Read Mongondow IḶUAIAN 22 Bible Online

IḶUAIAN 22 - Mongondow bible

IḶUAIAN 22

¹“Ki ine in monakow kon sapi tobatú ande domba bo moratá ande mopotaḷui intua, yo mustibí in sia monoḻiu, aka sapi tobatú yo musti toḻiuannea in sapi ḻima bo aka domba tobatú yo musti toḻiuan in domba opat.

²Sia in musti monoḻiu kon bayongan inta ain sinakownea tatua. Aka sia diá koonu bo onu, yo sia tontaní in potaḷui mobaḻí ata sin ponoḻiu kon barang inta ain sinakownea tatua. Aka sinakownea tatua bo sapi, keledai ande domba, bo ain nouḻí kon intau tatua kobia-biagpa, yo mustibí in sia monoḻiu kon batúan bobiagon tatua tobatú toḻiuan in doyowa. Aka kon wakutu in doḷom bo mononakow tobatú kinodomokan kon tobatú baḷoi, bo sia in kinoḻimodan, yo intau inta noḻimod kon inia tua in diábí kotaḷá. Táe aka tua bo nobaḻí singgai, yo intau inta noḻimod tua iniapbí kotaḷá.

⁵Ki ine in nopomayá mako in bobiagonnea kon gobánea ande gobá in anggurnea, bo noiduduimai kon tua biagnea tatua minayá in gobá intau ibanea bo nokaan kon pinomuḷa intau ibanea,[21] dá kitogi gobá tatua musti moguboḻi kon karugian tatua takin bungai in boyó in gobánea inta totok in mopia nongkon gobánea ande gobá in anggurnea tontaní.

⁶Ki ine in momiag kon tuḷú kon gobánea tontaní bo tuḷú tatua iḷumekep kon gobá intau ibanea bo nomokak kon bayongan gandum inta koyogot mobiag ande pangkoi mita in gandum inta bagupa iratab, dá intau inta nomiag kon tuḷú tatua musti moguboḻi kon karugian tatua.

⁷Aka oyúon in intau tobatú nokitagú in doitnea andeka barang koboḻi kon yobayatnea. Táe kon singgai noiduduimai barang tatua sinakowdon in intau kon baḷoinea. Aka intau inta nonakow tatua kino umaan, dá mustibí intau inta nonakow tatua moguboḻi kodua ná kobayong in doit tatua ande barang tua.

⁸Táe aka intau inta nonakow tatua diá nouḻí, dá intau inta pinotagúan kon doit ande barang tatua in musti diaan kon tampat pooibadaan, bo kon tua sia musti mongibot kon sia in diábí nonakow kon barang inta pinoki tagú kon inia.

⁹Kon bayongan in yogogintaḷaan soaḷ kapunyaan, pinomayá sapi, keledai, domba, pakeang ande onuka in nobuḻi bo bui nouḻí, intau mita inta mongaku kitogi musti diaan kon tampat pooibadaan. Intau inta pinoniata i Allah mobaḻí intau inta kotaḷá, musti moguboḻi kon itoginea kodua ná inta nobuḻi.

¹⁰Aka intau tobatú nomiag kon keledai, sapi, domba ande bobiagon ibanea inta yobayatnea in kitogi. Onda intua bobiagon tatua minatoi, pinaḻían ande inagow in musung, bo diá intau ibanea in nokoontong kon tua.

¹¹Dá kon soaḷ natua sia musti mayá in tampat pooibadaan bo mongibot podoyon kon tangoi i TUHAN kon sia in diábí nonakow kon bobiagon inta ain pinoki ḷukad kon inia. Aka sia bo totuubí diá nonakow, dá kitogineadon in musti motanggung kon karugian tatua, bo intau inta noḷukad tatua in diábí moguboḻi kon karugian tatua.

¹²Aka bobiagon tatua sinakow in intau ibanea, dá intau inta nomiag tatua musti moguboḻi kon karugian i togi bobiagon tatua.

¹³Aka bobiagon tatua dinomok in mahaḷuk ibanea, yo intau inta nomiag tatua mustibí mopoontong in tuḷannea mita mobaḻí bukti kon i toginea, bo sia in diábí moguboḻi kon karugian kon i togi bobiagon tatua.

