Read Mongondow IḶUAIAN 39 Bible Online

IḶUAIAN 39 - Mongondow bible

IḶUAIAN 39

¹Ki Bezaleel bo ki Aholiab nodagum kon pakeang pakéon kon ibada, pinomia monia nongkon kaeng wol nobidu, nokamumu bo nopura sin pakéon in imang kon dodai in mosia mopobayá in oaidan monia kon bonu in Yuang Motusi. Pakeang in imang inta pakéon i Harun pinomia ná inta pinarenta i TUHAN kon i Musa.

²Epod pinomia nongkon kaeng linen moaḷus, wol nobidu, nokamumu bo nopura, bo siningkoi buḷawan.

³Mosia nonontaḷ kon sibatúan in buḷawan bodongka pinongko-pongkó monia pinomia siningkoi inta moaḷus, bo dongka ginaboḷ pinoyotakin in kaeng linen moaḷus bo wol nobidu, nokamumu bo nopura.

⁴Nopaḷut mako kon tua pinomiaan doman kon doyowa in tali obaga inta nobaḻí tontogot in epod inta pinopodagum kon sínea.

⁵Baan inta ginaboḷ kino aḷus musti pomiaan nongkon touḷut inta motongkai bo popodagum kon epod tatua dá motobatúdon ná podudui kon inta ain pinarenta i TUHAN kon i Musa.

⁶Mosia nogatá kon batu delima bodongka pinopobonu monia kon bongkow buḷawan. Kinurig monia kinopira in tangoi adí mita i Yakub inta mopuḷú bodoyowá kon batu tatua.

⁷Onda intua batu mita tatua pinopotuogdon kon tontogot in obaga in epod mobaḻí tomponuot in tompoingat kon suku Israel inta mopuḷú bodoyowá, ná inta pinarenta i TUHAN kon i Musa.

⁸Ki Bezaleel bo ki Aholiab nomia kon oḻingoi in dodob nongkon touḷut inta notongkai in touḷut inta pinomia epod, bo sinuji doman kinotongkai.

⁹Sinonggopat bo kinopí doyowa, kooḷad bo kobanatnea tumpaḷa tododoyowa nopuḷú bodoyowá nosenti.

¹⁰Kon oḻingoi in dodob tatua pinokompit monia in opat nopipid in batu permata. Kon pipid inta muna pinakéan monia in batu delima, topas bo baiduri sepah.

¹¹Kon pipid nogindua in zamrud, batu nilam bo intan.

¹²Kon pipid nogintoḷu in batu lazuardi, akik bo batu kecubung.

¹³Kon pipid noginggopat in batu pirus, yakut, bo ratna cempaka. Batu permata mopuḷú bodoyowá tatua sinogot in buḷawan.

¹⁴Kon batúan in batu permata inurig in tangoi i adí i Yakub tobatú inta kon sigad in mopuḷú bodoyowá mobaḻí tomponuot in tompoingat kon suku mita Israel.

¹⁵Bo nomia kon rante nongkon buḷawan taakan inta iḷubid ná tontogot.

¹⁶Pinomia doman in ḻingkit buḷawan doyowa inta pinoḷutud kon ubung doyowa in oḻingoi in dodob tatua.

¹⁷Bo rante buḷawan doyowa tatua pinobonu kon ḻingkit mita tatua,

¹⁸bo ubungnea doyowa ibanea pinopotogot kon bongkow doyowa, dá oḻingoi in dodob tatua motaaudon poyoguputon takin dotá in muna in tontogot obaga inta nongkon epod.

¹⁹Bodongka pinomia bui in ḻingkit buḷawan doyowa inta pinopoḷutud kon oḻingoi in dodob tatua, kon ubungnea kon ḻimonag dotá in bonunea inta kinodoyotan in epod.

²⁰Nopaḷut mako kon tua pinomia doman in ḻingkit buḷawan doyowa inta pinoḷutud kon dotá in muna kon tontogot obaga doyowa in epod, kon diug in pinotondoḷan kon pinodaguman kinoḻin onag, kon ḻimonik in baan inta ginaboḷ kino aḷus.

