Read Mongondow IḶUAIAN 13 Bible Online

IḶUAIAN 13 - Mongondow bible

IḶUAIAN 13

¹Ki TUHAN noguman kon i Musa,

²“Posumbadon in bayongan adí ḷoḷaki inta guya-guyang kon i-Nakó. Bayongan in adí ḷoḷaki guya-guyang Israel, bo bayongan in bobiagon koḷakian inta muna pinogadí, tua in Akuoi in kitogi.”

³Ki Musa noguman kon bangusa Israel, “Kon singgai naa ki TUHAN nopoḷuatdon kon i monimu takin kawasa-Nea inta moḷoben, nodapot in moiko nokoḷuaidon nongkon Mesir, tampat pinononggataan kon i monimu. Tuamai, tanobdon in singgai tanaa. Donaaidon mokaan kon roti inta iragian.

⁴Kon singgai tatua, tanggal imitánea buḷan Abib ande buḷan imitánea, moiko nonaḷámai kon butá in Mesir.

⁵Takin nongibot ki TUHAN nodandi kon mogoguyangmu kon Sia in moposarakan in butá in bangusa Kanaan, Het, Amori, Hewi bo Yebus. Naonda in ki TUHAN modia kon i monimu mayá in butá inta mopia totok bo noḷumbá tua, pomuḷoi in taong kon bonu in buḷan Abib, moiko in musti mogaid kon upacara tanaa.

⁶Kon bonu in pitu nosinggai moiko in musti mokaan kon roti inta diá in ragi, bo kon singgai inta nogimpitu musti mogaid kon poramean sin mohoromat kon i TUHAN.

⁷Kon bonu in pitu nosinggai moiko diá motaau mokaan kon roti inta iragian, bo kon bayongan in butámu diábí motaau oyúon in ragi ande onukadon inta iragian.

⁸Kon pomangkoian porayaan tatua moiko in musti mongonguman kon i adímu inta ḷoḷaki kon bayongan tua in pinomia sin monorop kon bayongan inta ain inaidan i TUHAN kon inimu kon tungkuḷ in moiko nonaḷámaidon kon butá in Mesir.

⁹Porayaan tanaa nobaḻí tompoingat kon inimu ná tomponuot inta pinopotogot kon ḻima ande kon pogotmu. Porayaan tanaa moponorop kon i monimu sinbá umuran moposingog bo monotaau kon hukum mita i TUHAN, sin ki TUHAN nopoḷuaidon kon i monimu nongkon Mesir takin kawasa-Nea inta moḷoben.

¹⁰Porameaidon in pesta tanaa pomuḷoi in taong kon singgai inta ain sinantú.”

¹¹Ki Musa in noguman kon bangusa Israel, “Ki TUHAN in mogatod kon i monimu kon butá in Kanaan inta pinodandi-Nea takin nongibot kon inimu bo kon mogoguyangmu. Naonda in butá tatua mobaḻí kapunyaanmu,

¹²moiko in musti moposumba in adí monimu ḷoḷaki inta guya-guyang bo bayongan bobiagon koḷakian inta muna pinogadí. Tua komintan ki TUHAN in kitogi,

¹³táe batúan in keledai koḷakian inta muna pinogadí musti tobuton kon i TUHAN takin mopokuruban ki adí in domba tobatú nobaḻí toḻiunea. Aka moiko doí motobut kon keledai tatua, yo sigogownea musti putoḷon. Batúan in adímu ḷoḷaki inta muna pinononggadí musti tobuton.

¹⁴Aka kon singgai moiduduimai ki adímu moḻibó onu in mangaḻe in tua komintan, yo nanaa in pototubag monimu, ‘Takin kawasa inta moḷoben, ki TUHAN nodia kon i naton iḻumuai nongkon butá in Mesir, tampat pinononggataan kon i naton.

¹⁵Kon tungkuḷ in ki datu in Mesir motontogat in gina bo doí mobogoi kon i naton mayá, ki TUHAN noḻimod kon bayongan adí ḷoḷaki inta guya-guyang kon Mesir, pinomayá ki adí intau ande ki adí in biag. Tuamai kita mopokuruban kon i TUHAN in bayongan bobiagon koḷakian inta muna pinogadí, táe tobuton naton in ki adí mita naton inta guya-guyang.’

¹⁶Kabiasaan tatua musti mobaḻí tompoingat kon i naton naonda bo tomponuot inta pinopotogot kon ḻima ande kon pogot naton. Pongin natua kita umuran poponoropan kon ki TUHAN ain nopoḷuai kon i naton nongkon Mesir takin kawasa inta moḷoben.”

¹⁷Naonda in datu in Mesir nobogoidon kon bangusa Israel minayá, ki Allah in diábí nodia kon i monia sinumaḻib nongin daḷan inta moitaḻib kon butá intau in Pilistin, umpaka tua in daḷan inta totok in modiug. Ki Allah in norai nanaa, “Dika-dikabo intau mita tatua momanasaḷ aka mosia in musti moyogintayow in parang modapot in mosia mobui mayá in Mesir.”

¹⁸Tuamai ki Allah in nodia kon i monia nongin daḷan inta noḻibu nongin padang gurun nopobayá in Dagat in Gelagah.[11] Kon dodai in nonaḷámai kon Mesir, intau mita Israel tatua nodia kon abit naonda bo mayá moparang.

¹⁹Ki Musa in nodia kon tuḷan mita i Yusup, sin kon dodai in ki Yusup nobiagpa sia nopoigumdon muna kon intau mita Israel takin nongibot kon aidanbí monia in natua. Nanaa in koyow i Yusup, “Kon dodai in ki Allah nopoḷuat kon i monimu, tuḷanku musti diaan monimu nongkon tampat tanaa.”

²⁰Intau Israel nobuat kon Sukot bo nononḷoḷaigan kon kotá in Etam, kon bingkí in padang gurun.

²¹Aka singgai, ki TUHAN mayá umuna kon i monia takin mokipogontong naonda bo oigi goḷom bo aka doḷom sia mayá kon muna monia kon bonu in oigi tuḷú sin motundú kon daḷan bayáan monia. Natua in nobaḻí dá mosia notaau in minayá singgai bo doḷom.

²²Kinoouput in singgai oigi goḷom umuran kon muna in bangusa tatua bo tumonggobii doman oigi tuḷú moyotakin monia.