Read Mongondow IḶUAIAN 12 Bible Online

IḶUAIAN 12 - Mongondow bible

IḶUAIAN 12

¹Ki TUHAN noguman kon i Musa bo kon i Harun kon butá in Mesir. Kai-Nia,

²“Buḷan tanaa nobaḻí buḷan dungkuḷ kon batúan taong.

³Potaaudon in parenta tanaa kon bayongan bangusa Israel: Kon tanggal mopuḷú buḷan tanaa, intau mita ḷoḷaki in musti moratá kon ki adí in domba tobatú sin kaanon moyotakin in intau kon bonu in baḷoi.

⁴Aka tombonu in baḷoi tua moyakag dapot in diádon mokodait kon ki adí in domba tobatú, dá mosia tua takin topodiugmai inta totok in modagin in motaaudon moyotakin mokaan kon ki adí in domba tatua. Ki adí in domba tatua musti silaion podudui in kobayong in intau inta mokaan.

⁵Moiko in motaaubí momiḻí kon domba ande bembé, táe musti koḷakian, umurnea in totaongdon, bo inta notaka.

⁶Biag tatua in tagúonpa monimu kon tua dapot in tanggal mopuḷú bo opat. Kon singgai tatua, moḷolabungmai bayongan umat Israel musti moratá kon ki adí in domba tatua.

⁷Dugúnea topiḻik in musti poḻepo kon oigi in ḷoḻingkop doyowa bo kon ngara kon dotá in ḻimonik kon baḷoi tampat pinongaanan monia.

⁸Doḷom doman tuata tapúnea musti angagon bo kaanon takin kuyat pait bo roti diá iragian.

⁹Ki adí in domba tatua musti angagon komintan, takin uḷu, sioḷ bo bonu in siannea. Kaandon in tapú inta ain inangag tatua, donaai kaanon diá moḷutú ande tuonon.

¹⁰Dika taḷaan topiḻikmai in tapú tatua modapot in doḷo-doḷom; aka oyúon in kiagatnea, musti tubáan kopayongon.

¹¹Kon oras in moiko mongaan musti koyongandon nopaḷut nonoḻisí sin mayá, mogi aip in sioḷ bo kokada-kadai in tungkud. Pokoḷamemet in moiko mongaan. Tuata in porayaan Paska sin mohoromat kon i-Nakó, ki TUHAN.

¹²Kon doḷom tatua moḻibudon in Akuoi kon bayongan butá in Mesir, bo momatoi kon bayongan adí ḷoḷaki inta guya-guyang, pinomayá intau, ande biag. Akuoi in mohukumdon kon bayongan inta sumbaanmai monia kon Mesir, sin Akuoibí in ki TUHAN.

¹³Dugú inta kon ḷoḻingkop in baḷoimu, tua in mobaḻí tomponuot kon baḷoi mita inta pinogutunanmu. Aka Akuoi mokoontong kon dugú tatua, moiko in taḻiban-Ku bo diábí yopúon-Ku kon dodai in Akuoi mohukum kon Mesir.

¹⁴Singgai tatua musti toropon monimu mobaḻí singgai moḷoben kon i TUHAN. Bo singgai tatua musti umuran toropon monimu poḷat baḻíon monimu singgai moḷoben muḷoi in taong.”

¹⁵Ki TUHAN noguman, “Pitu nosinggai in koonggotnea moiko diá motaau mokaan kon roti inta iragian. Kon singgai dungkuḷ bayongan in ragi musti poḷuaion nongkon baḷoimu, sin aka kon bonu in pitu nosinggai tatua intau tobatú mokaan kon roti inta iragian, yo sia in diá bidon motaau poyoiapon tombonu in umat-Ku.

¹⁶Kon singgai inta dungkuḷ, bo kon singgai doman impitunea, moiko musti moyosipun sin moibada. Kon singgai tatua moiko diábí motaau mogaid kon oaidan onuka koḻikudbí in mogoḷud kon pongaanan.

