Read Mongondow ESTER 3 Bible Online

ESTER 3 - Mongondow bible

ESTER 3

¹Diá noonggot kon tua ki Datu Ahasyweros noduí kon intau tobatú inta ki Haman in tangoinea nobaḻí perdana menteri. Ki Haman in ki adí i Hamedata nongkon buí in Agag.[4]

²Ki datu in nomarenta kon bayongan in pogawainea sinbá mohoromat kon i Haman poḷat tumungkud kon tayowonnea. Komintanbí dinumudui kon parenta tatua, koḻikudbí in ki Mordekhai.

³Pogawai mita ibanea kon komaḻig in noḻibó kon inia nongonu sin sia in ḻimimpatbí kon parenta i datu,

⁴bo pomuḷoi in singgai mosia in momakisa kon inia sinbá dumuduidon kon parenta tatua, táe sia in doíbí mokidongog. Gumannea, “Akuoi in intau in Yahudi; akuoi in diábí motaau in tumungkud kon tayowon in intau.” Bo mosia nopotaau intua kon i Haman sin mosia in moibog monotaau mongo onu in popoaid i Haman kon i Mordekhai.

⁵Ki Haman in sinumorú totok kon dodai in nokotaau kon ki Mordekhai in doí tumonsiup kon inia.

⁶Bo naonda in kinotaauannea kon ki Mordekhai in intau in Yahudi, nomontowdon in sia kon tosingogon kon mohukum kon i Mordekhai bo deemanbí tongá sia, táe moyopúbí kon bayongan bangusa in Yahudi kon dodatuan Persia.

⁷Kon taong impuḷú bodoyowá kon pinomarentaan i Datu Ahasyweros, kon buḷan imitánea, inta buḷan Nisan, ki Haman in nopotabá mopogonik in undi inta sinangoi “purim” sin monotaau singgai bo buḷan táonda inta moyokaan in popobayáannea in tomayánea inta moraat tatua. Dá sinantúdon kon singgai impuḷú bo toḷúnea buḷan impuḷú bodoyowánea, tuata in buḷan Adar.

⁸Bo ki Haman in noguman kon i datu, “Tuang, oyúon in bangusa tobatú inta mokoherang inta noibaya-bayá mako kon batúan in propinsi in dodatuan tanaa. Adat kabiasaannea in noyoposibí totok in bangusa mita ibanea. Mosia in doíbí dinumudui kon hukum mita in dodatuan. Dá, maníka ki Tuang in dikadon mopomayá mako in mosia mogaid kon onuka in kinoibog monia.

⁹Aka diá mobogat in gina i Tuang, dá mopia-piabí kon poḷuaion in surat parenta moyopú kon i monia. Bo aka ki Tuang moibog motarima kon onu in pinoigum in bobantung naa, dá notantú bidon kon bobantung naa in mokoogoibí kon noiḻiu kon 340.000 nokilo in saḷaka kon bonu in poti i Tuang.”

¹⁰Nokodongogmai kon tua, ki datu in norabut kon sisingnea nongkon gongguyamúnea inta kopake-pakénea sin mocap kon pongumuman mita inta sinotaaunea, bo inogoinea kon i Haman, musung moḷoben in bangusa Yahudi.

¹¹Guman i datu kon inia, “Bangusa tatua bo doitnea doman in ogoiku kon inimu. Aidaidon onu inta kainimu in mopia aidan kon i monia.”

¹²Dá kon singgai in impuḷú botoḷúnea buḷan imitánea, ki Haman in nogoiní kon momomais mita i datu. Mosia in pinotabánea nomais kon surat podudui in bayongan inta pinarentanea, bo surat tatua in pinaisdon kon bonu in bayongan in singog inta pinaké kon dodatuan tatua. Surat tatua in pinais pinodoyon kon tangoi i Datu Ahasyweros bo cinapan in sisingnea, bo ḷagi pinoki dia kon pongawasa, kon gubernur bo intau moḷoben kon bayongan in propinsi. Tombonunea in parenta inta noguman kon tanggal in impuḷú botoḷúnea kon buḷan Adar, bayongan in bangusa Yahudi, pinomayá inta noguyang andeka inta noguod, pinomayá bobay andeka mongoadí, in mustibí ḻimodon diábí in taḻiban bo kapunyaan monia in gamáan.

¹⁴Parenta tatua in mustibí popotaau kon batúan in propinsi sinbá bayongan in intau in mosadiadon kon singgai inta ain sinantú tatua.

¹⁵Intau mita inta pinotabá iḻimikat in minayá nogatod kon surat mita tatua kon bayongan in propinsi dodatuan. Podudui kon onu inta pinoguman i datu dá parenta tatua in pinotaau doman kon Susan, ibukotá in Persia. Nopaḷut mako kon tua ki datu bo ki Haman in iḻimitú mako bo monginumai kon anggur, táe kotá in Susan in nodoḻiok popisí in habar tatua.