Read Mongondow IḶUAIAN 36 Bible Online

IḶUAIAN 36 - Mongondow bible

IḶUAIAN 36

¹Ki Bezaleel, ki Aholiab, bo bayongan mogogimok inta nokouḻí kon pandoi bo koahlian nongkon i TUHAN, nonotaau kon bayongan inta toko pakéon kon Ḷoḷaigan i TUHAN. Mosia in musti momia kon bayongan yagi-yagi ná inta ain pinarenta i TUHAN.”

²Ki Musa nogoiní kon i Bezaleel, kon i Aholiab bo bayongan intau inta nokouḻí kon koahlian nongkon i TUHAN bo takin pia in gina mobantung, bo pinoki pomangkoiandon nogaid.

³Inogoi i Musa kon i monia in bayongan inta pinosalehe in intau Israel sin pakéon pogaid kon Ḷoḷaigan i TUHAN. Táe bangusa Israel umuranpabí doman modia mangoi kon sosumba kon i Musa muḷoi in doḷo-doḷom.

⁴Bo bayongan in mogogimok inta koyogot mogaid kon oaidan tatua

⁵nopotaau kon i Musa, “Touḷut mita inta pinosalehe in intau mita tatua aindon noiḻiu kon onu inta toko pakéon kon oaidan inta pinoki aid i TUHAN.”

⁶Dá pinotaaudon i Musa kon bayongan in ḷoḷaigan kon tugatdon in salehe inta paraḷu pakéon pogaid kon ḷoḷaigan i TUHAN; dá intau mita in diádon nodia bui kon onukadon.

⁷Touḷut mita inta ain pinosalehe monia noiḻiudon kon tugat pakéon poginḷapat kon oaidan tatua.

⁸Onda intua, ki inta totok in motaau kon sigad in mogogimok mita tatua nomia kon Ḷoḷaigan i TUHAN. Ḷoḷaigan tatua pinomia monia nongkon mopuḷú nopongkó in kaeng moaḷus inta pinoyogaboḷ in kaeng wol nobidu, nokamumu bo nopura, bodongka pinoyogaboḷ doman gambar in kerub.[38]

⁹Pongkóan in kaeng mita tatua kotongkaion in ukurannea; kobanatnea in mopuḷú bodoyowá nometer, bo kooḷadnea in doyowa nometer.

¹⁰Ḻima nopongkó in kaeng tatua pinoyotondoḷ nobaḻí ḻeag tobatú, bo ḻima doman nopongkó ibanea pinomia doman natua.

¹¹Kon bingkí in ḻeag doyowa tatua pinogaidan doman kon tontoyaud nongkon kaeng nobidu,

¹²Toḷoḻima nopuḷú in kon batúan in ḻeag, dá nobaḻí tumongo gapang.

¹³Bo pinomiaan doman kon ḻima nopuḷú in kokaud buḷawan sin mopoyoguput in ḻeag doyowa tatua.

¹⁴Nopaḷut mako kon tua mosia in nomia kon atop in Ḷoḷaigan tatua nongkon mopuḷú bomitá in kaeng inta pinomia nongkon bubuḷ in bembé.

¹⁵Batúan in pongkóannea notongkai in ukurannea, kobanatnea mopuḷú botoḷú nometer bo kooḷadnea doyowa nometer.

¹⁶Ḻima nopongkó pinoyotondoḷ nobaḻí ḻeag tobatú, bo onom nopongkó ibanea pinomia doman natua.

¹⁷Ḻima nopuḷú in tontoyaud pinopodagum kon bingkí in ḻeag inta muna bo ḻima nopuḷú doman ibanea pinopodagum kon bingkí in ḻeag inta nogindua.

¹⁸Bodongka pinomia doman in ḻima nopuḷú in kokaud nongkon porunggu sin mopoyotondoḷ in ḻeag doyowa tatua binaḻí atop in Ḷoḷaigan.

