Read Mongondow IḶUAIAN 14 Bible Online

IḶUAIAN 14 - Mongondow bible

IḶUAIAN 14

¹Noiduduimai kon tua ki TUHAN noguman kon i Musa,

²“Potabádon intau in Israel mobui bo mononḷoḷaigan kon tayowon kotá in Pi-Hahirot, kon sigad in kotá Migdol bo Dagat Gelagah, kon diug in kotá Baal-Zepon.

³Iraimai i Datu in Mesir intau Israel minayádon nongkon butá tanaa bo noiḷangkamdon kon padang gurun.

⁴Baḻíon-Ku in sia motogat in gina sinbá aḷowanneadon in moiko. Táe poontong-Kudon in kawasa-Ku kon i datu in Mesir bo tontaranea mita, bá kotaauandon monia kon Akuoi naa in ki TUHAN.” Bo inaidandon intau in Israel onu inta ain pinarenta i TUHAN kon i monia.

⁵Naonda in ki datu in Mesir nokodongogdon kon bangusa Israel noḷaguidon, sia bo pogawainea mita inangoiandon in manasaḷ bo poḷat noguman, “Onu in pomiaan naton? Nongonu sin pomayábí mako naton intau mita Israel tatua mayá modapot in kita kobuḻiandon in ata mita?”

⁶Bo ki datu noposadiadon in kereta pakéon moparang takin tontaranea mita.

⁷Sia in nobuat takin bayongan kereta parangnea, noitakin domandon in 600 in kereta inta totok in motompiḻí, inta dinia in porwiranea mita.

⁸Totuubí kon pinopotontogatdon i TUHAN in gina, nodapot in inaḷowanneadon in intau mita Israel inta kon bonu in binayáan monaḷá kon butá in Mesir takin koḷuka-ḷukad i TUHAN.[12]

⁹Tontara in Mesir takin in bayongan kabaḷo, kereta bo mododianea nogaḷow kon intau Israel, bo nomatuk kon i monia kon pinonḷoḷaigan monia kon pintad in dagat inta kon diug in Pi-Hahirot.

¹⁰Naonda intau Israel nokoontong kon ki datu in Mesir bo tontaranea mita nopoangoidon, mosia in totokdon inangoian ondok bo nokuanidon kon i TUHAN sin mokituḷung.

¹¹Guman monia kon i Musa, “Eta degá diá in poḷobongan kon Mesir, dá diniamu mangoi kon naa in kami sinbá matoi kon tampat tanaa? Indoiaika bungai in oaidanmu tatua!

¹²Koḻipod kon Mesir aindon pinoguman nami kon soaḷ tanaa in mobaḻíbí! Kami ain noguman kon dikadon tuyayowon in kami, bo pomayádon mako umuran mobaḻí ata in kami kon Mesir. Sin maníka mobaḻí ata kon tua dika in matoi kon padang gurun tanaa!”

¹³Ki Musa in noguman, “Dika moondok! Korigonon in gina! Ontongonbí monimu onu in aidan i TUHAN sin moposaḷamat kon i monimu. Intau in Mesir inta inontong monimu tanaa, diá bidon ontongon bui monimu.

¹⁴Ki TUHAN in moposaḷamatbí kon i monimu, bo moiko in dika bidon mogaid kon onu bo onu.”

¹⁵Guman i TUHAN kon i Musa, “Nongonu sin iko in mokuanibí mokituḷung? Potabádon intau Israel mongingguput kon bobayáan monia!

¹⁶Sintak in tungkudmu bo potundú kon dagat. Dá tubig in mosilai doyowa bo intau Israel motaau maya-mayá kon yuaknea inta ain noingkag.

¹⁷Potogaton-Ku in gina Intau in Mesir bá umuran aḷowan monia in intau in Israel, bo poontong-Kudon in kawasa-Ku kon i datu in Mesir, kon tontaranea, kon keretanea mita bo mododianea.

¹⁸Dá kotaauandon intau In Mesir kon Akuoibí in ki TUHAN.”

¹⁹Bo malaekat i Allah, inta kon muna in intau mita Israel, minayádon kon dotá in tumi monia. Bo oigi goḷom nomamping domandon nodapot

²⁰kon sigadon in tontara mita in Mesir bo intau mita Israel. Goḷom tatua nokopomukádon kon sindip,[13] dá tonggobii tua doyowa nopaanan tatua diá motaau mosidiugan.

²¹Bo ki Musa in notundúdon kon dagat, bo binaḻídon i TUHAN tompot in pomukaan nogirup noropot totok nodapot in tubig in dagat noondir. Tonggobii tua tompot tatua umuran nogirup, bo nomaḷui kon dagat nobaḻí butá inta noingkag.

²²Tubig nosilai doyowa, bo kon dodai intau in Israel iḷumoḷan kon dagat, mosia minayá mayábí kon apad in dagat inta noingkag, bo tubig kon dotá in koḷoigi bo koḷanan notompompangdon naonda bo dinding.

²³Intau in Mesir takin bayongan kabaḷo, kereta bo mododianea umuran nogaḷow bo dinumudui kon intau Israel nongin yuak in dagat.

²⁴Naonda in modiugdon mobayag, ki TUHAN inta kon bonu in oigi tuḷú bo goḷom tatua inimindoi kon tontara mita in intau Mesir, bo pinotombauk-Nea in mosia tua.

²⁵Binaḻínea roda mita in kereta tatua diá noburow, dá mororigadon totok monia in mayá. Guman intau in Mesir, “Koḻigai kita moḷagui monaḷámai kon intau Israel, sin ki TUHANdon in moparang monayow kon i naton.”

²⁶Guman i TUHAN kon i Musa, “Potundúdon in ḻimamu kon dagat, dá tubig in buidon moyobui, bo moḷomot kon intau mita in Mesir, kon kereta mita bo mododianea.”

²⁷Bo ki Musa nopotundú domandon in ḻimanea kon dagat bo kon tungkuḷ in doḷo-doḷomdon, tubig nobuidon ná kaadaannea inta muna. Intau mita in Mesir moramuji moposaḷamat in awak monia, táe iḷomot i TUHAN in mosia kon bonu in dagat.

²⁸Tubig in dagat noyobui bo noḷingkum kon kereta mita, intau mita inta nodia, bo bayongan tontara in Mesir inta nogaḷow kon intau in Israel kon yuak in dagat, dapot in mosia nodait minatoi.

²⁹Táe naonda intau Israel iḷumoḷan kon dagat, mosia in minayá kon apad in dagat inta noingkag, bo tubig nobaḻí dinding kon dotá in koḷoigi bo koḷanan.

³⁰Kon singgai tatua ki TUHAN noposaḷamat kon bangusa Israel nongkon pinonubuan in intau Mesir, bo mosia in nokoontongdon kon mayat mita intau in Mesir nongoibandai kon pintad.

³¹Kon tungkuḷ in intau Israel nokoontong kon naonda in ki TUHAN inta takin kawasa-Nea inta moḷoben nonaḷow kon intau in mesir, totok noherang in mosia dá nopirisayadon kon i-Nia bo kon i Musa, ata-Nea tatua.