Read Mongondow IḶUAIAN 27 Bible Online

IḶUAIAN 27 - Mongondow bible

IḶUAIAN 27

¹“Pomia in mezbah tobatú nongkon kayu akasia. Tonggopaton, kobanat bo kooḷadnea tumpaḷa doyowa nometer bo doyowa nopuḷú nosenti bo koḷantudnea in tometer bo toḷu nopuḷú nosenti.

²Kon sikunea mita kon ḻimonik musti pomiaan kon tungoi mita inta poyotobatúon in mezbah. Musti komintan oḻitan in porunggu.

³Pomiaaidon kon rumping mita, sikop, palo mita, porok bo doḷuong. Komintan touḷut tatua musti pomiaan nongkon porunggu.

⁴Pomiaaidon kon toḷatak nongkon porunggu bo ḷutudai in ḻingkit opat sin popobonuan in kayu pononombuḻigan kon sikunea opat kon dotá in ḻimonagnea.

⁵Koḷantud in toḷatak kawa tatua in musti motombotak kon koḷantud in mezbah. Toḷatak kawa tatua musti pooḻit kon ḻimonag in mezbah.

⁶Pomiaai kon kayu pononombuḻigan doyowa nongkon kayu akasia oḻitan in porunggu,

⁷bo pobonu kon bonu in ḻingkit mita inta kon sí in mezbah posibotak kon dodai in mobuḻig kon mezbah tatua.

⁸Pomiadon in mezbah tatua nongkon dopí bo tongguangai kon dotá in bonunea, podudui in tomayá inta poontong-Ku kon inimu kon buḷud tanaa.”

⁹“Pomiaaidon kon tampat pooibadaan kon ḻibu in Ḷoḷaigan-Ku inta sinondok in ḻeag nongkon kaeng moaḷus. Kon dotá in toḷatan, ḻeag tatua kobanatnea in 44 nometer,

¹⁰pinopotogot kon oigi porunggu doyowa nopuḷú, inta komintan inaipan in porunggu, bo kokaud takin toyoyaudnea nongkon saḷaka.

¹¹Pomia doman in natua kon dotá in utuan.

¹²Kon dotá in toyopan, ḻeag tatua kobanatnea in 22 nometer, takin oigi mopuḷú takin aipnea mopuḷú doman.

¹³Kon dotá in pomukaan, inta sinon ḷoḻingkopan, kobanat in ḻeag tatua in 22 doman nometer.

¹⁴Kon dotá in koḷoigi bo koḷanan musti pakéan in ḻeag, tua komintan kobanatnea onom nometer bo onom nopuḷú nosenti takin oigi toḷu bo toḷu doman in aipnea.

¹⁶Kon ḷoḻingkopnea mustibí oyúon in toḻipoi inta kobanatnea siow nometer, pomiaan nongkon kaeng moaḷus inta sinuji takin kaeng wol nobidu, nokamumu bo nopura, bo iḷambáan in siningkoi norupa-rupamai in batangannea. Kaeng toḻipoi in ḷoḻingkop tatua musti pobambé kon oigi opat bo aipnea in opat doman.

¹⁷Bayonganan oigi inta kon ḻibumai in palas tatua musti poyo-poyotondoḷon momaké in tontoyaud saḷaka; kokaudnea musti pomiaan nongkon saḷaka bo aipnea nongkon porunggu.

¹⁸Ḻeag kon ḻibumai in tampat pooibadaan tatua kobanatnea in 44 nometer, kooḷadnea in 22 nometer bo koḷantudnea in doyowa nometer bo doyowa nopuḷú nosenti. Ḻeag tatua in musti pomiaan nongkon kaeng moaḷus inta aipnea nongkon porunggu.

¹⁹Bayongan touḷut inta pinaké kon bonu in Ḷoḷaigan, patok mita in Ḷoḷaigan bo ḻeagnea musti pomiaan nongkon porunggu.”

²⁰“Pokidiaai intau in Israel in ḷana zaitun totokea bo inta totok in mopia sin ponugung kon togá inta kon bonu in Ḷoḷaigan-Ku sinbá motaaudon poyongkiton bo umuran doman moyongkit.

²¹Ki Harun bo ki adínea mita musti umuran moindoi kon togá tatua nongkon ḷoḷabungnea dapot in doḷo-doḷom kon tampat inta koangoian-Ku, kon ḷuai in kaeng inta noibambé kon tayowon in Poti Dodandian. Parenta tatua in mobaḻí parenta inta mononoi kon intau in Israel bo kon bayongan in buí monia.”