²¹Podudui in parenta i TUHAN kon i Musa, ḻingkit oḻingoi in dodob poyotondoḷon in tontogot nobidu kon ḻingkit in epod, dá oḻingoi in dodob tatua umuran moiukat mako kon ḻimonik in baan bo diá moḷuat.

²²Jubah inta iḷutud kon ḻimonik in epod, komintanbí pinomia nongkon wol nobidu.

²³Bubú in sigogownea inirigonan in pita inaboḷ sinbá diá mogampang moberak.

²⁴Kon ḻibu-ḻibu in bingkínea mita kon dotá in ḻimonag pinomiaan kon ḷambá ná bungai in delima inta pinomia nongkon kaeng linen moaḷus bo wol nobidu, nokamumu bo nopura, bo pinoyoḻimban in giring-giring buḷawan, podudui in parenta i TUHAN kon i Musa.

²⁷Mosia in nomia doman kon ḷambung kon i Harun bo kon i adínea mita,

²⁸suruban doman, destar bo soḷana nopoḷok nongkon kaeng linen,

²⁹bo baan nongkon kaeng linen moaḷus, wol nobidu, nokamumu bo nopura, bo pinosujian doman kon ḷambánea, ná inta pinarenta i TUHAN kon i Musa.

³⁰Pinomiaan doman kon ḷambá nongkon buḷawan totokea, nobaḻí tomponuot kon mosia aindon sinondí sin mogundoi kon i TUHAN. Kon ḷambá tatua inukirdon in tosingogon tanaa “Sinondí mogundoi kon i TUHAN”

³¹Ḷambá tatua pinokompit kon suruban inta kon dotá in munanea, pinodudui kon parenta i TUHAN kon i Musa.

³²Kinotontumiannea noḷapatdon in bayongan oaidan momia kon Ḷoḷaigan i TUHAN. Intau Israel ain nogaid kon bayongan yagi-yagi ná inta pinarenta i TUHAN kon i Musa.

³³Dinia monia in Ḷoḷaigan tatua takin touḷutnea kon i Musa, kokaudnea mita, kayu mita bilabagnea, oigi mita bo aipnea,

³⁴taḷobnea inta nongkon kuḻit in bembé koḷakian inta binoréan nopura, taḷobnea inta nongkon kuḻit moaḷus, kaeng koḷobnea.

³⁵Poti Dodandian inta pinobonuan kon batu doyowa takin kayu tombuḻigan bo taḷobnea,

³⁶meja bo bayongan touḷutnea bo roti sosumba,

³⁷sioḷ in totuduan togá inta nongkon buḷawan totokea, togánea mita takin bayongan touḷutnea, ḷana inta pakéon kon togá,

³⁸mezbah nongkon buḷawan, ḷana inta pakéon kon upacara, dupa mobondu, toḻipoi in ḷoḻingkop in Ḷoḷaigan,

³⁹mezbah porunggu takin kawa sinoḷatak inta pinomia nongkon porunggu, kayu tombuḻigan bo bayongan touḷutnea; tampat in tubig ponondaritan takin aipnea,

⁴⁰ḻeag mita inta pakéon kon bosínea bo oiginea mita takin aipnea, toḻipoi in ngara bosínea takin tontogotnea mita, oigi mita in Ḷoḷaigan; bayongan in pakakat inta pinaké kon bonu in Ḷoḷaigan,

⁴¹bo pakeang imang inta pakéon kon ibada kon dodai in mosia mogaid kon oaidan monia kon bonu in Yuang Motusi bo pakeang inta tongá sinantú kon i Harun bo kon i adínea mita.

⁴²Intau mita in Israel ain nogaid kon tua mita notongkai ná inta pinoki aid i TUHAN kon i Musa.

⁴³Pinirikisa i Musa intua komintan bo inindoianneamai yo inaidan monia intua notongkai totok ná inta ain pinoki aid i TUHAN. Bo binarakatandon i Musa in mosia.