Read Mongondow IḶUAIAN 21 Bible Online

IḶUAIAN 21 - Mongondow bible

IḶUAIAN 21

¹Bo ki TUHAN noguman kon i Musa, “Potaaudon kon intau Israel in atorang mita tanaa:

²Aka moiko motaḷui kon ata tobatú inta nongkon bangusamu tontaní, dá mustibí in sia mogaid kon inimu onom notaong in koonggotnea. Kon taong nogimpitu musti ogoimudon in sia ḷumuai mobaḻí intau inta noiḷuatdon kon oaidannea bo diá bidon paraḷu in sia moguboḻi kon onu bo onu.

³Aka sia bo diápa kobuḷoi kon dodai in nobaḻí atamu, dá ki buḷoinea in diábí motaau tumakin kon dodai in sia ḷumuai. Táe aka sia ain kobuḷoi kon dodai in sia nobaḻí atamu, dá ki buḷoinea in motaaubí tumakin kon inia.

⁴Aka ki tuangnea in nopotonibuḷoi kon inia takin bobay tobatú, bo nokouḻí kon adí in sia, dá ki buḷoi bo ki adínea tatua in nobaḻíbí ki adí i tuangnea, bo diábí motaau tumakin kon ata tatua kon dodai in sia iḷuatandon kon oaidannea.

⁵Táe aka ata tatua moguman kon sia in motabi kon i buḷoinea, kon i adínea mita bo kon i tuangnea, bo doí domandon ḷuaton kon oaidannea,

⁶dá ki tuangnea in mustidon modia kon inia kon tampat pooibadaan. Kon tua ata tatua pokisindogan bo umandoḷ kon ngara ande kon oigi in ḷoḻingkop tampat pooibadaan, bo ki tuangnea in musti momubú kon bongoḷannea, bo sia in mobaḻídon atanea modapot in sia matoi.

⁷Aka bobay Ibrani tobatú pinotaḷui amánea binaḻí ata, yo bobay tatua in diábí ḷuatan kon oaidannea naonda in motompodon onom notaong, noyoposibí in ata ḷoḷaki.

⁸Aka bobay tatua diá nokosanang kon gina i tuangnea inta moniat mononibuḷoi kon inia, dá sia in mustibí potaḷui bui kon guyanganea. Bobay tatua in diábí motaau potaḷui kon intau inta bangusa ibanea, sin sia ain pinomia ibo-ibog i tuangnea inta diá nogintompod kon dandinea.

⁹Aka intau tobatú motaḷui kon ata bobay sin baḻíon ki buḷoi i adínea, yo ata tatua in mustibí pomiaan naonda bo ki adínea tontaní.

¹⁰Aka adí ḷoḷaki tatua bui mobuḷoi, sia in mustibí monoguoyá mobogoi in kaanon bo pakeang bo bayongan hak ná biasa kon i buḷoinea inta muna.

¹¹Aka diá in sia monoguoyá natua, yo mustineabí ḷuatan in ki buḷoinea tatua bo diábí mokitobut.”

¹²“Ki ine in momongkug kon intau ibanea modapot in matoi, yo mustibí hukumon matoi in sia.

¹³Tongá aka sia bo nomongkug táe diábí in makusud moḻimod, dá sia in motaaubí moḷagui mayá in tampat inta bain tundúon-Ku kon inimu, bo kon tua sia mokouḻí kon tampat pogadopan.

¹⁴Táe aka intau tatua dinapat in gina butá bo sinumuodbí noḻimod kon intau ibanea, nopaḷut mako kon tua bo noḷagui minayá in mezbah-Ku sinbá mokouḻí kon poniungan, yo intau tatua musti poḷuaion nongkon mezbah tatua bo hukumon matoi.

¹⁵Ki ine in momongkug kon i amá ande kon i inánea musti hukumon matoi.

¹⁶Ki ine in monangag kon intau tobatú, musti hukumon matoi, pinomayá intau tatua ain pinotaḷuinea ande kon baḷoineapa.

¹⁷Ki ine in mogodi-godimai kon i amá ande kon i inánea, musti hukumon matoi.

¹⁸Aka oyúon intau noropatoi bo tobatú in nopomongkug in batu ande nongoyungkum, táe diábí dapot in minatoi, yo sia in diábí hukumon matoi. Aka intau inta binongkug tatua diápa mokobangon popisí in pinomongkugan tatua,

¹⁹táe noiduduimai kon tua sia nokobangondon bo nokobayádon bui táe nonungkudpa, dá intau inta nomongkug kon inia tua in mustibí monompia kon inia dapot in mopia bo monoḻiu kon karugiannea kon tungkuḷ in sia notakit.

