Read Mongondow IḶUAIAN 37 Bible Online

IḶUAIAN 37 - Mongondow bible

IḶUAIAN 37

¹Ki Bezaleel in nomia kon Poti Dodandian nongkon kayu akasia, kobanatnea in mogatut bo mopuḷú nosenti, kooḷad bo koḷantudnea in togogonom nopuḷú bo onom nosenti.

²Dotá in bonu bo ḷuainea inaipan in buḷawan taakan, bodongka pinomiaan kon bongkownea nongkon buḷawan.

³Onda intua pinomiaannea kon ḻingkit opat nongkon buḷawan sin popobonuan in kayu tombuḻigannea bo tua in pinouḷaknea kon sioḷ in poti opat tatua, takin ḻingkit kon sínea.

⁴Pinomiaannea doman kon tombuḻigannea nongkon kayu akasia, bo inoḻitannea in buḷawan,

⁵bo kayu tombuḻigan tatua pinobonunea kon ḻingkit mita inta kon sí in poti tatua.

⁶Onda intua pinomianea kon taḷobnea tobatú nongkon buḷawan taakan, kobanatnea in mogatut bo mopuḷú nosenti bo kooḷadnea in onom nopuḷú bo onom nosenti.

⁷Pinomiaannea doman kon kerub doyowa[40] nongkon buḷawan sinontaḷ,

⁸tumongo batu in kon posipopod in taḷobnea tatua. Kerub doyowa tatua sinobatú takin taḷobnea

⁹bo pinomia pinoyogintayow, takin koḻikip inta sinongká noioḻingoi kon taḷob in poti tatua.

¹⁰Ki Bezaleel nomia kon meja nongkon kayu akasia, inta kobanatnea waḷu nopuḷú bo waḷu nosenti, kooḷadnea onom nopuḷú bo onom nosenti.

¹¹Meja tatua inoḻitannea in buḷawan taakan bo kon ḻibunea pinomiaannea kon bongkow nongkon buḷawan.

¹²Bo nomia in sia kon bingkí in meja, kooḷadnea in 7,5 nosenti. Bingkínea tatua mita binongkowannea in buḷawan.

¹³Pinomiaannea kon ḻingkit opat sin popobonuan in kayu tombuḻigannea bo pinoḷutudnea kon sioḷ in meja opat.

¹⁴Ḻingkit inta pobonuan kon kayu tombuḻigan tatua pinoguḻit kon diug in bingkí in meja.

¹⁵Kayu tombuḻigan tatua pinomia nongkon kayu akasia bo inoḻitan in buḷawan.

¹⁶Sia in nomia doman kon pindan mita, palo mita, kendi mita bo mangko mita sin pobonuan kon anggur inta poposumba. Bayongan touḷut in meja tatua pinomianea nongkon buḷawan taakan.

¹⁷Ki Bezaleel nomia kon sioḷ in pototuduan kon togá nongkon buḷawan taakan. Aip bo kokadaiannea pinomia nongkon buḷawan sinontaḷ. Bungang mita ḷambá, takin dáun bo poḷapánea sinobatú takin kokadaiannea.

¹⁸Kon kokadaian tatua pinomiaan kon tanga onom, tumototoḷu in tanga kon sínea posibotak.

¹⁹Kon batúan in tanganea pinomiaan kon ḷambá inta bungang badam toḷu takin dáun bo poḷapánea.

²⁰Kon kokadaiannea pinomiaan kon ḷambá inta bungang badam opat takin dáun bo poḷapánea.

²¹Kon ḻimonag in tanga mita tatua pinomiaan doman kon dáun tobatú.

²²Bayongan sioḷ totuduan in togá tatua takin dáun bo tanganea mita pinomia nongkon buḷawan taakan inta sinontaḷ.

²³Kon sioḷ totuduan in togá tatua pinomianea kon togá pitu takin pakakat ponondarit kon sumbu in togá bo duḷangnea nongkon buḷawan taakan.

²⁴Buḷawan taakan inta pinaké inaidan sioḷ totuduan in togá takin touḷutnea kobogatnea in toḷu nopuḷú bo ḻima nokilo.

²⁵Ki Bezaleel nomia kon mezbah tobatú nongkon kayu akasia sin pototubáan kon dupa. Mezbah tatua notonggopat; koḷanggó bo kooḷadnea in togogopat nopuḷú bo ḻima nosenti bo koḷantudnea in siow nopuḷú nosenti. Bo kon sikunea opat dotá in omonikanea pinomiaan kon tungoi inta pinoyotobatú takin mezbah tatua.

²⁶Dotá in ḻimonikannea, sínea opat bo tungoinea mita inoḻitan in buḷawan taakan bo ḻibunea in pinomiaan kon bongkow buḷawan.

²⁷Pinomianea doman kon ḻingkit doyowa kon ḻimonag in bongkow buḷawan kon sínea doyowa sin pogopod kon kayu tombuḻigan in mezbah tatua.

²⁸Tombuḻigan tatua pinomia nongkon kayu akasia bo inoḻitan in buḷawan.

²⁹Ki Bezaleel nomia doman kon ḷana in upacara bo dupa totokea inta mobondu, pinoyobauk naonda bo ḷana mobondu.