Read Mongondow IḶUAIAN 1 Bible Online

IḶUAIAN 1 - Mongondow bible

IḶUAIAN 1

¹Ki Yakub inta sinangoian doman ki Israel, minayá in Mesir takin ki adínea mita bo ginaḷum monia. Naa in ki adí mita i Yakub:

²Ki Ruben Ki Simeon Ki Lewi Ki Yohuda

³Ki Isakhar Ki Zebulon Ki Benyamin

⁴Ki Dan Ki Naptali Ki Gad Ki Asyer.

⁵Bayongan in buí i Yakub koantónea in pitu nopuḷú. Ki Yusup noiunadon nogutun kon Mesir.

⁶Degá tongonumai notaong noiduduimai kon tua ki Yusup bo ki utatnea mita in minatoidon, ná doman tua intau mita inta topobiagnea.

⁷Táe buí monia, inta intau mita Israel, in nononggadí bo nononggompu mobarong totok, bo motoyong totok in kinododugang monia, dá butá in Mesir notoimpaḷotdon kon i monia.

⁸Noiduduimai kon tua datu mobagu tobatú inta diá nonotaau kon i Yusup in nomarenta kon Mesir.

⁹Sia in noguman kon rayatnea, “Intau mita Israel tatua mokobahayabí totok kon inaton, sin mosia totokdon in mobarong bo mosia in moropo-ropot in kita.

¹⁰Aka mobaḻí in parang, yo diá bo diá mosia tua in motobatúbí takin musung mita sin moḷawang kon inaton, bodongka moḷagui monaḷámai[1] kon butá tanaa. Kita musti in morai mongo naonda sinbá diádon modugang in kobayong monia.”

¹¹Dá intau mita in Mesir nomiḻídon kon intau mita nobaḻí toimata kon intau mita Israel sin moposaged kon kobobiag monia takin momakisa totok kon i monia mogaid. Mosia in pinakisa moposindog kon i datu in kotá mita Pitom bo Raamses sin baḻíon tampat potagúan kon barang mita.

¹²Tongá naonda in kodugang-kodugang in ponononggata intau in Mesir, yo kodugang-kodugang doman totok in kobayong intau Israel, bo mosia totokdon in moibaya-bayá mako kon bayongan butá tatua, dá intau in Mesir noondokdon kon i monia.

¹³Bo totokdon moraat in pogogaid monia kon intau in Israel,

¹⁴bo kobobiag intau Israel pinosagedon totok monia. Mosia in pinakisa totok mogaid kon oaidan mita moposindog in bangunan bo mogaid doman kon gobá mita takin diádon in totabi monia.

¹⁵Noiduduimai kon tua datu in Mesir nomarenta kon i Sipra bo kon i Pua, mototuḷung kon ponononggadían inta motuḷung kon bobay mita Ibrani kon dodai in mosia mononggadí.

¹⁶Guman i datu in Mesir, “Kon tungkuḷ in moiko motuḷung kon bobay mita in Ibrani mononggadí, yo toropdon in naa: Aka adí inta pinononggadí tatua bo ḷoḷaki, yo ḻimod in adí tatua! Táe aka bobay yo pomayádon mako mobiag.”

¹⁷Táe taya dua tua in intaubí mita inta motoguondok kon i Allah. Doíbí in mosia mogaid kon onu inta pinoki aid i datu bo pinomayádon mako monia in adí mita ḷoḷaki tua nobiag.

¹⁸Dá ki datu in nogoiní kon i nayadua tua bo noḻibó, “Nongonu sin pinomayábí mako monimu in adí mita ḷoḷaki tua nobiag?”

¹⁹Tubag monia, “Bobay mita in Ibrani diábí ná bobay mita in Mesir. Mosia in morotonbí in mononggadí. Kon dodai in kami diápa moiangoi adí mita monia koyongandon noiḷotang.”

²⁰Dá ki Allah nomarakat kon mototuḷung kon ponononggadían mita tua bo nobogoi in buí kon i monia, sin mosia in mohoromat kon i Allah. Bo intau Israel nodugangdon totok in kobarong monia bo moropot doman.

²²Dá ki datu in nomarenta nanaa kon bayongan in rayatnea, “Bayongan adí ḷoḷaki intau Ibrani inta bagu pinononggadí musti pogonag kon Ongkag in Nil, táe bayongan adí monia bobay pomayádon mako in mobiag.”