Read Mongondow IḶUAIAN 38 Bible Online

IḶUAIAN 38 - Mongondow bible

IḶUAIAN 38

¹Ki Bezaleel nogamá kon kayu akasia, bo pinomianea mezbah in kuruban tubáan. Mezbah tatua notonggopat, kobanat bo kooḷadnea in tumpaḷa tododoyowa nometer bo doyowa nopuḷú nosenti, koḷantudnea in tometer bo toḷu nopuḷú nosenti.

²Kon siku-sikunea opat kon ḻimonik pinomiaan kon tungoi inta ain sinobatú takin mezbah tatua. Tua komintan inoḻitan in porunggu.

³Pinomiaannea doman kon rumping mita, sikop, palo mita, porok mita bo pononontuḷúan. Bayongan touḷut tatua pinomia nongkon porunggu.

⁴Bo pinonontoḷatakannea kon kawa porunggu inta pinooḻitnea kon mezbah dotá in ḻimonag, koḷantudnea in noitombotak kon koḷantud in mezbah.

⁵Bodongka pinomiaannea kon ḻingkit inta popoḷutudan in kayu tombuḻigan kon sikunea opat dotá in ḻimonagannea.

⁶Kayu tombuḻigan tatua pinomianea nongkon kayu akasia inta inoḻitan in porunggu.

⁷Bo kayu tombuḻigan doyowa tatua pinoḷutudnea kon ḻingkit mita inta kon sí in mezbah tatua. Mezbah tatua pinomianea nongkon dopí bo dotá in bonunea ginúangan.

⁸Ki Bezaleel nomia kon tampat in tubig nongkon porunggu inaipan in porunggu doman. Porunggu tatua nongkon posilag mita kapunyaan in bobay mita inta mogogundoi kon tayowon ḷoḻingkop in Ḷoḷaigan i TUHAN.

⁹Sinondok i Bezaleel in ḻeag inta nongkon kaeng moaḷus in tampat pooibadaan kon Ḷoḷaigan i TUHAN tatua. Kon dotá in toḷatan, kobanatnea opat nopuḷú bo opat nometer,

¹⁰ginopodan in oigi doyowa nopuḷú, bo tua komintan inaipan doman in aip porunggu, takin kokaud bo tontoyaudnea inta pinomia nongkon saḷaka.

¹¹Kon dotá in utuan pinomiaannea doman kon natua.

¹²Kon dotá in toyopan binambéan doman in ḻeag inta kobanatnea doyowa nopuḷú bodoyowá nometer, takin oigi mopuḷú bo takin aip mopuḷú doman; kokaud bo pononondoḷnea pinomia nongkon saḷaka.

¹³Kon dotá in pomukaan, inta oyúon in ḷoḻingkopnea, kooḷad in ḻeagnea in doyowa nopuḷú bo doyowa doman nometer.

¹⁴Kon dotá in koḷoigi bo koḷanan in ḷoḻingkop tatua binambéan in ḻeag, koḷanggónea tumpaḷa togogonom nometer bo onom nopuḷú nosenti, sinakinan oigi toḷu bo aipnea doman toḷu.

¹⁶Bayongan in ḻeag inta pinoḻibu kon tampat pooibadaannea tatua pinomia nongkon kaeng linen moaḷus.

¹⁷Aip in oiginea mita in pinomia nongkon porunggu, aka kokaud, pinotondoḷan bo ubung in oiginea tua in pinomia nongkon saḷaka. Bayongan in oigi inta kon diug in bosínea tatua pinoyo-poyoguput takin nomaké in tontoyaud inta pinomia nongkon porunggu.

¹⁸Toḻipoi in ḷoḻingkop in bosínea tatua pinomia nongkon kaeng linen moaḷus inta pinoyogaboḷ in wol nobidu, nokamumu bo nopura inta iḷambáan in sujian. Kobanatnea in siow nometer bo koḷantudnea in doyowa nometer, notongkai doman in ḻeag in bosínea.

¹⁹Kaeng toḻipoi in ḷoḻingkop pinopotogot kon oigi opat inta inaipan in porunggu. Bayongan in kokaud, taḷob in ḻimonikannea bo tontoyaudnea pinomia nongkon porunggu,

²⁰táe oigi mita in Ḷoḷaigan bo tondoknea pinomia nongkon porunggu.

²¹Naa in bayongan in logam inta pinaké kon bonu in Ḷoḷaigan i TUHAN, tampat pinotagúan kon batu inta pinomaisan kon Parenta i Allah inta mopuḷú. Tua komintan sinokopais pinodudui kon parenta i Musa bo pinipid in intau mita in Lewi inta nogaid takin kotaki-takin i Itamar ki adí i Imang Harun.

²²Ki Bezaleel adí i Uri, ompu i Hur inta nongkon suku in Yohuda, nomia kon bayongan inta pinoki aid i TUHAN.

²³Bobantungnea in ki Aholiab adí i Ahisamakh nongkon suku Dan, sia naa in mongongurig, mononomayá bo mogogaboḷ kon kaeng linen moaḷus, wol nobidu, nokamumu bo nopura.

²⁴Buḷawan inta pinosumba kon i TUHAN sin pogaid kon Ḷoḷaigan Motusi, kobogatnea komintan in 1.000 nokilo, sinimbang podudui in simbangan inta pinaké kon Ḷoḷaigan i TUHAN.

²⁵Saḷaka inta pinosumba in bangusa Israel pinodudui kon kobayong in umat, kobogatnea in 3.430 nokilo, sinimbang podudui in simbangan inta pinaké kon Ḷoḷaigan i TUHAN.

²⁶Kobayongnea tatua notongkai in onu inta inuboḻian in bayongan intau podudui in kobayong intau inta iniap tungkuḷ intua. Bayongan intau moguboḻi pinodudui kon onu inta ain sinantú, sinimbang podudui in simbangan inta pinaké. Kon bonu in pinogiapan tatua pinais in kobayong intau ḷoḷaki inta umur doyowa nopuḷú notaong bo namonik in 603.550 in kobayongnea.

²⁷3.400 nokilo nongkon kobayong in saḷaka tatua in pinaké pinogaid kon aip in oigi in Ḷoḷaigan i TUHAN bo kaeng toḻipoinea in ḷoḻingkopnea. Batúan in aip tatua kobogatnea in 34 nokilo.

²⁸Bo ki agat in saḷaka tatua inta 30 nokilo in pinomia i Bezaleel tondoḷ bo kokaud mita in oiginea mita, bo taḷob in ubung in oigi mita tatua.

²⁹Porunggu inta pinosumba kon i TUHAN kobayongnea in 2.425 nokilo.

³⁰Porunggu tatua pinaké pinogaid kon aip in ḷoḻingkop in Ḷoḷaigan i TUHAN, mezbah takin kawa porunggu inta ain sinontoḷatak, bayongan touḷut in mezbah,

³¹aip in ḻeag inta pinoḻibu kon bosínea bo kon ngara moḷoben, bayongan oigi in Ḷoḷaigan bo kon ḻibu mita in bosínea.