Read Mongondow IḶUAIAN 18 Bible Online

IḶUAIAN 18 - Mongondow bible

IḶUAIAN 18

¹Ki Yitro, ki nunuton i Musa, imang kon Midian, nokodongogdon kon bayongan inta inaidan i Allah kon i Musa bo kon bangusa Israel, kon tungkuḷ in sia nodia kon i monia iḻumuai nongkon Mesir.

²Dá minayádon in ki Yitro nokipodungkuḷ kon i Musa, dinianea in ki Zipora, ki buḷoi Musa inta nogutunpa kon Midian,

³takin doman ki Gersom[19] bo ki Eleazer, ki adínea ḷoḷaki doyowa. Adí guya-guyang sinangoiannea ki Gersom sin ki Musa noguman, “Akuoi intau ango-angoi kon butá intau”.

⁴adí nogindua sinangoian ki Eleazer[20] sin ki Musa noguman, “Ki Allah inta sinumba in mogoguyangku ain notuḷung bo noposaḷamat kon inakó nodapot in akuoi diá iḻimod i datu in Mesir”.

⁵Ki Yitro namangoi noyotakin i buḷoi Musa bo ki adínea doyowa minayá in padang gurun kon tampat pinonḷoḷaigan i Musa kon diug in buḷud motusi.

⁶Pinohabardon kon i Musa kon noiangoi in mosia,

⁷dá iḷumuaidon in sia nonontomu kon i monia. Sia in sinumungkud kon tayowon i Yitro bo poḷat nongayok kon inia. Nosiḻibóandon in mosia mongo nosehat, bo sinumuot domandon in mosia kon ḷoḷaigan i Musa.

⁸Inouman i Musa kon i nunutonnea in bayongan inta inaidan i TUHAN kon i datu bo kon bangusa Mesir sin moposaḷamat kon bangusa Israel. Inoumannea doman in bayongan roriga inta kinoyitakan in bangusa Israel kon binayáan, bo naonda in ki TUHAN noposaḷamat kon i monia.

⁹Nokodongogmai kon tua mita, nosanang totok in gina i Yitro

¹⁰bo noguman in sia, “Dinayo-dayowdon in ki TUHAN inta noposaḷamat kon i monimu nongkon kawasa i datu bo in bangusa Mesir! Dinayo-dayowdon in ki TUHAN inta nopoḷuatdon kon bangusa Israel nongkon pinononggataan!

¹¹Naa in kinotaauankudon kon ki TUHANbí in mokawa-kawasa nongkon bayongan ilah, sin tua komintan inaidan-Nea kon dodai intau in Mesir dinumodiadon totok kon intau mita Israel.”

¹²Onda intua ki Yitro nodia kon tongonumai in kuruban sinubá bo kuruban inta iratá nobaḻí sosumba kon i Allah. Ki Harun bo bayongan itoi in bangusa Israel namangoi bo nongaan noyotakin i Yitro kon bonu in kawasa i Allah.

¹³Nopoikoḷomai kon singgai ki Musa nopoyotutui in rogenggeng kon sigad in intau Israel. Oaidan tatua pinangkoi kon doḷo-doḷom dapot in nodoḷom.

¹⁴Naonda in ki Yitro nokoontong kon bayongan inta musti aidan i Musa, noḻibó in sia, “Onu mako in musti aidanmu kon sigad in bangusa tanaa? Eta musti iko doman tontaní in mogaid kon tua mita, modapot in tongáka mopoigum in tonggina yo intau mita in mustibí simindogpa mako kon naa bo mogoḷat nongkon doḷo-doḷom dapot in doḷom?”

¹⁵Ki Musa in notubag, “Intau mita tatua mamangoi kon inakó sin moḻibó mongo onu in kinoibog i Allah.

¹⁶Aka mosia moyogintaḷá, mosia mamangoi in kon inakó sinbá momaḷut kon pelekara monia, bo potaauku kon i monia in parenta bo hukum mita i Allah.”

¹⁷Guman i Yitro, “Diábí mopia in natua.

¹⁸Pogogaidmu natua totokdon in mokoḷopí kon inimu tontaní bo kon intau mita tatua. Oaidan tatua totok mobarong aka tongá tobatú in mogaid.

¹⁹Indongogaipa in singogku naa, bo tuḷunganbí i Allah in iko. Totuubí doman kon mopiabí aka iko mobaḻí toḻiu in bangusa tanaa kon tayowon i Allah bo modia kon yagi-yagi inta mokorogenggeng kon umat bo potaau kon i-Nia.

²⁰Musti tundúonmu in parenta mita i Allah kon i monia bo insilangan naonda in kobobiag inta mopia bo onu in musti pomiaan monia.

²¹Táe kon ḻikud intua iko mustibí momiḻí kon tongonumai intau ḷoḷaki inta mobijaksana, bo momiḻí kon i monia mobaḻí itoi kon intau toribu, itoi kon intau mogatut, itoi kon intau ḻima nopuḷú, bo itoi kon intau mopuḷú. Mosia tua in mustibí intau inta motoguondok bo motoindudui kon i Allah, motaau pirisayaan bo doí mogabat kon doit inta poguboḻi kon pelekara.

²²Bo mosia in mobaḻídon hakim kon bangusa tanaa, mobaḻí hakim in mosia kon paanan monia tontaní. Oaidan tatua in musti aidan monia kotompiaan. Pelekara mita inta moponting motaau potaau monia kon inimu, táe aka yogogintaḷaan mita mongogaan motaaupabí tongá paḷuton monia tontaní. Natua sinbá mogaandon in oaidanmu sin mosia in moduḷudon mogaid kon oaidanmu mita.

²³Aka natua in aidanmu, bo tua in pinoki aid i Allah kon inimu, yo iko in mokotongodon in mogaid kon oaidanmu, bo bayongan intau mobui takin pia in gina sin yotaḷá monia ḷagidon pinaḷut.”

²⁴Ki Musa in dinumudui kon tonggina i Yitro,

²⁵bo sia in nomiḻídon kon tongonumai intau mita mobijaksana kon sigad in bangusa Israel. Sinundúnea in mosia nobaḻí itoi kon paanan intau toribu, itoi kon intau mogatut, itoi kon intau ḻima nopuḷú, bo itoi kon intau mopuḷú.

²⁶Mosia nopobayá in oaidan monia mobaḻí hakim mita kon bangusa Israel. Aka pelekara mita inta moponting dá tua in diaan monia kon i Musa, táe aka tongá yogogintaḷaan mita inta mogaan paḷutondon monia tontaní.

²⁷Noiduduimai kon tua inogoidon i Musa in ki Yitro minayá bo ki Yitro in nobuidon kon butánea.