Read Mongondow IḶUAIAN 32 Bible Online

IḶUAIAN 32 - Mongondow bible

IḶUAIAN 32

¹Kon tungkuḷ in noonggotdon in pinogoḷatan mako in bangusa Israel kon i Musa mosiḻig nongkon buḷud tatua, sin dodai intua sia umuranpabí kon tudu in buḷud tatua, dá mosia in namangoi kon i Harun bo noguman, “Diádon kinotaauan naton mongo onu in nobaḻí kon i Musa, intau inta ain nodia kon i naton iḻumuai nongkon Mesir; dá pomiaaidon in kami kon ilah[33] inta modia kon inami.”

²Bo ki Harun in noguman kon i monia, “Gamádon in nganti-nganting buḷawan inta pinaké i buḷoi bo i adí mita monimu, bo diádon mangoi kon inakó.”

³Dá mosia in noḷongkutdon kon nganti-nganting buḷawan monia bodongka dinia kon i Harun.

⁴Ginamá i Harun in nganti-nganting mita tatua, bodongka sinubánea nodapot in noḷoḷang bo binonunea kon pastaka tobatú bo pinomia patong sapi tobatú. Intau mita tatua noguman, “Ei Israel, naadon in ilah naton inta nodia kon i naton iḻumuai nongkon Mesir!”

⁵Bo ki Harun noposindog in mezbah tobatú kon tayowon sapi buḷawan tatua bo poḷat nopotaau, “Ikoḷom oyúon in rame sin mohoromat kon i TUHAN.”

⁶Nopoikoḷomai kon singgai doḷo-doḷompa totok, intau mita Israel nodia kon tongonumai in biag sin baḻíon kuruban inta tubáan, bo tongonumai doman in biag inta mobaḻí kuruban dodamean. Mosia iḻimitú nongaan bo nonginum, bo sinimindog noposanang in gina.

⁷Dá ki TUHAN noguman kon i Musa, “Ḷagidon posiḻig, sin bangusa inta diniamu iḻumuai nongkon butá in Mesir nomiadon kon inta moraat.

⁸Mosia ain sinumabat kon parenta-Ku mita. Mosia nomiadon kon patong sapi nongkon buḷawan, bo sinumba monia poḷat inogoian monia in kuruban. Mosia ain noguman kon tuata in ilah monia inta nodia kon i monia iḷumuai nongkon Mesir.

⁹Kinotaauan-Kubí kon bangusa mita tatua panggit in gina.

¹⁰Donaai monungkuḷ moḷamboi kon i-Nakó. Tumorú in Akuoi kon i monia bo yopúon-Ku in mosia. Táe iko takin buímu in baḻíon-Ku bangusa moḷoben tobatú.”

¹¹Ki Musa nopoigum tabi kon i TUHAN Allahnea, kainia, “TUHAN, nongonu sin musti-Mubí aidan kon i monia in natua? Ikodon tontaní inta noposaḷamat kon i monia nongkon Mesir takin kawasa bo ropot-Mu inta moḷoben?

¹²Aka yopúon-Mu in mosia, yo intau in Mesir in mogumandon kon Iko in nodia kon i monia iḻumuai nongkon Mesir sin ḻimodon in kon buḷud bo yopúondon komintan. Donaai kaasí aidan in natua, o TUHAN, baḷuaidon in niat-Mu bo donaaidon popoantugan in bodito in bangusa tatua.

¹³Toropdon in ata-Mu mita inta ki Abraham, ki Ishak bo ki Yakub. Toropdon bui kon Iko ain nodandi takin nongibot kon mobogoi kon i monia in buí inta mobarong totok naonda bo tundi kon ḷangit, ná doman tua bayongan butá inta pinodandi-Mu tua in mobaḻí kapunyaan in buí monia mononoi.”

¹⁴Dá ki TUHAN nomaḷuidon kon niat-Nea tatua bo diádon pinopoantugan-Nea in bangusa tatua in bodito ná inta tomayá-Nea.

¹⁵Ki Musa in nosiḻigdon nongkon buḷud tatua takin kodia-dia in batu inta posiḷosi pinomaisan kon parenta mita i Allah.

¹⁶Ki Allah tontaní in nomia kon batu tatua bo nomais kon parenta-Nea mita kon tua.

¹⁷Kon dodai in mosia nosiḻig, dinongog i Yosua intau mita Israel noromaḷú, dá nogumandon in sia kon i Musa, “Oyúon in parang kon pinonḷoḷaigan.”

