Read Mongondow IḶUAIAN 16 Bible Online

IḶUAIAN 16 - Mongondow bible

IḶUAIAN 16

¹Bo bayongan intau Israel nobuat nongkon Elim, bo kon tanggal mopuḷú bo ḻima buḷan nogindua naonda in mosia nonaḷámai kon Mesir, nodapotdon in mosia kon padang gurun Sin, kon sigad in Elim bo Buḷud in Sinai.

²Kon padang gurun tatua nongunsingogdon in mosia komintan kon i Musa bo kon i Harun.

³Guman monia, “Maníka bo kami minatoidon iḻimod i TUHAN kon Mesir. Kon tua in kami moikaa-kaanbí doman kon ponoyá bo roti dapot in mobotug. Táe moiko ain nodia kon inami namangoi in naa sinbá kami komintan matoi in gogoy.”

⁴Ki TUHAN noguman kon i Musa, “Tanaa in poponag-Kudon in kaanon inta mobarong totok ná uyan sin kaanon monimu komintan. Pomuḷoi in singgai moiko in musti mosipun kon kaanon tatua inta tugat kaanon tosinggai. Natuata in pononungkuḷ-Ku kon umat-Ku sinbá kotaauan-Ku mongo motoindudui in mosia kon parenta-Ku andeka diá.

⁵Kon singgai inggonomnea musti in mosia mosipun kon kaanon tatua kodua ná inta muna in kobayongnea.”

⁶Dá ki Musa bo ki Harun nogumandon kon bayongan intau mita Israel, “Ḷoḷabungnea naa kotaauandon monimu kon ki TUHANbí tua inta nodia kon i monimu iḻumuai nongkon Mesir.

⁷Ikoḷom doḷo-doḷom moiko in mokoontongdon kon sindar koangoian i TUHAN. Dinongogdon i TUHAN kon moiko sinumorú kon i-Nia; Oo kon i TUHAN, sin kami naa i tongábí nogaid kon onu in pinarenta-Nea.

⁸Ki TUHAN mobogoi kon i monimu in ponoyá kon dodai in ḷoḷabungnea, bo roti kon dodai in doḷo-doḷom modapot in moiko mobotug, sin ain dinongog i TUHAN kon moiko in sinumorú kon i-Nia. Totuubí kon aka moiko tumorú kon inami, yo moiko in naondabí bo sinumorú kon i TUHAN.”

⁹Onda intua ki Musa noguman kon i Harun, “Potabádon in mosia komintan mamangoi kon tayowon i TUHAN, sin dinongog-Neadon in tosingogon monia.”

¹⁰Koyogotpa in ki Harun nosingog kon i monia komintan, mosia nobobui kon padang gurun bo daḻídon inontong in sindar i TUHAN kon bonu in goḷom.

¹¹Guman i TUHAN kon i Musa,

¹²“Akuoi ain nokodongog kon gomong-gomot in intau Israel. Pogumandon kon i monia: kon ḷoḷabungnea mosia in mokaanbí kon ponoyá, bo doḷo-doḷom mosia mokaan kon roti modapot in mobotug. Dá kotaauandon monia kon Akuoibí in ki TUHAN, ki Allah monia.”

¹³Onda in ḷoḷabungnea namangoidon in ḷagapan mita pepekow inta mobarong totok dapot in nokooḻingoidon kon pinonḷoḷaigan monia tatua, bo onda in doḷo-doḷom noḷabúdon in oḷú kon ḻibumai in pinonḷoḷaigan.

¹⁴Naonda in oḷú tatua ginumabut, kinoontongandon kon padang gurun barang tobatú inta monipit naonda bo unap inta moaḷus naonda bo oḷú inta kinumontoidon.

¹⁵Naonda intau Israel nokoontong kon tua, diá kinotaauan monia mongo onu intua. Dá nosiḻibóandon in mosia, “Onu intua?” Bo ki Musa in noguman kon i monia, “Tuata in kaanon inta inogoi i TUHAN kon i monimu.

¹⁶Ki TUHAN nomarenta sinbá komintan intau mosipun kon inta tugat pakéonnea, batúan in tombonu in baḷoi tododoyowa noliter.”

¹⁷Intau Israel nomia kon natua; táe oyúon doman in nosipun noiḻiu kon doyowa noliter in intau tobatú bo oyúon doman in diá tugat doyowa noliter.

