Read Mongondow IḶUAIAN 29 Bible Online

IḶUAIAN 29 - Mongondow bible

IḶUAIAN 29

¹“Nanaa in pododuí kon i Harun bo kon i adínea mita sinbá mosia motaaudon mogaid kon oaidan-Ku mobaḻí imang. Pogamádon kon sapi koḷakian tobatú inta batáneapa bo domba koḷakian doyowa inta totok in moḷunat.

²Pomiadon nongkon topong torigu inta totok in mopia, roti moḻimbung inta diá iragian. Tosilai in musti aidan roti baukan in ḷana zaitun, tosilai doman in diá baukan in ḷana, bo ki agatnea in pomiaan kukis inta ḻepoan in ḷana.

³Bonu intua kon kompé bo posumba intua kon i-Nakó poyotakinon in kuruban sapi koḷakian bo domba koḷakian doyowa.

⁴Potabádon in ki Harun bo ki adínea mita mamangoi kon ngara in Ḷoḷaigan-Ku bo mondarit kon awak.

⁵Ḷutudaidon in pakeang imang in ki Harun: kameja, ḷambung epod, jubah inta moioḻingoi kon ḷambung epod, oḻingoi in dodob bo baan.

⁶Popobogotdon in surubannea tatua bo potomot domandon in ḷambá buḷawan takin pais kinurig ‘Tongá ogoi kon i TUHAN’.

⁷Bo gamádon in ḷana pakéon kon upacara, pobutak intua kon uḷunea bo ḷoḷubuai in ḷana in sia.

⁸Mopaḷut mako kon tua, potabádon mangoi in ki adínea mita bo popoḷutud in kameja

⁹bo baan kon i monia, bo bogot in uḷu popotogot domandon kon uḷu monia. Natuata in pododuí kon i Harun bo kon i adínea mita. Mosia bo buí monia in musti mobantung kon i-Nakó mobaḻí imang inta mononoi.

¹⁰Onda intua sapi koḷakian tatua musti diaanmu kon tayowon in ḷoḷaigan-Ku. Ki Harun bo ki adínea mita musti mopoukat in ḻima monia kon uḷu in biag mita tatua.

¹¹Ratádon in sapi koḷakian tatua kon tayowon-Ku kon ngara in Ḷoḷaigan.

¹²Pogamádon kon dugú in sapi topiḻik tatua bo paké in gongguyamúmu mopoḻepo kon tungoi mita in mezbah tatua. Ki agat in dugú tatua musti pobutakmu kon ḻimonag in mezbah.

¹³Mopaḷut mako kon tua gamádon in bayongan ḷongónea inta noikoḷob kon bonu in siannea, bo inta totok in mopia nongkon podilat bo kombiloinea takin ḷongónea bo ukatdon intua komintan kon tudu in mezbah bo tubádon mobaḻí sosumba kon i-Nakó.

¹⁴Tapú, kuḻit bo kompong in sapi koḷakian tatua musti tubáan kon ḷuai in ḷoḷaigan. Tuata in nobaḻí sosumba potobut kon dosa in imang mita.

¹⁵Moiduduimai kon tua gamádon in domba tobatú nongkon domba koḷakian tatua. Ki Harun bo ki adínea mita musti mopoukat in ḻima monia kon uḷu in biag tatua.

¹⁶Bo ratádon in biag tatua, gamá in dugúnea bo popobutak kon sí opat in mezbah.

¹⁷Domba koḷakian tatua musti yingaton. Bonu in sian bo páanea musti batáan bo ukaton kon ḻimonik in uḷunea bo tapú mita ibanea inta ain pinongko-pongkó.

¹⁸Poposumbadon in bayongan domba koḷakian tatua kon tudu in mezbah mobaḻí kuruban inta sinubá. Rongingi in kuruban tatua mokosanang kon gina-Ku.

¹⁹Gamádon in domba koḷakian inta tobatú, domba inta pinaké kon upacara pinoduían kon imang. Pogumandon kon i Harun sinbá sia takin ki adínea mita mopoukat in ḻima monia kon uḷu in biag tatua.

²⁰Bo ratádon in domba koḷakian tatua, gamá in dugúnea topiḻik bo poḻepodon kon bongoḷan koḷanan i Harun bo i adínea mita, ḻepoai doman in ki iná in ḻima bo ki iná in sioḷ monia dotá in koḷanan. Ki agat in dugú tatua musti pobutakmu kon sí opat in mezbah tatua.

²¹Pogamá kon dugú topiḻik inta kon tudu in mezbah bo ḷana topiḻik inta pinaké kon upacara, bo pisikai in ki Harun bo ki adínea mita takin pakeang monia. Natuata in pogogaid sinbá ki Harun bo ki adínea mita takin pakeang monia tongádon pakéon mogaid kon oaidan-Ku.

²²Gamádon ḷongó in domba koḷakian tatua, iputnea inta oyúon in ḷongó, gaipan ḷongó nongkon bonu in siannea, onu inta totok in mopia nongkon podilatnea, kombiloinea doyowa takin ḷongónea, bo paanea koḷanan.

²³Bo nongkon karansi inta pinobonuan kon roti inta ain pinosumba kon i-Nakó, tumongobatú mako in torupa: tobatú inta pinomia binaukan in ḷana zaitun, tobatú doman inta pinomia diá binaukan in ḷana zaitun, bo tobatú in kukis.

