Read Mongondow IḶUAIAN 31 Bible Online

IḶUAIAN 31 - Mongondow bible

IḶUAIAN 31

¹Ki TUHAN noguman kon i Musa,

²“Piniḻí-Kudon in ki Bezaleel adí i Uri, ompu i Hur nongkon suku i Yohuda,

³bo inogoian-Ku in sia in kawasa-Ku.[32] Sia inogoian-Ku in pomomangaḻe, toḻidat bo kototaau kon bayongan yagi-yagi oaidan:

⁴sin mogaid kon rancangan inta moparaḷu kon pandoi sin momia kon barang inta nongkon buḷawan, saḷaka bo porunggu;

⁵sin mogatá mokopoḷamag kon batu permata inta sinoinut notompia; sin mongurig kon kayu bo kon bayongan yagi-yagi oaidan.

⁶Ki Aholiab, ki adí i Ahisamakh nongkon suku Dan, ain piniḻí-Ku doman sin motuḷung kon inia. Bas mita inta mopandoi ogoian-Ku doman in toḻidat inta diá in poḻiu, sinbá mosia motaau mogaid kon onuka in pokiaid-Ku:

⁷Ḷoḷaigan-Ku, Poti Dodandian bo taḷobnea, komintan pakakat in Ḷoḷaigan,

⁸inta meja bo touḷutnea, sioḷ in totuduan togá inta nongkon buḷawan totokea takin touḷutnea, mezbah pototubáan kon dupa,

⁹mezbah tampat in kuruban tubáan bo bayongan touḷutnea, tampat in tubig takin aipnea,

¹⁰pakeang ibada inta pakéon i Harun bo i adínea mita, inta musti pakéon kon dodai in mosia mogaid kon oaidan monia mobaḻí imang,

¹¹ḷana upacara, bo dupa mobondu sin pakéon kon Yuang Motusi. Tua komintan musti pomiaan monia podudui kon onu inta ain sinundú-Ku kon inimu.”

¹²Ki TUHAN nomarenta kon i Musa

¹³mopotaau kon bangusa Israel, “Ḷukadai in singgai in Sabat, singgai inta ain sinantú-Ku mobaḻí singgai pogogaian. Modapot kon adí bo ompumu singgai tatua mobaḻí singgai ponanoban kon sigad i monimu bo kon i-Nakó, sinbá kotaauandon monimu kon Akuoi naa in ki TUHAN, bo binaḻí-Kudon in moiko bangusa-Ku tontaní.

¹⁴Singgai pogogaian tatua musti horomaton monimu mobaḻí singgai inta motusi. Moiko inogoian-Kudon in onom nosinggai sin pogaidan monimu, táe singgai noginpitu in singgai moḷoben inta nobaḻí singgai-Ku. Ki ine in diá mohoromat kon singgai tatua, táe umuran doman mogaid in kon singgai tatua yo musti hukumon matoi.

¹⁶Singgai tatua musti baḻíon in intau Israel mobaḻí Singgai Moḷoben dapot kon adí bo ompu mobaḻí tanda in dodandian.

¹⁷Singgai tatua in ponanoban tobatú inta motantú kon sigad in bangusa Israel bo kon i-Nakó, sin Akuoi, TUHAN, nomaḻídon kon ḷangit bo butá onom nosinggai koonggotnea, bo kon singgai noginpitu nogogaidon in Akuoi nogaid bo poḷat nomarakat.”

¹⁸Naonda in nopaḷut mako noyosingog i Musa kon tudu in Buḷud Sinai, ki Allah nobogoidon kon inia in batu doyowa inta pinomaisan i Allah kon parenta-Nea mita.