²⁰Ki ine in momongkug kon atanea ḷoḷaki ande bobay nodapot in ata tatua bayá-bayá minatoi, yo musti hukumon.

²¹Táe aka ata tatua diá minatoi kon bonu in tosinggai ande doyowa nosinggai, yo ki tuangnea tua in diábí hukumon. Karugian inta kinorasaannea popisí in kinobuḻiandon in atanea, tuata in nobaḻí hukuman kon inia.

²²Aka tongonumai intau noropatoi, bo tobatú kon sigad monia tua noiruki kon tobatú bobay inta sidia nodapot in bobay tatua kinoukaian, táe diábí nodia kon inia dapot in minatoi, dá intau inta nokoruki tatua musti moguboḻi kon bobogoi podudui kon inta sinuntut i buḷoinea ḷoḷaki bo inta pinaḷut i hakim.

²³Táe aka bobay tatua nobodito dapot in minatoi, dá hukumannea in nyawaneabí doman,

²⁴mata toḻiunea in mata doman, ingipon toḻiunea in ingipon doman, ḻima toḻiuan in ḻima doman, sioḷ toḻiuan in sioḷ doman,

²⁵kekeb toḻiuan in kekeb doman, kekeb nopokak toḻiuan in kekeb nopokak doman, bobagá toḻiuan in bobagá doman.

²⁶Ki ine in nomongkug kon mata in atanea nodapot in nobilog, musti in sia poḷuatonneadon in atanea tatua kon oaidannea mobaḻí tontobut kon matanea.

²⁷Aka sia noruki kon atanea dapot in noḷabú ingiponnea, yo ata tatua musti poḷuatonneadon kon oaidannea mobaḻí tontobut in ingiponnea tatua.”

²⁸“Aka sapi koḷakian tobatú nonungoi kon intau tobatú dapot in minatoi, yo sapi tatua in mustibí ara bo in batu dapot in matoi, bo tapúnea in diábí motaau kaanon, táe kitogi sapi tatua in diábí hukumon.

²⁹Aka sapi koḷakian tatua moimbuḷoidon monungoi, bo kitoginea ain inogoian tompoingat, táe diá doman noḷukad kon sapi tatua, bo aka sapi koḷakian tatua nonungoi domandon bui kon intau tobatú dapot in minatoi, dá sapi tatua ara bo in batu dapot in matoi, ná doman tua in kitoginea musti doman hukumon matoi.

³⁰Táe aka kitogi sapi tatua pinoki tobutan, yo sia in mustibí mobogoi kon tongonukabí in kobayong inta pinoigum sin potobut kon nyawanea.

³¹Aka inta sinungoinea dapot in minatoi tatua tobatú ḷoḷaki ande bobay, yo atorang tatua in pakéonbí doman.

³²Táe aka inta sinungoinea dapot in minatoi tatua bo ata ḷoḷaki tobatú ande bobay, yo kitogi sapi tatua musti mobogoi in doit tontobut toḷu nopuḷú in doit saḷaka kon i togi ata tatua, bo sapi koḷakian tatua musti ara bo in batu dapot in matoi.

³³Ki ine in nonginggamá kon taḷob in parigí tobatú ande nongaḻi kon parigí bo diá bui sinaḷoban, bo sapi koḷakian tobatú ande keledai noḷabú kon bonunea,

³⁴yo kitogi parigí tatua musti monoḻiu kon karugian i togi biag tatua, táe sia in motaaubí mogamá kon biag inta ain minatoi tatua bo kon iniadon.

³⁵Aka sapi koḷakian in intau tobatú noḻimod kon sapi koḷakian intau ibanea, yo kitogi sapi doyowa tatua musti mopotaḷui in sapi inta nobiagpa tatua bo boḻinea silaion nayadua. Bo musti doman silaion monia tapú in sapi inta ain minatoi tatua.

³⁶Táe aka ain kinotaauan kon sapi koḷakian tatua noimbuḷoidon monungoi, bo diá iḷukadan i toginea kinopia, yo mustineabí toḻiuan in sapi koḷakian inta nobiagpa doman, bo sapi inta ain minatoi tatua in motaaunea bidon gamáan.”