Read Mongondow IḶUAIAN 19 Bible Online

IḶUAIAN 19 - Mongondow bible

IḶUAIAN 19

¹Nopaḷut mako kon tua bangusa Israel nonaḷámai kon Rapidim, bo kon tanggal tobatú buḷan nogintoḷu naonda in mosia nonaḷámai kon Mesir, nodapotdon in mosia kon padang gurun Sinai. Mosia in nononḷoḷaigan kon sioḷmai in Buḷud Sinai,

³bo ki Musa in notakod kon buḷud tatua sin moyodungkuḷ i Allah. Ki TUHAN nosingog kon i Musa nongkon buḷud tatua bo nopotabá kon inia nopotaau kon intau mita Israel, buí i Yakub,

⁴“Moiko ain nokoontong kon onu inta inaidan-Ku kon intau in Mesir, bo kon dodai in Akuoi nodia kon i monimu namangoi kon i-Nakó kon tampat tanaa takin kawasa inta moḷoben, naonda bo ḷagapan nodia kon i adínea kon ḻimonik in koḻikipnea.

⁵Tanaa aka moiko motoindudui kon i-Nakó bo tumoḷutui kon dodandian-Ku, moiko in baḻíon-Ku umat-Ku tontaní. Bayongan in butá tanaa Akuoi in kitogi, táe moiko in baḻíon-Kudon umat-ku inta kotabi-Ku,

⁶bo sinondí-Ku kon i-Nakó tontaní, bo moiko in mobantung kon i-Nakó mobaḻí imang mita.”

⁷Dá noponagdon in ki Musa bo nogoiní kon itoi mita sinbá moyosipun, bodongka inoumannea kon i monia in bayongan inta pinarenta i TUHAN kon inia.

⁸Mosia komintan in notubag noyododai, “Kami in moibogbí mogaid kon bayongan inta pinoguman i TUHAN,” bo tubag monia tatua pinoyaput i Musa kon i TUHAN. Bo ki TUHAN noguman kon i Musa, “Akuoi in mamangoi kon inimu táe moibuni kon bonu in goḷom inta mobunod; intau mita in mokodongogbí kon onu in poguman-Ku kon inimu, bo pinangkoi kon singgai tatua umurandon in mosia mopirisaya kon inimu.

¹⁰Naa in bayádon pokipodungkuḷai in intau mita tatua, bo potabádon in mosia singgai naa bo ikoḷom mosadia sin moibada. Mosia in musti momatá kon pakeang monia.

¹¹Toumá mosia in musti nosadiadon. Kon singgai tatua Akuoi in moponagdon kon tudu in Buḷud Sinai, kon tampat inta motaau poindoian in intau mita kon i-Nakó.

¹²Pogaidon kon tomponuot kon ḻibu in buḷud tanaa mobaḻí tomboinig inta diá motaau taḻiban in bangusa tatua. Imaḷowaidon in bangusa tanaa in motakod kon buḷud, modapot in dimiug. Ki ine in tumaḻibdon kon sigadnea, yo hukumon matoi;

¹³intau tatua in mustibí ara bo in batu ande pioton, bo diábí motaau ḻiaion. Naa in popoḷabú kon intau ande kon mahaḷuk; bayongan inta ḻimimpat kon sigad tatua in musti hukumon matoi. Kon dodai in kodongogandon in singog in torompet moḷanggó, intau mita tatua musti motakod kon buḷud.”

¹⁴Onda intua ki Musa noponag nongkon buḷud bo nopotabá kon intau mita moposadia sin moibada. Gumannea, “Toumá moiko in musti nosadia, bo tanaa mako moiko in diápa motaau mosiug moyotakin.” Bo bangusa tatua nomangkoidon noposadia bo nomatá kon pakeang monia.

¹⁶Kon singgai inta nogintoḷu, dodai in doḷo-doḷomneapa nonggotup bo nongilat. Goḷom inta mobunod noitukatdon kon tudu in buḷud bo kinodongogandon singog in torompet inta totok in moḷangon. Bayongan in intau kon ḷoḷaigan urot mako sin moondok.

¹⁷Bo ki Musa in nodia kon i monia iḻumuai sin moyodungkuḷ i Allah, bo mosia in sinimindog kon pangkoi in buḷud tatua.

¹⁸Buḷud in Sinai tatua komintandon kinokoḷoban in poyok, sin ki TUHAN noponag kon tudunea kon bonu in tuḷú. Poyok tatua nodondon naonda bo poyok pinonuruban, bo bayongan buḷud nodandú totok in noropot.

¹⁹Singog in torompet koḷangon-koḷangon totok. Ki Musa nosingog, bo ki Allah in notubag kon inia takin gotup.

²⁰Ki TUHAN noponag kon tudu in Buḷud Sinai, bo nogoiní kon i Musa sin mamangoi kon tudu in buḷud tatua. Dá notakod in ki Musa,

²¹bo ki TUHAN noguman kon inia, “Posiḻigdon bo potoropdon kon intau mita tatua kon mosia in diábí motaau ḻimimpat kon tomboinig sin mamangoi moindoi kon i-Nakó. Aka mosia ḻimimpat doman, yo mobarong in kon sigad monia tua in matoi.

²²Nodapot in imang mita inta moibog dimiug kon i-Nakó, musti mondarit kon awak; aka diá, yo mosia in hukumon-Ku.”

²³Guman i Musa kon i TUHAN, “Intau mita tatua in diábí mokotakod, sin Iko in nomarentadon kon inami kon momaḻí kon buḷud tanaa mobaḻí tampat inta motusi bo monaridi kon tomboinig inta kon ḻibunea mita.”

²⁴Tubag i TUHAN, “Posiḻigdon, bo buidon angoi in naa takin ki Harun. Táe imang mita bo rayat mita in diábí motaau in ḻimimpat kon tomboinig sin mamangoi kon i-Nakó. Aka mosia ḻimimpat, yo hukumon-Ku in mosia.”

²⁵Bo nosiḻigdon in ki Musa poḷat nokipodungkuḷ kon bangusa tatua bo pinotaauneadon in koyow i TUHAN kon i monia.