Read Mongondow ESTER 6 Bible Online

ESTER 6 - Mongondow bible

ESTER 6

¹Kon doḷom doman tatua ki datu diá nokosiug. Tuamai in pinoki gamánea in buk inta pinomaisan kon onu in nobaḻí kon dodatuan bo pinoki baca kon intau.

²Kon bonunea oyúon in pinais kon ki Mordekhai in nopotaaudon kon tomayá i Bigtan bo i Teres, pojabat doyowa inta pinoki ḷukadan in gopot i datu kon moḷongasi moḻimod kon i datu.

³Ki datu in noḻibó, “Horomat bo tontuḻí onu inta ain inogoi kon i Mordekhai tua?” Bobantung mita tatua in notubag, “Diábí in sia notarima kon onu bo onu.”

⁴Bo ki datu in noguman, “Ki ine in pogawaiku kon komaḻig in tanaa mako?” Noikoḷatbí in ki Haman bagupa sinumuot kon palas in komaḻig; sia in mamangoi mopoigum kon i datu sinbá ki Mordekhai in popobambédon kon oigi inta ain pinosindog tatua.

⁵Bobantung mita tatua in notubag kon i datu, “Ki Haman in kon komaḻig bo moibog in sia mamangoi kon tayowon i Tuang.” “Potabádon in sia tumuot,” guman i datu.

⁶Naonda in ki Haman sinumuot, ki datu in noguman, “Oyúon in intau in ogoianku in kahoromatan moḷoben. Onu in aidanku kon inia?” Kon raian i Haman, “Ki inepabí in ogoian in kahoromatan moḷoben tua i datu? Notantú bidon kon akuoi!”

⁷Tuamai in sia notubag, “Pogamáaidon in intau tatua kon ḷambung intau moḷoben inta biasamai pakéon i Tuang tontaní. Bo kabaḷo i Tuang in ḷambáan in lambang mita in dodatuan.[5]

⁹Intau moḷoben kon negara nongkon golongan in intau moḷoben in musti mopoḷutud in ḷambung tatua kon intau inta horomaton i Tuang tua, bo tumakin kon intau tatua kotako-takoi kon kabaḷo i Tuang mongin rawang in kotá. Intau moḷoben tatua in mayá kon munanea sindaḷan momaḷú, ‘Nanaa in aid i datu mobogoi in ponghargaan kon intau inta ihoromatnea!’ ”

¹⁰Bo ki datu in noguman kon i Haman, “Koḷamemet, gamádon in ḷambung bo kabaḷo tatua bo ogoidon in bayongan in kahoromatan tatua kon i Mordekhai, intau in Yahudi tatua. Aidaidon ná inta pinogumanmu koina, bo dikabí gaatan in tobatúmai. Sia intua ḻimitú mako kon tayowon in bonawang in komaḻig.”

¹¹Bo ki Haman in nogamá kon ḷambung bo kabaḷo tatua bo nopopaké kon i Mordekhai. Naonda in ki Mordekhai sinumakoi kon kabaḷo tatua, dinia i Haman in sia pinoḻibu kon rawang in kotá, sindaḷan momaḷú, “Indoiai, nanaa in aid i datu mobogoi in ponghargaan kon intau inta ihoromatnea!”

¹²Nopaḷut mako kon tua ki Mordekhai nobui kon bonawang in komaḻig. Táe ki Haman in iḻimikat nobui. Doí in sia indoian in intau sin nooyá totok in sia, dá inoḻingoianneadon in pogotnea.

¹³Onu in nobaḻí tatua inoumannea kon i buḷoi bo kon bayongan in yobayatnea. Onda intua ki buḷoinea bo yobayatnea mita inta mobijaksana tatua in noguman kon inia, “Momangkoidon in Iko taḷowon i Mordekhai. Sia in intau Yahudi bo diábí in iko mokoḷawang kon inia. Notantú bidon kon taḷowonneabí in iko.”

¹⁴Koyogotpa in mosia moyosingog mako i Haman, pojabat mita in komaḻig namangoi iḻimika-ḻikat sin mogatod kon i Haman kon bobutungan inta pinomia i Ester.