¹⁴Aka intau tobatú noḷuan kon bobiagon tobatú bo bobiagon tatua pinaḻían ande minatoi kon dodai in kitoginea diá in kon tampat kinobaḻian tatua, dá intau inta noḷuan tatua mustibí moguboḻi kon karugian tatua.

¹⁵Táe aka tua bo nobaḻí koonto-ontong i toginea, dá intau inta noḷuan tatua in diábí paraḷu moguboḻi kon karugian tatua. Aka bobiagon tatua bo bobiagon sinondanan, yo karugiannea in noyopuḻidon in tondannea.”

¹⁶“Ki ine in monongganut kon mongodeaga tobatú inta diápa kinantangan sin mosiug moyotakinnea, yo sia in mustibí moguboḻi kon oadatan inta pinoigum in guranga in bobay bo mustibí in sia mononibuḷoi kon bobay tatua.

¹⁷Táe aka ki amánea diá mobogoi kon ḷoḷaki tatua motonibuḷoi takin i adínea, yo ḷoḷaki tatua mustibí moguboḻi kon i amá in bobay tatua inta kobayongnea podudui in oadatan aka mongodeagapa inta diápa dodai onda in pinobuḷoi.

¹⁸Bayongan bobay inta mongonggaing musti ḻimodon.

¹⁹Intau inta mongibog kon mahaḷuk musti ḻimodon.

²⁰Ki ine in moposumba in kuruban kon inta ilah mita ibanea mako koḻikud in kon i-Nakó, inta TUHAN, yo musti hukumon matoi.

²¹Donaaibí mondorot ande mopoaid in diá moadil kon intau ango-angoi; pokoingatdon kon moiko nion in koḻipod in intaubí doman tongá ango-angoi kon Mesir.

²²Donaai mopomia ibog-ibog kon i monia inta dongkadon boba-bobay bo adí mita inta uno-unon.

²³Aka moiko momia kon moraat kon i monia, yo Akuoi, ki TUHAN in mokidongog kon i monia aka mosia mokuani mokituḷung kon i-Nakó.

²⁴Tumorú in Akuoi bo moḻimod kon i monimu kon bonu in parang, modapot in ki buḷoi monimu mita mobaḻídon dongka boba-bobay, bo ki adí monimu in mobaḻídon diá ko amá.

²⁵Aka moiko mopoḷuan in doit kon intau bogá inta kon sigad in bangusa-Ku, yo dikabí naonda bo mononagi kon boḻi inta moigum doman kon kauntungannea.

²⁶Aka moiko mogamá kon jubah intau ibanea mobaḻí jaminan in boḻinea, yo jubah tatua in mustibí pobuion monimu kon dodai mata in singgai diápa tumoyop,

²⁷sin tongábí totobatú tatua in oḻit in awaknea pogoḻingoi kon awak sinbá diá tumonow. Aka diá pobuionmu bui kon inia, yo onupabí in pakéonnea kon wakutu in sia mosiugdon? Aka sia mokuani sin mokituḷung kon i-Nakó, dá indongogan-Kudon in sia sin motabi Akuoi kon inia.

²⁸Dika mogodi-godimai kon i Allah bo kon itoi in bangusamu.

²⁹Kon wakutu inta ain sinantú, pobogoibí in sosumba kon i-Nakó inta nongkon boyó in gandummu, ande in anggurmu bo ḷana in zaitunmu. Posarakaidon kon i-Nakó in ki adí monimu mita ḷoḷaki inta guya-guyang,

³⁰ná doman tua in sapi bo domba koḷakian inta muna pinogadí. Pomayádon mako in mahaḷuk mita tatua takinpa ki inánea kon bonu in pitu nosinggai koonggotnea, bodongka posarakandon kon i-Nakó kon singgai noginwaḷu.

³¹Moiko in umat-Ku, tuamai mahaḷuk onukadon in dinomok in mahaḷuk ibanea inta mokokaan kon tumpaḷa mahaḷuk, yo diábí motaau kaanon monimu in tapúnea; ogoidon intua kon ungkú mita.”