Read Mongondow ESTER 4 Bible Online

ESTER 4 - Mongondow bible

ESTER 4

¹Naonda in kinodongogandon i Mordekhai onu inta nobaḻí, nomerak in sia kon ḷambungnea bo nogibintoḷ nobaḻí tomponuot kon morobonod in gina. Sia in nopoinggú in ḷobud kon uḷunea, bo nodondaḷoi kon kotá poḷat nongombaḷ moropot takin robonoḷ in dodob.

²Kon tayowon in bonawang in komaḻig nogogai in sia, sin intau inta nogibintoḷ in diábí ogoi in tumuot.

³Bo kon bayongan in propinsi, intau mita in Yahudi nongombaḷ bo nogamui naonda in parenta i datu pinotaau. Nopuasa in mosia, nongombaḷ bo nopongadu, bo nobayong in kon sigad monia in nomaké in sosapi bo inumuḻid kon ḷobud.

⁴Naonda in mongodeaga mita bo pojabat inta ain sinantú mobantung kon i Bokí Ester nopotaau kon inia onu inta inaidan i Mordekhai, norobonoḷ totok in gina i Ester. Sia nokidia in ḷambung kon i Mordekhai toḻiu in sosapinea, táe doí in sia notarima.

⁵Bo ki Ester in nogoiní kon i Hatah, pojabat tobatú inta pinotabá i datu mobantung kon i Ester. Pinotabánea in ki Hatah moḻibó kon i Mordekhai mongo onu in nobaḻí bo nongonu sin momiabí kon natua.

⁶Dá minayá in ki Hatah kon i Mordekhai kon rawang in kotá kon tayowon in bonawang komaḻig.

⁷Inouman i Mordekhai kon inia onu inta nobaḻí bo tongonu in kobayong in doit saḷaka inta pinodandi i Haman kon bonuon kon poti in datu, naonda in mopaḷut mako ḻimodon komintan in intau in Yahudi.

⁸Ki Mordekhai in nobogoi doman kon i Hatah in salinan in surat i datu inta pinoḷuai nongkon Susan bo inta tombonunea in parenta moyopú kon intau in Yahudi. Pinotabánea in ki Hatah mobogoi in surat tatua kon i Ester bo moginsilang kon pelekara tatua kon inia, bo mopoigum doman sinbá ki Ester in mayá kon tayowon i datu sin mopoigum in totabi kon bangusanea.

⁹Bo minayádon in ki Hatah kon i Ester bo nopotaau in koyow i Mordekhai kon inia.

¹⁰Táe ki Ester in nopotabá bui kon inia minayá bui kon i Mordekhai takin koyow nanaa,

¹¹“Komintan intau, pinomayá ḷoḷaki andeka bobay, inta aka diá inoiní, bo mamangoi kon tayowon i datu kon palas kon bonu in komaḻig, in mustibí hukumon matoi. Tua in nobaḻí undang-undang bo bayongan in intau pinangkoi kon monononggina i datu nodapot kon rayat kon bayongan in propinsi, nonotaaubí kon tua. Tongábí tobatú in daḷan sinbá moisimparut nongkon undang-undang tatua, tuata in aka ki datu mopotundú in tungkudnea buḷawan kon intau tatua. Aka tua bo mobaḻí, yo mosaḷamat in sia. Táe ain tobuḷan naa diá in akuoi inoiní i datu.”

¹²Bo ki Hatah in nopotaau in koyow i Ester tatua kon i Mordekhai.

¹³Dá ki Mordekhai in nokidia in tompoingat tanaa kon i Ester, “Dikabí kainimu kamai dá iko in moiḷaguibí kon intau mita in Yahudi ibanea, tongá popisí in iko nogutun kon komaḻig!

¹⁴Intau in Yahudi in notantúbí kon mokouḻí kon totuḷung naondaka in daḷannea modapot in mosia mosaḷamat. Táe aka iko bo tongá kibio-biómai kon bonu in kaadaan ná tanaa, yo iko tontaní in matoibí doman bo motoḷuadí i amámu in modait bidon in oumannea. Dika bo dika, iko in piniḻí bokí popisíbí in kaadaan ná tanaa!”

¹⁵Dá ki Ester in nokidia in habar tanaa kon i Mordekhai,

¹⁶“Sipundon in bayongan intau in Yahudi inta kon Susan bo sambayangai in akuoi. Dika mongaan bo monginum in toḷu nosinggai bo toḷu nogobii in koonggotnea. Akuoi tontaní bo mongodeaga mita inta nobantung kon inakó in mopuasabí doman. Mopaḷut mako kon tua akuoi in mayá kon tayowon i datu, umpakabí ḻimimpat tua kon undang-undang. Aka akuoi bo musti matoi popisí intua, dá biódon mako in akuoi matoi!”

¹⁷Bo minayádon in ki Mordekhai bo nogaid kon bayongan inta pinongoyow i Ester kon inia.