¹⁸Guman i Musa, “Kodongogan in deemanbí baḷú sin nountung ande nomaḷú sin sinaḷow; tua in singogbí intau modondong.”

¹⁹Naonda in ki Musa nodiugdon kon ḷoḷaigan tatua, inontongnea in patong sapi buḷawan tatua bo intau mita motayokmai kon tua, dá sinumorúdon totok in sia. Kon tuapa doman, kon sioḷmai in buḷud tatua, pinogonag i Musa in batu inta kodia-dianea tatua dá norimu-rimumud.

²⁰Onda intua ginamáneadon in patong sapi inta pinomia in intau mita Israel tatua, bo iḷoḷangnea bui poḷat dinodok kinorimok ná ḷobud, bodongka binaukan in tubig. Onda intua pinoki inumneadon kon intau mita Israel.

²¹Sia in noguman kon i Harun, “Onudon in inaidan monia kon inimu nodapot in pinomayámudon mako in mosia nogaid kon dosa moḷoben tatua?”

²²Tubag i Harun, “Dikapa tumorú kon inakó; kinotaauanmudon tontaní naonda in kinobobarani intau mita tanaa momia kon inta moraat.

²³Mosia in noguman kon inakó, ‘Diádon kinotaauan naton mongo onu in nobaḻí kon i Musa, intau inta ain nodia kon i naton iḻumuai nongkon Mesir; dá pomiaaidon in kami ilah tobatú inta mobaḻí itoi kon inami.’

²⁴Dá pinotabákudon in mosia nodia mangoi kon ḷambá buḷawan monia, bo dinia domandon monia intua kon inakó. Bayongan ḷambá buḷawan monia tatua iḷoḷangku kon tuḷú, bo pinomiadon patong sapi tanaa!”

²⁵Kinotaauandon i Musa kon pinomayádon mako i Harun natua in bangusa Israel naonda bo kabaḷo inta nokobuḻi nongkon ḷantung, dapot in mosia rebegonmai in musung mita monia.

²⁶Dá sinimindogdon in sia kon tayowon in ngara pinonḷoḷaigan tatua bo nomaḷú, “Ki ine in mopirisaya kon i TUHAN musti mamangoi in naa!” Dá namangoidon in suku i Lewi kon diug i Musa,

²⁷bo sia in noguman kon i monia, “Ki TUHAN Allah Israel in nomarentadon kon i monimu komintan morabut kon pitowmu bo mayá mongin pinonḷoḷaigan tanaa, nongkon ngara tanaa, modapot kon ngara ibanea sindaḷan moḻimod kon ginaḷumnea, yobayatnea, bo topodiugmu mita.”

²⁸Suku Lewi tatua nogaid kon onu in pinarenta tatua, bo kon singgai tatua degá toḷu noribu in intau minatoi iḻimod.

²⁹Ki Musa in noguman kon suku in Lewi, “Singgai in naa moiko ain nopotondí in awak monimu[34] mobaḻí imang inta nogaid kon oaidan i TUHAN takin noḻimod kon adí mita bo kon i utat mita monimu, dá ki TUHAN nobogoi in barakat-Nea kon inimu.”

³⁰Nopoikoḷomai kon singgai ki Musa noguman kon bangusa tatua, “Moiko ain nogaid kon dosa moḷoben. Táe tanaa akuoi in motakod bui kon buḷud tatua sin mayá tumayow kon i TUHAN; igumon mako akuoi mokouḻí kon totabi bo ampungandon in taḷá monimu.”

³¹Bo ki Musa in bui minayá kon tayowon i TUHAN bo noguman, “Bangusa tatua ain nogaid kon dosa moḷoben. Mosia ain nomia kon ilah ibanea nongkon buḷawan.

³²Akuoi mopoigum totok sinbá ki TUHAN moibogpa mongampung kon dosa monia; aka diá dá popataidon in tangoiku kon bonu in buk intau mita nobiag.”

³³Ki TUHAN notubag, “Tongábí ki ine in nomia kon dosa kon i-Nakó tuata in popatan-Ku in tangoi monia kon buk tatua.

³⁴Bayádon in tanaa, bo diádon in mosia kon tampat inta ain pinotaau-ku kon inimu. Malaekat-Ku in mokapit kon inimu, táe moiangoibí in wakutunea intau mita hukumon-Ku popisí in taḷá mita monia.”

³⁵Bo ki TUHAN nopoangoidon in bodito kon intau mita tatua sin mosia nomakisa kon i Harun nomia kon patong sapi buḷawan tatua.