¹⁹Nopaḷut mako kon tua pinomiaan doman kon taḷobnea doyowa sin pogoḻingoi kon Ḷoḷaigan tatua, tobatú in nongkon kuḻit in domba koḷakian inta binoréan nopura, bo inta ibanea nongkon kuḻit moaḷus.

²⁰Onda intua mosia nomia kon tombaḷoi mita in Ḷoḷaigan nongkon kayu akasia inta pinosindog kinotuḻid.

²¹Batúan in tombaḷoi koḷantudnea opat nometer bo kooḷadnea in onom nopuḷú bo onom nosenti.

²²Kon batúan in tombaḷoi pinomiaan kon patok doyowa inta pinoyogapang, dá tombaḷoi mita tatua motaau poyo-poyotondoḷon.

²³Bo kon dotá in toḷatan Ḷoḷaigan pinomiaan kon doyowa nopuḷú in tombaḷoi,

²⁴pinakéan in opat nopuḷú in aipnea nongkon saḷaka, tododoyowa kon batúan in tombaḷoi inta popoaip kon patoknea doyowa.

²⁵Bo kon dotá in Utuan Ḷoḷaigan tatua pinomiaan doman kon doyowa nopuḷú in tombaḷoi,

²⁶takin doman opat nopuḷú in aipnea inta pinomia nongkon saḷaka, tododoyowa kon batúan in tombaḷoi.

²⁷Bo kon dotá in tumi in Ḷoḷaigan inta kon dotá in toyopan pinomiaan kon tombaḷoi onom

²⁸bo tombaḷoi doyowa in kon sikunea.

²⁹Tombaḷoi mita inta kon sikunea tatua pinoyotondoḷ nongkon sioḷnea nodapot kon dotá in ḻimonikannea. Tombaḷoi doyowa inta nopotonsiku ná tatua.

³⁰Dá waḷu komintan in kobayong in tombaḷoi takin aipnea saḷaka mopuḷú bo onom, tododoyowa in kon batúan in tombaḷoi.

³¹Bo pinomia monia in kayu bilabagnea nongkon kayu akasia mopuḷú bo ḻima, ḻima in pakéon kon tombaḷoi mita inta kon sí tobatú in Ḷoḷaigan,

³²ḻima doman in kon sínea ibanea, bo ḻima doman in pakéon kon dotá in tumi in Ḷoḷaigan inta kon dotá in toyopan.

³³Kayu bilabag inta kon ruak, pinobilabag kinotombotak in koḷantud tombaḷoi, nongkon popod tobatú pinobayá in popod tobatú in Ḷoḷaigan tatua.

³⁴Tombaḷoi in Ḷoḷaigan bo kayu mita bilabag tatua inoḻitan in buḷawan, bo pinakéan in ḻingkit mita buḷawan sin pogopod kon kayu mita tatua.

³⁵Mosia in nomia doman kon toḻipoi in ḷoḻingkop nongkon kaeng moaḷus inta pinoyogaboḷ in kaeng wol nobidu, nokamumu bo nopura, bo sinujian doman gambar in kerub.[39]

³⁶Bo pinosindog doman monia in oigi opat inta pinomia nongkon kayu akasia inta inoḻitan in buḷawan takin doman kokaud buḷawan inta inuḷak kon tudu in aipnea inta saḷaka opat. Oigi tatua pinomia monia sin popobambéan in kaeng tatua.

³⁷Bo inaidandon in toḻipoi in ḷoḻingkop in Ḷoḷaigan tatua nongkon kaeng moaḷus inta pinoyogaboḷ in kaeng wol nobidu, nokamumu bo nopura bo iḷambáan doman in sujian.

³⁸Sinbá oyúon in popobambéan kon toḻipoi in ḷoḻingkop dá pinomiaan domandon kon oigi ḻima inta ain pinoyotondoḷ in kokaud mita. Popod mita bo tondoḷ mita in oigi ḻima tatua inoḻitan in buḷawan, táe aipnea ḻima in pinomia nongkon porunggu.