ini-Mu. Mosia in nomarenta kinooibogbí in ginanea kon inami bo bobiagon nami. Tuamai tanaa kami in mororiga, nopuḻingdon in roriga bo morobonoḷ in dodob!”

³⁸Pinodoyon kon bayongan inta nobaḻí tatua, kami rayat in Israel nomia kon dodandian inta moroton bo pinais, bo cinapan in itoi mita, intau mita in Lewi bo imang nami tobatú.