Read Mongondow IḶUAIAN 26 Bible Online

IḶUAIAN 26 - Mongondow bible

IḶUAIAN 26

¹“Pomiadon kon ḷoḷaigan[26] Kon sigad in ḷoḷaigan mopuḷú tatua pomia doman kon i-Nakó in ḷoḷaigan inta nongkon kaeng linen moaḷus tatua, sujion takin kaeng wol nobidu, nokamumu bo nopura. Poposuji doman moyotakin in gambar in kerub.[27]

²Kaeng mita tatua musti pongkóon kotongkaion in ukurannea, kobanatnea mopuḷú bodoyowá nometer bo kooḷadnea in doyowa nometer.

³Ḻima nopongkó in kaeng tatua musti poyotampiton mobaḻí ḻeag tobatú, bo inta ḻima doman ibanea musti pomiaan doman natua.

⁴Pomiaai kon tontoyaud nongkon kaeng nobidu kon bingkí in ḻeag doyowa tatua,

⁵ḻima nopuḷú in tontoyaud kon ḻeag tobatú.

⁶Pomiaai doman kon tongkaud nongkon buḷawan ḻima nopuḷú in kobayongnea sin popoyotondoḷan kon ḻeag doyowa tatua sinbá motaau potobatúon.

⁷Atop in Ḷoḷaigan tatua yo pomiaai kon mopuḷú nopongkó in kaeng nongkon bubuḷ in bembé.

⁸Ukurannea in musti kotongkaion, kobanatnea in mopuḷú botoḷú nometer bo kooḷadnea in doyowa nometer.

⁹Ḻima nopongkó musti poyotampiton baḻíon ḻeag tobatú, bo onom nopongkó ibanea in musti pomiaan doman natua. Tondoḷnea inta noginggonom musti kopíon doyowa sinbá moioḻingoi kon dotá in muna in Ḷoḷaigan.

¹⁰Pakéaidon in tontoyaud ḻima nopuḷú kon bingkí in ḻeag inta dungkuḷ bo tontoyaud inta ḻima nopuḷú kon bingkí in ḻeag inta nogindua.

¹¹Pomiaaidon kon ḻima nopuḷú in tongkaud nongkon porunggu bo pokaud kon tontoyaud tatua sinbá ḻeag doyowa tatua motaau tobatúon mobaḻí atop in Ḷoḷaigan.

¹²Tongosilai in pongkóan kaeng inta ḻiunea tua in pogoḻingoi kon dotá in tumi in Ḷoḷaigan.

¹³Ḻiu in kaeng inta kooḷadnea ḻima nopuḷú nosenti inta kinobobanat in Ḷoḷaigan musti pomayá mako moikoḷob mako kon sí in Ḷoḷaigan tatua.

¹⁴Pomiaai doman kon doyowa in kokoḷob kon dotá in ḷuai in Ḷoḷaigan, tobatú in nongkon kuḻit in domba koḷakian inta binoréan in nopura bo tobatú doman in nongkon kuḻit inta moaḷus.

¹⁵Pomiaai domandon kon tombaḷoi in Ḷoḷaigan tatua inta posindogon kotuḻidon, aidai nongkon kayu akasia.

¹⁶Batúan in tombaḷoi koḷantudnea opat nometer bo kooḷadnea onom nopuḷú bo onom nosenti.

¹⁷Kon batúan in tombaḷoi musti oyúon in patok togogapang, dapot tombaḷoi mita tatua motaau poyotondoḷon tobatú bo tobatú.

¹⁸Kon dotá in toḷatan Ḷoḷaigan, pomiaaidon kon tombaḷoi doyowa nopuḷú,

¹⁹takin opat nopuḷú in aipnea nongkon saḷaka, bo tododoyowa kon batúan ḻimonag in tombaḷoi ponukid kon patoknea doyowa.

²⁰Kon dotá in utuan in Ḷoḷaigan, pomiaaidon kon doyowa nopuḷú in tombaḷoi

²¹takin aipnea opat nopuḷú nongkon saḷaka, tumongo dodoyawa kon batúan in tombaḷoi.

²²Kon dotá in tumi in Ḷoḷaigan dotá in toyopan, pomiaai kon onom in tombaḷoi

²³bo tombaḷoi doyowa kon sikunea mita.

²⁴Tombaḷoi mita in sikunea tatua musti poyotondoḷon nongkon dotá in ḻimonagnea dapot kon ḻimonikannea. Tombaḷoi doyowa inta nopotonsiku kon sikunea tatua musti natua in pomomia.

²⁵Dá nobaḻímai waḷu komintan in koantó in tombaḷoi tatua, bo mopuḷú bo onom in aipnea nongkon saḷaka, tododoyowa in kon ḻimonag in tombaḷoi.

²⁶Pomiaai doman kon mopuḷú bo ḻima in kayu bandainea nongkon kayu akasia, toḷoḻima in kon sí tobatú in Ḷoḷaigan,

²⁷ḻima in kon sínea ibanea, bo ḻima doman in kon sí in Ḷoḷaigan dotá in tumi inta kon dotá in toyopan.

²⁸Kayu bandainea inta kon yuak musti popobandai potombotak in tombaḷoi in koḷantudnea, nongkon popod posipongkó in Ḷoḷaigan tatua.

²⁹Tombaḷoi in Ḷoḷaigan bo kayu mita bandainea tatua musti oḻitan in buḷawan. Ḻingkit mita inta ponahang kon kayu mita tatua musti pomiaan nongkon buḷawan.

³⁰Posindogdon in Ḷoḷaigan tatua podudui in tomayá inta pinoontong-Ku kon inimu kon tudu in buḷud tanaa.

³¹Pomiaaidon kon kaeng toḻipoi in ḷoḻingkop tobatú nongkon kaeng moaḷus inta sinuji takin kaeng wol nobidu, nokamumu bo nopura. Sujidon in kaeng tatua takin gambar in kerub.[28]

³²Pobambé in kaeng toḻipoi in ḷoḻingkop tatua kon oigi opat inta kayu akasia inta inoḻitan in buḷawan takin kokaud buḷawan inta pinoḻitú kon ḻimonik in aip saḷaka inta opat.

³³Bo popobambédon in kaeng tatua kon ḻimonag in pipidan kokaud kon atop in Ḷoḷaigan. Kon tumi musti popoukat in Poti Dodandian inta pinobonuan kon batu inta pinomaisan kon hukum i TUHAN. Kaeng tatua nonigad kon Yuang Motusi nongkon Yuang Totok Motusi.

³⁴Poukat in taḷob in Poti Dodandian tatua kon tudu in poti tatua.

³⁵Meja pogogukatan kon sosumba musti tampaton kon ḷuai in Yuang Totok Motusi kon dotá in utuan, bo sioḷ in pototuduan kon togá in kon dotá in toḷatan kon bonu in Ḷoḷaigan tatua.

³⁶Pomiaaidon kon toḻipoi inta pakéon kon ḷoḻingkop in Ḷoḷaigan, pomia nongkon kaeng moaḷus inta sinuji takin kaeng wol nobidu, nokamumu bo nopura, iḷambáan in borénea mita.

³⁷Kon toḻipoi tatua musti pomiaan kon oigi ḻima nongkon kayu akasia inta inoḻitan in buḷawan bo pinoyoguput doman takin kokaud buḷawan ḻima. Pomiaai doman aip ḻima nongkon porunggu kon batúan in oigi mita tatua.”