Read Mongondow IḶUAIAN 35 Bible Online

IḶUAIAN 35 - Mongondow bible

IḶUAIAN 35

¹Ki Musa in nosipun kon bayongan bangusa Israel bo noguman kon i monia, “Naadon in parenta i TUHAN kon i monimu:

²Onom nosinggai in pakéon mogaid, táe kon singgai noginpitu in nobaḻíbí singgai pogogaian, singgai moḷoben inta tondíon kon i TUHAN. Ki ine in mogaid kon singgai in Sabat musti hukumon matoi.

³Kon singgai tatua moiko diá motaau monontuḷú kon baḷoimu.”

⁴Ki Musa in noguman kon bayongan bangusa Israel, “Nanaa in parenta i TUHAN:

⁵Diadon in sosumba kon i TUHAN. Ki ine in moḻiai in ginanea, musti moposumba in buḷawan, saḷaka bo porunggu;

⁶kaeng moaḷus, kaeng wol nobidu, kaeng nokamumu bo nopura, kaeng inta pinomia nongkon bubuḷ in bembé;

⁷kuḻit in domba koḷakian inta binoréan in nopura; kuḻit moaḷus, kayu akasia,

⁸ḷana pakéon kon togá; pododungú mita inta pakéon kon upacara bo pakéon kon dupa inta mobondu;

⁹permata delima bo permata ibanea inta sinompiamai pinokompit kon ḷambung epod bo oḻingoi in dodob i Imang Moḷoben.”

¹⁰“Bayongan in mogogimok inta mopandoi kon sigad monimu musti mamangoi sin mogaid kon bayongan inta pinarenta i TUHAN, tuata mita:

¹¹Ḷoḷaigan, atop bo taḷobnea, kokaud bo tombaḷoinea, kayu mita bilabag, oigi in ḷoḻingkop bo aipnea;

¹²Poti Dodandian takin kayu tombuḻignea, taḷobnea takin kaeng inta pinongoḷob;

¹³meja takin kayu tombuḻignea, komintan touḷutnea bo roti posumba

¹⁴pototuduan kon togá ponimbayag takin touḷutnea, togá takin ḷananea;

¹⁵mezbah pototubáan kon dupa takin kayu tombuḻigannea, ḷana pakéon kon upacara, dupa inta mobondu; toḻipoi inta pakéon kon ḷoḻingkop in Ḷoḷaigan,

¹⁶mezbah inta pototuduan kon kuruban inta tubáan takin sinontoḷatak mita inta pinomia nongkon bitú, kayu tombuḻigan takin bayongan touḷutnea; tampat in tubig ponondaritan takin aipnea,

¹⁷toḻipoi mita inta pinaké kon bosínea, oigi mita takin aipnea, toḻipoi in ngara bosínea,

¹⁸patok mita bo tontogot pinobotok kon Ḷoḷaigan bo kon bosínea;

¹⁹pakeang ibada in imang mita kon dodai in mosia mogaid kon oaidan monia kon bonu in Yuang Motusi bo pakeang inta tongá pakéon i Imang Harun, bo i adínea mita.”

²⁰Bo bayongan in intau Israel inta nosipun kon tua minayádon,

²¹bo ki inekabí inta noḻiai in ginanea, nodia kon sosumba kon i TUHAN sin ponompia kon Ḷoḷaigan i TUHAN. Mosia in nodia doman kon bayongan inta motaau pakéon kon ibada bo touḷut inta pakéon kon pakeang in imang.

²²Ki inekabí in moibog, pinomayá ḷoḷaki ande bobay, mamangoi modia kon tomot ḷambá, nganti-nganting, sising, boboḷ bo bayongan yagi-yagi ḷambá buḷawan sin makusud poposumba kon i TUHAN.

²³Bayongan intau inta kokaeng moaḷus, kaeng wol nobidu, nokamumu ande nopura, kaeng inta pinomia nongkon bubuḷ in bembé, kuḻit in domba inta binoréan nopura, ande kuḻit moaḷus noposumba in barang tatua.

²⁴Bayongan intau inta motaau moposalehe in saḷaka ande porunggu, yo diaannea intua kon i TUHAN. Natua doman in aidan in intau mita inta ko kayu akasia sin pakéon kon oaidan tatua.

²⁵Bobay mita inta mopandoi mogaboḷ modia kon siningkoi moaḷus takin siningkoi wol nobidu, nokamumu bo nopura inta ain pinomia monia.

²⁶Mosia in nogaboḷ domandon kon siningkoi inta pinomia nongkon bubuḷ in bembé.

²⁷Itoi mita nodia kon batu permata delima bo permata mita ibanea sin poḷambá kon epod bo kon oḻingoi in dodob.

²⁸Mosia in nodia doman kon pododungú bo ḷana inta pakéon kon togá, ḷana pakéon kon upacara bo dupa inta mobondu.

²⁹Bayongan in intau Israel takin ibog monia tontaní nodia kon sosumba monia kon i TUHAN sin pakéon pogaid kon oaidan tatua inta pinotaau i TUHAN kon i Musa.

³⁰Onda intua ki Musa in noguman kon intau in Israel, “Ki TUHAN ain nomiḻí kon i Bezaleel ki adí i Uri, ki ompu i Hur, nongkon suku in Yohuda

³¹bo sia in pinonotabiandon i TUHAN in kawasa-Nea.[37] Ki Allah nobogoi in pongotahuan, pandoi bo komampuan kon bayongan yagi-yagi soaḷ seni,

³²sin momia kon rancangan inta paraḷu totok kon koahlian, bo motaau doman momia kon tua nongkon buḷawan, saḷaka bo porunggu;

³³sin mogatá koḷamagon kon batu permata inta tompiaanmai; bo mongurig kon kayu bo mogaid kon bayongan yagi-yagi inta oaidan seni ibanea.

³⁴Bo kon i Bezaleel bo kon i Aholiab, ki adí i Ahisamakh nongkon suku in Dan, ki TUHAN nobogoi in pandoi kon i monia motundú kon koahlian monia kon intau ibanea.

³⁵Mosia inogoian in pandoi kon bayongan yagi-yagi oaidan in intau mita mopandoi mongurig, mononomayá bo inta mongopandoi mogaboḷ kon kaeng moaḷus, wol nobidu, nokamumu bo nopura, bo kaeng mita ibanea. Mosia tua in mononomayá inta motaau totok bo motaau doman totok momia kon bayongan in oaidan.