¹⁷Kon singgai tatua bayongan in bangusamu diaan-Ku ḷumuai nongkon Mesir. Tuamai modapot kon i adí bo ompumu, muḷoi in taong, singgai tatua musti baḻíon monimu singgai moḷoben.

¹⁸Kon bonu in buḷan dungkuḷ, pangkoion kon tanggal mopuḷú bo opat doḷom, modapot kon tanggal doyowa nopuḷú bomitá doḷom, moiko in diábí motaau mokaan kon roti inta iragian. Kon bonu in pitu nosinggai tatua bayongan in ragi musti poḷuaion nongkon baḷoimu. Intau Israel ande intau ango-angoi inta kon bonupa in porayaan tatua bo nokaan kon roti inta iragian, yo sia in diá bidon iniap umat-Ku.”

¹⁹

²⁰

²¹Ki Musa nogoiní kon bayongan itoi intau Israel bo noguman kon i monia, “Bayádon bo pogamá kon tonsilai in tombonu in baḷoimu ki adí in domba tobatú sin pakéon kon porayaan Paska.

²²Pogamádon kon hisop tobogot, poḷodok kon bonu in tano-tanó inta binonuan[10] in dugú in domba tatua, bodongka popoḻepo kon oigi in ḷoḻingkop doyowa bo kon ḻimonik in ḷoḻingkop in baḷoimu. Modapot in doḷo-doḷom dika tobatúmai kon sigad monimu i monaḷámai kon baḷoi.

²³Kon dodai in ki TUHAN modondaḷoi kon butá tanaa sin moḻimod kon intau mita in Mesir, ki TUHAN in mokoontong kon dugú inta kon oigi ḷoḻingkop doyowa bo kon ngara kon dotá in ḻimonik; dá tongá taḻiban-Nea mako natua bo diá ogoi-Nea in Malaekat Maut tumuot kon baḷoimu sin moḻimod kon i monimu.

²⁴Moiko takin ki adímu mita musti motoindudui kon parenta tatua modapot in kopaḷutannea.

²⁵Aka moiko tumuotdon kon butá inta pinodandi i TUHAN kon inimu, yo moiko in musti mogaid kon upacara tanaa.

²⁶Aka ki adímu mita moḻibó, ‘Onu in mangaḻe upacara tanaa?’

²⁷Moiko in musti motubag, ‘Naa in kuruban in Paska sin mohoromat kon i TUHAN, sin baḷoi mita intau Israel kon Mesir sinaḻiban-Nea, kon tungkuḷ in sia noḻimod kon adí mita guya-guyang intau in Mesir, bo kita in pinomayá-Neadon mako in nobiag!’ ” Dá dinumokódon intau mita Israel bo nosumba.

²⁸Dá mosia in minayádon bo nogaid kon onu inta pinarenta i TUHAN kon i Musa bo kon i Harun.

²⁹Pongantog in doḷom tua ki TUHAN noḻimod kon bayongan adí mita ḷoḷaki in bangusa Mesir inta guya-guyang, pinangkoi kon i adí i datu, nodapot kon i adí in intau mita inta kon ponjara. Bayongan bobiagon inta muna pinogadí pinoyoḻimod doman.

³⁰Doḷom tua ki datu, intau mita inta nokadai kon kawasa bo bayongan intau in Mesir noibangon. Kon bayongan butá in Mesir kinodongogandon in ombaḷ bo amui inta totok in modowawá sin diá tobatúmai in baḷoi in diá kinopatoian adí ḷoḷaki tobatú.

³¹Doḷom domandon tatua, ki datu nogoiní kon i Musa bo kon i Harun bo noguman, “Bayádon nongkon naa, moiko komintan! Taḷaaidon in butáku! Bayádon posumba kon i Allahmu ná inta pinoigum monimu.