²⁴Pokikadaidon in bayongan kaanon mita tatua kon i Harun bo kon i adínea mita bo pokidiadon kon i monia mamangoi kon i-Nakó mobaḻí sosumba inta pinotamad.

²⁵Bo gamádon in roti nongkon i monia bo tubádon kon tudu in mezbah, kon tudu in kuruban inta sinubá tatua. Rongingi in kuruban tatua mokosanang kon gina-Ku.

²⁶Gamádon dodob in domba koḷakian tatua bo posumbadon mobaḻí sosumba inta potamad kon i-Nakó. Bo tuata in silaimu.

²⁷Kon bonu in upacara poduían kon imang tatua, dodob bo paa in domba koḷakian inta pinaké kon bonu in upacara tatua musti posumba mobaḻí sosumba potamad kon i-Nakó bo poyotondíon nongkon silai in imang mita.

²⁸Naadon in simpod in singog-Ku inta diá motaau baḷuian: Kon dodai in umat-Ku mamangoi moposumba in kuruban dodamean, dodob bo paa in biag tatua in nobaḻí silai in imang mita. Tuata in sosumba in umat-Ku kon i-Nakó.

²⁹Pakeang i Harun saḷaku imang musti popoponag kon i adínea mita, sinbá motaau pakéon monia kon tungkuḷ in pomaḻían kon i monia imang.

³⁰Ki adí i Harun in mobaḻí imang tumoḷuan kon i amá monia bo tumuot kon Ḷoḷaigan-Ku sin mogaid kon ibada kon Yuang Motusi, musti momaké in pakeang tatua pitu nosinggai in koonggotnea.

³¹Gamádon in tapú in domba koḷakian inta pinaké kon upacara pinoduían imang kon i Harun bo kon i adínea mita bo dungúdon in ponoyá tatua kon tampat tobatú inta motusi.

³²Ponoyá tatua musti kaanon monia kon ngara in Ḷoḷaigan-Ku takin ki agat in roti inta kon bonu in kompé.

³³Mosia in musti mokaan kon kaanon inta pinokuruban kon upacara pongampungan kon dosa kon tungkuḷ in pinoduían kon imang. Tongábí imang in motaau mokaan kon kaanon inta sinantú kon i-Nakó tua.

³⁴Aka mobangon monik bo oyúonpa in ki agat in ponoyá ande roti tatua, dá kiagatnea tatua musti tubáan modait, bo diábí motaau kaanon, sin ain pinotontaní.

³⁵Upacara pomaḻían imang kon i Harun bo kon i adínea mita musti pomiaan pitu nosinggai in koonggotnea, ná inta ain pinoguman-Ku kon inimu.

³⁶Kon pomuḷoi in singgai musti moposumba in sapi koḷakian tobatú sin potobut kon dosa. Kuruban tatua in pondarit kon mezbah tatua. Bo mezbah tatua musti ipúanmu in ḷana zaitun sinbá tantúondon tongá posumbaan kon i-Nakó.

³⁷Aidai intua muḷoi in singgai kon bonu in pitu nosinggai. Dá mezbah modaritdon komintan; onukabí in moitugat kon mezbah tatua musti posarakan kon i TUHAN, bo ki inekabí in moḻiai, mokouḻí kon bodito popisí in ropot in kototusinea.” [30]

³⁸“Pomuḷoi in singgai iko musti umuran mopokuruban kon tudu in mezbah tatua domba doyowa inta umur totaong.

³⁹Tobatú in posumba doḷo-doḷom, bo tobatú in posumba ḷoḷabungnea.

⁴⁰Poyotakinon ki adí in domba inta posumba doḷo-doḷom, musti doman posumba in topong torigu tokilo inta totok in nopira baukan in ḷana zaitun totokea toliter. Koḻikud intua toliter doman tubig in anggur.

⁴¹Ki adí in domba inta posumba ḷoḷabungnea in musti pokuruban potongkaion ná inta doḷo-doḷom, takinan doman in topong, ḷana zaitun bo tubig in anggur. Rongingi in kuruban sinubá tatua mokosanang kon gina-Ku.

⁴²Duduiannea kon tua sigaḷa zaman, kuruban tubáan tatua musti posumba kon tayowon-Ku kon ngara in Ḷoḷaigan-Ku. Kon tuata in Akuoi mokipodungkuḷ kon umat-Ku bo mopoyaput in tosingogon kon inimu.

⁴³Kon tua Akuoi moyodungkuḷ in bangusa Israel, bo sindar in koangoian-Ku in mopotusi in tampat tatua.

⁴⁴Baḻíon-Ku in Ḷoḷaigan bo mezbah tatua motusi. Ki Harun bo ki adínea mita in potondíon-Ku nongkon intau ibanea sinbá mosia motaau mogaid kon oaidan-Ku mobaḻí imang.

⁴⁵Akuoi in mogutun kon yua-yuak in intau Israel, bo mobaḻí ki Allah monia.

⁴⁶Kotaauandon monia kon Akuoibí in ki TUHAN Allah monia inta nodia kon i monia iḻumuai nongkon Mesir, sinbá Akuoi in motaaudon mogutun kon yua-yuak monia. Akuoibí naa in ki TUHAN Allah monia.”