Read Mongondow IḶUAIAN 40 Bible Online

IḶUAIAN 40 - Mongondow bible

IḶUAIAN 40

¹Ki TUHAN noguman kon i Musa,

²“Posindogdon in Ḷoḷaigan-Ku kon tanggal imitánea kon buḷan dungkuḷ.

³Diadon potuot in Poti Dodandian inta pinobonuan kon Parenta Mopuḷú bo popokoḷobdon in kaeng koḷobnea kon munanea.

⁴Ukatdon in meja takin touḷutnea mita. Potuot domandon in sioḷ in totuduan togá bo poyongkitdon in togánea.

⁵Ukatdon in mezbah buḷawan pototubáan kon dupa kon tayowon in Poti Dodandian, bo popobambédon in toḻipoi kon ḷoḻingkop in Ḷoḷaigan.

⁶Ukatdon in mezbah pototubáan kon kuruban kon tayowon ḷoḻingkop in Ḷoḷaigan.

⁷Ukatdon in tampat in tubig kon sigad in Ḷoḷaigan bo mezbah tatua, bo bonuaidon in tubig.

⁸Onda intua bambédon in ḻeag poḻibu kon bosí in Ḷoḷaigan, bo popobambé domandon in toḻipoi ngara in bosínea.

⁹Onda intua Ḷoḷaigan bo bayongan touḷutnea musti posumbamu kon i-Nakó takin mopoḻepo in ḷana upacara, dá tua komintan tongábí ogoi kon i-Nakó.

¹⁰Posumbadon in mezbah bo bayongan touḷutnea ná tatua, sinbá bayongan intua tongádon ogoi kon i-Nakó.

¹¹Natua doman in pomiaanmu kon tampat in tubig bo aipnea.

¹²Mopaḷut mako kon tua, potabádon in ki Harun bo ki adínea mita mamangoi kon ngara in Ḷoḷaigan bo mondarit kon awak.

¹³Ḷutudaidon in pakeang imang kon i Harun, bo butakaidon in ḷana upacara in sia sinbá sia tantúondon tongá mogundoi kon oaidan-Ku mobaḻí imang.

¹⁴Bo potabádon in ki adínea mita dimiug, bo ḷutudaidon in ḷambung in mosia.

¹⁵Bo butakai domandon in ḷana in mosia ná ki amá monia, sinbá mosia mobaḻí doman imang inta mogundoi kon i-Nakó. Pinongin mopobutak in ḷana ná tatua, suku monia in umurandon mobaḻí imang modapot kon adí bo ompu monia”.

¹⁶Inaidan i Musa in bayongan tatua pinodudui kon ná inta pinarenta i TUHAN.

¹⁷Dá kon tanggal imitánea kon buḷan dungkuḷ kon taong nogindua naonda in bangusa Israel nonaḷámai kon butá in Mesir, Ḷoḷaigan i TUHAN pinosindogdon.

¹⁸Ki Musa nogukat kon aipnea mita, noposindog in tombaḷoinea mita, nopoyoguḻitdon in kayu mita bilabagnea, bo noposindogdon in oiginea mita.

¹⁹Bo binukáneadon atop in Ḷoḷaigan takin taḷob in dotá in ḷuai ná inta ain pinarenta i TUHAN.

²⁰Onda intua batu doyowa tatua pinobonunea kon bonu in Poti Dodandian. Bo ki Musa nopotaḷobdon in taḷob in Poti tatua bo pinoḷutudneadon in kayu tombuḻigannea kon bonu in ḻingkitnea.

²¹Bo Poti tatua pinotuotneadon kon bonu in Ḷoḷaigan tatua bo binambéneadon in kaeng koḷubung kon tayowonnea, ná inta pinarenta i TUHAN kon inia.

²²Onda intua inukatdon i Musa in meja kon bonu in Ḷoḷaigan, kon dotá in utuan inta kon dotá in ḷuai in toḻipoi,

²³bo kon tudu in meja tatua inukatdon in roti sosumba, notongkai ná inta pinarenta i TUHAN kon i nia.

²⁴Sioḷ totuduan in togá inukatnea domandon kon bonu in Ḷoḷaigan, kon dotá in toḷatan, noyogintayow in meja tatua,

²⁵bodongka pinoyongkit in togá mita tatua kon tayowon i TUHAN.

²⁶Mezbah buḷawan inukatneadon kon bonu in Ḷoḷaigan, kon tayowon in kaeng,

²⁷bo sinubánea in dupa mobondu ná inta ain pinarenta i TUHAN kon i Musa.

²⁸Binambé domandon i Musa in toḻipoi ngara in Ḷoḷaigan,

²⁹bo kon tayowon ngara tatua inukatneadon in mezbah sin potuduan kon kuruban tubáan. Kon tudu in mezbah tatua pinosumbaneadon in kuruban sinubá bo kuruban sosumba.

³⁰Porunggu tampat in tubig inukatnea kon sigad in Ḷoḷaigan bo mezbah, bodongka binonuannea in tubig.

³¹Ki Musa, ki Harun bo ki adínea mita mondarit kon ḻima bo sioḷ monia kon tua,

³²pomuḷoi in mosia tumuot kon bonu in Ḷoḷaigan i TUHAN ande dimiug kon mezbah.

³³Kon ḻibu in Ḷoḷaigan bo mezbah tatua inoḻingoian i Musa in ḻeag, bodongka binambénea in toḻipoi ngara in bosínea. Dá noḷapatdon oaidan mita tatua.

³⁴Onda intua noikoḷubungdon monag in goḷom tatua kon Ḷoḷaigan i TUHAN, bo Ḷoḷaigan tatua nobayagdon totok sin ki TUHAN namangoi.

³⁵Tuamai ki Musa in diá notaau sinumuot kon bonu in Ḷoḷaigan tatua.

³⁶Pomuḷoi in goḷom tatua momonik nongkon tudu in Ḷoḷaigan i TUHAN, bangusa Israel mongokai kon ḷoḷaigan monia sin pampingon kon tampat ibanea.

³⁷Táe aka goḷom tatua diá momonik, mosia diábí mobuat nongkon tua.

³⁸Kon tungkuḷ in bangusa Israel umuranpa kon bonu in binayáan monia, yo ki TUHAN kon Ḷoḷaiganbí tatua inta aka singgai dá naonda bo goḷom bo aka doḷom dá naonda bo tuḷú.