³²Diadon in bayongan sapi, domba, bo bembému, bo bayádon! Poigumai domandon kon barakat in akuoi!”

³³Intau mita in Mesir mondodak kon intau mita in Israel sinbá ḷagidon monaḷámai kon butá tatua. Guman monia, “Kami komintan in modaitdon matoi aka moiko diá mayá nongkon butá nami naa!”

³⁴Bo intau mita Israel nogamá kon pansi mita monia inta kon bonu in touḷut pomiaan roti inta diá iragian, binantaḷ monia, bo pinotaan.

³⁵Inaidan doman monia onu inta pinoguman i Musa, mosia noigum kon ḷambá buḷawan bo saḷaka takin pakeang mita kon intau in Mesir.

³⁶Binaḻídon i TUHAN in intau mita in Mesir mopia in gina kon intau Israel, dá mosia nobogoi kon onu inta pinoigum monia. Pinongin natua intau Israel nodia kon kaoyúonan intau in Mesir iḻumuai nongkon butá tatua.

³⁷Intau Israel nobuat bo minaya-mayá in sioḷ nongkon kotá in Raamses nopobayá in kotá Sukot. Kobayong monia tua in 600.000 noribu intau, diá bidon pinoyoiap in bobay bo adí mita.

³⁸Nodia in mosia kon nobayong in sapi, domba bo bembé. Nobarong doman intau ango-angoi in dinumudui.

³⁹Mosia in notubá kon roti inta diá iragian nongkon touḷut mita inta sinokodia monia nongkon Mesir. Mosia bayá-bayádon pinoguntun nongkon tua, dapot in diádon nokoposadia kon tongkaaḷ.

⁴⁰Bangusa Israel in nogutun kon Mesir 430 notaong in koonggotnea.

⁴¹Kon singgai imbuit in taong 430 tua, bayongan umat i TUHAN nonaḷámaidon kon butá in Mesir.

⁴²Doḷom tua ki TUHAN umuran moḷukad sin modia kon i monia ḷumuai nongkon Mesir. Bo tuata doman in doḷom inta umuran pinosumba kon i TUHAN nobaḻí doḷom ponanoban. Kon doḷom tatua umat in Israel musti kiḷuka-ḷukadmai.

⁴³Ki TUHAN noguman kon i Musa bo kon i Harun, “Naadon in atorang Singgai Moḷoben kon Paska. Intau ango-angoi diá motaau mokaan kon tapú in domba inta pinosumba kon singgai in Paska.

⁴⁴Táe ata inta sinaḷui monimu motaaubí tumakin mokaan kon tua, aka sia aindon sinoit.

⁴⁵Intau ango-angoi ande intau mononiguan diá motaau tumakin mokaan kon tua.

⁴⁶Bayongan tapú in domba tatua musti kaanon kon bonu in baḷoi, bo diá motaau diaan ḷumuai. Dika momutoḷ kon tuḷannea tobatúmai.

⁴⁷Bayongan intau israel musti mogaid kon rame tatua.

⁴⁸Intau inta diá sinoit diá motaau mokaan kon kaanon rame tatua. Aka intau ango-angoi inta ain nogutun notantú kon i monimu moibog moraya kon Paska sin mohoromat kon i-Nakó, ki TUHAN, yo bayongan in ḷoḷaki kon bonu in baḷoinea musti munapa toiton. Mopaḷut mako kon tua mosia inanggap ná intau Israel taakan, bo motaaudon tumakin kon poramean singgai moḷoben Paska.

⁴⁹Atorang inta notongkai popoaid doman kon intau Israel taakan bo kon intau ango-angoi inta nogutundon notantú kon sigad monimu.”

⁵⁰Bayongan intau Israel motoindudui bo nogaid kon bayongan inta pinarenta i TUHAN kon i Musa bo kon i Harun.

⁵¹Kon singgai tatua ki TUHAN nodia kon bayongan umat Israel iḻumuai nongkon Mesir.