¹⁸Naonda in inukur monia, noniatamai intau inta nosipun kon nobayong, diábí doman noiḻiu, bo intau inta nosipun kon noyakag, diábí doman inta kinodaitan. Komintan intau nosipunbí kon kobayong inta paraḷuon monia pakéon.

¹⁹Ki Musa in noguman kon i monia, “Ki inekabí diábí motaau motagú kon kaanon tatua tongákabí topiḻik sin kaanon mopoikoḷomai kon singgai.”

²⁰Táe tongonumai kon sigad monia tua diá mopandungmai kon tosingogon i Musa tatua. Mosia in notagú doman kon tosilai nongkon kaanon tatua. Nopoikoḷomai kon singgai inindoianmai kaanon tatua inuḷodon bo nobongkog domandon; dá ki Musa in sinumorú kon i monia.

²¹Pomuḷoi in doḷo-doḷom mosia in mosipun kon kaanon tatua kobayong inta paraḷuon monia, bo aka mopatúdon in singgai dá kiagat in kaanon inta kon butá ḷumoḷayatdon.

²²Kon singgai inggonomnea nosipun in mosia kon kaanon kodua in kobayongnea ná inta singgai biasamai, opat noliter in kon intau tobatú. Bayongan itoi monia namangoi bo nopotaau intua kon i Musa.

²³Guman i Musa kon i monia, “Naa in parenta i TUHAN: Ikoḷom in singgai husus pogogaian, singgai in Sabat, singgai inta posumbaan kon i TUHAN. Onu in koibog monimu angagon singgai naa, yo angagdon, bo onu inta koibog monimu tuonon, yo tuondon. Inta moiḻiu kon pakéon singgai naa, yo potontanídon bo tagúdon sin pakéon ikoḷom.”

²⁴Dá kaanon inta noiḻiu tatua sinagú monia sin kaanon ikoḷom ná inta ain pinoguman i Musa; kaanon tatua diábí nobongkog bo diábí doman inuḷod.

²⁵Ki Musa noguman, “Naadon in kaanonmu kon singgai naa, sin singgai naa singgai in Sabat, singgai pogogaian sin mohoromat kon i TUHAN, bo moiko in diábí mokouḻí kon topiḻikmai in kaanon tatua kon ḷuai in ḷoḷaigan.

²⁶Onom nosinggai koonggotnea moiko musti mosipun kon kaanon, táe kon singgai inta noginpitu tua in singgaibí pogogaian, bo diábí in kaanon in moḷabú kon singgai tatua.”

²⁷Kon singgai noginpitu tongonumai intau Israel minayá sin mosipun kon kaanon, táe diábí in nouḻí monia.

²⁸Bo ki TUHAN noguman kon i Musa, “Dapotpa in toonu moiko doí mokidongog kon parenta-Ku mita?

²⁹Pokotoropdon, kon ogoi-Kubí kon i monimu in singgai tobatú sin pogogaian. Tuamai kon singgai noginggonom Akuoi nobogoi in kaanon inta tugat kaanon monimu doyowa nosinggai. Kon singgai noginpitu komintan intau musti mogutun mako kon baḷoi, bo diá motaau ḷumuai.”

³⁰Tuamai kon singgai noginpitu mosia diá mogaid.

³¹Kaanon tatua in sinangoian manna[15] pinonangoi in intau Israel. Batangannea in naonda bo batoḷ mita mongointok bo nongobudó, nanamnea in naonda bo kukis inta binauian in biluk.

³²Ki Musa in noguman, “Ki TUHAN noguman kon i naton kon doyowa noliter in manna sin tagúon kon buí naton, sinbá mosia mokoontong doman kon kaanon inta inogoi TUHAN kon i naton kon tungkuḷ in kita kon padang gurun, kon tungkuḷ in kita dinia-Nea iḻumuai nongkon Mesir.”

³³Ki Musa noguman kon i Harun, “Gamádon in kuyon tobatú, bo bonuaidon in manna doyowa noliter bo poukatdon kon tayowon i TUHAN sin tagúon kon buí naton.”

³⁴Dá ki Harun nogukat kon kuyon tatua kon tayowon Poti Dodandian sin tagúon podudui kon parenta i TUHAN kon i Musa.

³⁵Manna tatua nobaḻí kaanon intau Israel kon bonu in opat nopuḷú notaong noiduduimai, nodapot in mosia noyaput kon Kanaan, tampat tobatú inta pinogutunan monia notantú. (

³⁶Ukuran barang inta biasamai pakéon intau tungkuḷ intua, bonunea doyowa nopuḷú noliter.)