Read Mongondow ESTER 7 Bible Online

ESTER 7 - Mongondow bible

ESTER 7

¹Dá kon induaneadon in ki datu bo ki Haman in nongaan nonginum noyotakin i Ester.

²Koyogot in nonginum kon anggur, ki datu in noḻibó bui kon i Ester, “Uḻe, Buḷoiku, onu in koibogmu? Pogumandon! Notantú bidon kon ogoikubí umpakabí igumonmu in tongo botak in dodatuan ku.”

³Tubag i Ratu Ester, “Aka mosanangbí in gina i Tuang in mobogoi, poigumon in bobantung naa sinbá bobantung bo bangusa in bobantung naa in pomayádon mako in mobiag.

⁴Sin bobantung bo bangusa in bobantung naa in pinotaḷuidon sin ḻimodon. Aka kuma bo kami naa in tongábí pinotaḷui sin baḻíon ata, dá tongábí in bobantung naa kibio-biómai bo diábí monuyayow kon i Tuang.[6] Táe tanaa in kami ḻimodon bo putúan!”

⁵Bo noḻibódon in ki Datu Ahasyweros kon i Bokí Ester, “Ki ine in mokobaḻí momia kon natua? Kon onda in intau tatua?”

⁶Ki Ester in notubag, “Ki Haman inta moraat tanaa in musung bo inta momogutú kon inami!” Takin noondok totok ki Haman inimindoi kon i datu bo kon i bokí.

⁷Sinumorú totok in ki datu, bo sinimindog nonaḷámai kon meja bo baḷú iḻumuai, minayá in taman komaḻig. Kinotaauandon i Haman kon ki datu in nomontowdon kon tosingogon kon mohukum kon inia, tuamai in sia diábí nonaḷámai kon i Ratu Ester bo totok in mopoigum sinbá posaḷamaton.

⁸Takin kinobuḻian in kamang ki Haman inumuḻid kon ḷoḻitúan i Ester sin mopoigum in ampung, táe noitongkanádon kon tua ki datu namangoidon bui nongkon taman in komaḻig. Nokoontongmai kon aid i Haman natua, ki datu in nomaḷú, “Onu? Mokobaḻípa doman in sia modomok kon i bokí kon naa, kon tayowonku bo kon komaḻigku tontaní?” Dá naonda in tosingogon mita tatua siningog i datu, pojabat mita in namangoi bo nongoḷubung kon uḷu i Haman.

⁹Bo guman i Harbona, intau tobatú kon sigad in pojabat mita tatua, “Tuang, kon diug in baḷoi Haman oyúon in oigi pobobambéan koḷantudnea in doyowa nopuḷú bo doyowa nometer. Tua in pinosindogdon i Haman sin popobambéan kon i Mordekhai, intau inta ain noposaḷamat kon kobiagan i Tuang.” Bo ki datu in nomarenta, “Pobambédon in ki Haman kon oigi tatua!”

¹⁰Natuata in nobaḻí ki Haman pinobambé kon oigi inta ain pinosindognea kon i Mordekhai. Nopaḷut mako kon tua noinggamádon in torú i datu.