Read Mongondow IḶUAIAN 15 Bible Online

IḶUAIAN 15 - Mongondow bible

IḶUAIAN 15

¹Bo ki Musa takin intau mita in Israel nopodondong in dondong tanaa sin modayow kon i TUHAN, “Akuoi in moibog modondong kon i TUHAN, sin moḷobenbí in kawasa-Nea. Bayongan in kabaḷo bo intau inta sinumakoi pinogambat-Nea kon bonu in dagat.

²Ki TUHAN mototuḷungku inta moropot; Sia inta ain noposaḷamat kon inakó. Sia in ki Allahku, dayowonku in Sia, ki Allah sosumbaan in mogoguyangku, poḷantudonku in Sia.

³Ki TUHAN in pojuang inta totok moropot, Ki TUHAN, tuata in tangoi-Nea.

⁴Tontara in Mesir bo bayongan keretanea pinogambat-Nea kon bonu in dagat. Itoi mita in tontara inta mongoroton noḷomot kon Dagat in Gelagah.

⁵Mosia iḻiom in dagat inta modaḷom, bo naonda batu inta sinumaḷom dapot in anor.

⁶Ropot-Mu totok in mokoherang, o TUHAN, Binaḻí-Mu in musung norimumud.

⁷Takin kawasa-Mu inta moḷoben iyompat-Mu in bayongan inta momusung kon ini-Mu. Torú-Mu nodokot ná tuḷú, bo nomokak kon i monia naonda bo pangkoi in payoi.

⁸Dagat inirup-Mu, naonda bo pompang, nodapot in dagat motaaudon bayáan.

⁹Musung noguman, ‘Mosia in aḷowanku bo domokon, rabutonku in pitow, bo rataanku in mosia. Bo bayongan kaoyúonan monia agowonku, sila-silaionku bo pakéonku modapot in moorop.’

¹⁰Táe tongá pinoginaan i TUHAN komintan nokopoangoi kon singgai nokobodito kon intau in Mesir. Mosia in noḷomot naonda bo tangat inta mobogat kon bonu in tubig inta mondangat.

¹¹Ilahbí mita kon onda in mokoḻimonik kon ini-Mu, o TUHAN Inta Momulia bo motusi? Ki Ine in mokoaid kon inta mokoherang mita bo oaidan moḷoben ná inaidan i TUHAN?

¹²Onaton-Mu in ḻima-Mu koḷanan, dá diádon ontongon in musung sin iḻiomdon in butá.

¹³Iko in nodia kon bangusa inta ain pinosaḷamat-Mu naa, sin onu in pinodandi-Mu tua doman in aidan-Mu. Ropot-Mu moḷoben pinogoḻingoi-Mu kon i monia, bo poḷat dinia-Mu pinobayá in butá-Mu inta motusi naa.

¹⁴Bangusa mita mouyot in mokodongog; intau mita in Pilistin bo itoi mita intau in Edom inagían in ondok. Intau mita in Moab inta motorindog gugur mako, intau mita in Kanaan dapoton doman in uyot.

¹⁶Sin mosia totokdon inagían ondok mokoontong kon ropot i TUHAN. Kon dodai in umat-Mu noitaḻib, musung modait dumoit; nosaḷamatdon in bangusa inta pinoḷuat-Mu.

¹⁷Bo Israel inatod-Mu kon tampat inta piniḻí-Mu popoutunan. Mosia in nogutun kon buḷud-Mu inta motusi, kon Baḷoi inta pinosindog-Mu takin ropot-Mu.

¹⁸Ikodon ki TUHAN, Datu, inta tantú momarenta.”

¹⁹Kon tungkuḷ in intau Israel iḷumoḷan kon dagat, mosia in minayá-mayá kon apad in dagat inta noingkag. Táe naonda in kereta mita intau in Mesir takin kabaḷonea bo intau mita inta nodia sinumuot kon dagat, pinoyobuidon i TUHAN in tubignea nodapot in mosia nongoḷomot.

²⁰Bo ki Miryam, nabi bobay tobatú, ki guya-guyang i Harun, nogamá kon rebananea, bo bayongan bobay dinumudui notobog kon rebana sindaḷan notayok.

²¹Ki Miryam nonongganut kon i monia nodondong, “Podondongdon kon i TUHAN, sin Sia in mokawasa totok. Bayongan in kabaḷo bo mododianea pinogarab-Nea kon bonu in dagat tatua.”

²²Onda intua ki Musa nodia kon bangusa Israel nongkon Dagat in Gelagah nopobayá in padang gurun Syur. Toḷu nosinggai in koonggotnea mosia minayá nongin padang gurun bo diá nokouḻí kon tubig.

²³Bo nodapotdon in mosia kon tampat inta tangoinea Mara,[14] táe tubig kon tua mopait totok, dá diá motaau inumon. Tuamai tampat tatua sinangoian Mara, mangaḻenea pait.

²⁴Dá intau mita tatua in nongunsingogdon kon i Musa bo noḻibó, “Onu in inumon naton?”

²⁵Ki Musa nosambayangdon kon i TUHAN, bo ki TUHAN nopoontongdon in kayu toputoḷ kon inia. Kayu tatua pinogambat i Musa kon bonu in tubig tatua, bo tubig tatua in nobaḻídon nopira in nanamnea, dá motaaudon inumon. Kon tampat tatua ki TUHAN nobogoi in atorang mita kon i monia, bo kon tua doman Sia nonungkuḷ kon i monia.

²⁶Guman i TUHAN, “Totu-totuudon dudui kon i-Nakó, bo aidaidon in onu inta ontongon-Ku mopia; duduiaidon in bayongan parenta-Ku. Aka aidan monimu intua, yo moiko in diábí hukumon-Ku poumáan in takit ná inta pinouma-Ku kon intau mita in Mesir. Akuoibí in ki TUHAN inta nonompia kon i monimu.”

²⁷Nopaḷut mako kon tua mosia nodapotdon in tampat inta tangoinea Elim. Kon tua oyúon in bokaká mopuḷú bodoyowá takin pitu nopuḷú in pangkoi in kurma. Mosia in nogaid kon ḷoḷaigan kon diug in tubig tatua.