Read Mongondow IḶUAIAN 3 Bible Online

IḶUAIAN 3 - Mongondow bible

IḶUAIAN 3

¹Kon dodai intua ki Musa noḷukadmai kon domba bo bembé mita i Yitro, ki nunutonnea, inta imang kon butá in Midian. Kon dodai in sia koyogot nodia kon bobiagon mita tatua minayá kon ḻimako in padang gurun, nodapotdon in sia kon Buḷud in Sinai, buḷud inta motusi.

²Kon tua malaekat i TUHAN nokipogontong kon inia kon bonu in dokot in tuḷú inta iḻumuai nongkon yua-yuak in ḻimbuyun. Ki Musa in nokoontong kon bonok in ḻimbuyun tatua dinumokot, táe diábí nopokak.

³“Diá in poḻiu,” tua in kon raiannea. “Bonok in ḻimbuyun tatua diábí nopokak! Maníka bayáanku indoian nongkon modiug.”

⁴Inontong i TUHAN in ki Musa mamangoi dimiug kon tampat tatua, dá nomaḷú in ki TUHAN nongkon yua-yuak in ḻimbuyun tatua, “Musa! Musa!” “Ya Allah,” tubag i Musa.

⁵Bo ki Allah noguman, “Dika mokopodiug. Bukádon aip in sioḷmu, sin iko in sinimindog mako kon butá inta motusi.

⁶Akuoi naa ki Allah in mogoguyangmu, ki Allah i Abraham, i Ishak bo i Yakub.” Dá ki Musa in nogoḻingoi kon pogotnea, sin moondok in sia moindoi kon i Allah.

⁷Bo ki TUHAN noguman, “Inontong-Kudon in roriga in umat-Ku kon Mesir, bo dinongog-Ku domandon in mosia mopoigum sin poḷúat nongkon pinononggataan kon i monia. Ain bidon kinotaauan-Ku in roriga monia.

⁸Tuamai moponag in Akuoi sin mayá mopoḷuat kon i monia nongkon kawasa intau in Mesir bo modia kon i monia ḷumuai nongkon butá tatua mopobayá in butá tobatú inta moḷuas. Butánea nooyúon bo mopia totok, tanaa mako pinogutunan in bangusa Kanaan, bangusa in Het, Amori, Peris, Hewi bo Yebus.

⁹Amui in bangusa Israel dinongog-Kudon, bo inontong-Ku doman naonda in pinononggata in bangusa Mesir kon i monia.

¹⁰Tanaa iko in potabá-Kudon mayá kon tayowon i datu in Mesir sinbá iko in motaau modia kon bangusa-Ku ḷumuai nongkon butá tatua.”

¹¹Táe ki Musa in noguman kon i Allah, “Ki inebí in akuoi naa, dapot in mokosanggup mayá tumayow kon i datu bo modia kon intau Israel ḷumuai nongkon Mesir?”

¹²Ki Allah in notubag, “Akuoi in motuḷungbí kon inimu. Bo aka bangusa tatua diaanmudon ḷumuai nongkon Mesir, yo moiko in mosumbadon kon i-Nakó kon buḷud tanaa. Tuadon in mobaḻí tanda kon Akuoibí in nopotabá kon inimu.”

¹³Ki Musa in notubag, “Táe aka akuoi mayá mokipodungkuḷ kon intau mita Israel bo moguman kon i monia: ‘Ki Allah in mogoguyangmu nopotabádon kon inakó namangoi kon i monimu,’ yo tantú mosia in moḻibóbí, ‘Ki ine in tangoinea?’ Yo onu in potubagku kon i monia?”

¹⁴Guman i Allah, “Akuoi in AKUOIBÍ INTA OYÚON.[5] Naa in musti singogonmu kon bangusa Israel, Sia inta sinangoi AKUOI INTA OYÚON, ain nopotabá kon inakó namangoi kon i monimu.

¹⁵Potaau domandon kon i monia kon Akuoi, TUHAN, ki Allah in mogoguyang monia, ki Allah i Abraham, i Ishak bo i Yakub, nopotabá kon inimu namangoi kon i monia. Akuoibí naa in ki TUHAN, tuata in tangoi-Ku mononoi. Tuata in ponangoi kon i-Nakó kon bayongan bangusa dapot in adí bo ompu.

¹⁶Bayá bo sipundon komintan in itoi mita Israel. Potaaudon kon i monia kon Akuoi, ki TUHAN, Allah in mogoguyang monia, Allah i Abraham, i Ishak bo i Yakub, aindon nokipogontong kon inimu. Potaau kon i monia kon Akuoi ain namangoi kon i monia bo ain nokoontong kon naonda in pinogogaid in bangusa Mesir kon i monia.

¹⁷Bo sinantú-Kudon kon mosia in diaan-Kudon ḷumuai nongkon Mesir, tampat inta pinononggataan kon i monia, bo mogatod kon i monia mayá in butá tobatú inta nooyúon bo mopia totok, butá in bangusa Kanaan, bangusa Het, Amori, Peris, Hewi bo Yebus.

¹⁸Umat-Ku in mokidongogbí kon tosingogonmu mita. Moiduduimai kon tua iko moyotakin in itoi mita Israel musti mayá tumayow kon i datu in Mesir bo moguman kon inia: ‘TUHAN, ki Allah intau Ibrani aindon namangoi nokipogontong kon inami. Tanaa ogoiaidon in wakutu kami mayá inta koyayúnea in toḷu nosinggai in bayáan mopobayá in padang gurun sin moposumba in kuruban kon i TUHAN, ki Allah nami.’ ”

¹⁹Onda intua ki Allah in noguman bui, “Kinotaauan-Kubí kon ki datu Mesir in doíbí mopomayá mako kon i monimu mayá, koḻikudbí in aka sia pakisaan.

²⁰Táe Akuoi mopomakébí in kawasa-Ku, bo mohukum kon Mesir takin mopoangoi in bayongan inta mokoondok kon tua. Mopaḷut mako in tua, ogoineadon in moiko mobuat nongkon tua.

²¹Baḻíon-Ku intau Mesir mopia in gina kon i monimu, dá aka moiko mobuatdon, moiko in diábí mayá takin kaḷo-kaḷoi.

²²Bayongan bobay Israel in moigumbí kon topodiugneamai inta intau in Mesir bo nongkon bobay in Mesir inta nogutun tobaḷoian, pakeang takin ḷambá saḷaka bo buḷawan. Moiko in mopopaké intua kon i adímu mita. Natuata in pogogagow monimu kon intau Mesir.”