Read Mongondow IḶUAIAN 5 Bible Online

IḶUAIAN 5 - Mongondow bible

IḶUAIAN 5

¹Onda intua ki Musa bo ki Harun minayá kon tayowon i datu in Mesir bo noguman, “Nanaa in parenta i TUHAN, ki Allah Israel, ‘Ogoiaidon in kasampatan bangusa-Ku mayá sinbá mosia in motaau moibada kon i-Nakó kon padang gurun.’ ”

²“Ki ine in ki TUHAN tua?” iḻibó i datu. “Nongonu sin pandungonkubímai in Sia bo mobogoi kon bangusa Israel mayá? Diábí kinotaauanku in ki TUHAN tua, bo intau mita Israel in diábí ogoiku mayá.”

³Ki Musa bo ki Harun in noguman, “Ki Allah intau Ibrani ain nokipogontong kon inami. Ogoiaipa in kasampatan in kami mayá in padang gurun inta koyayúnea in toḷu nosinggai in bayáan sinbá motaau moposumba in kuruban kon i TUHAN, ki Allah nami. Aka kami diá mogaid kon tua, yo kami in ḻimodon-Nea in takit ande parang.”

⁴Guman i datu kon i Musa bo kon i Harun, “Nongonu sin pogogaionbí monimu in intau mita tatua kon oaidan monia tua? Potabádon in ata mita tatua mogaid!

⁵Intau mita tatua totokdon in nobarong. Bo naa ibogon monimu sinbá mosia in mogogaidon mogaid!”

⁶Singgaipa doman tatua moḷoḷukad mita in bangusa Mesir bo mandor mita intau Israel nokouḻí kon parenta nongkon i datu,

⁷“Dikadon mobogoi in wawa kon bangusa tatua sin pogaid kon tela. Pomayádon mako in mosia mayá motayak tontaní.

⁸Táe pokiaidaibí doman in mosia in tela inta kobayongnea ná doman inta muna, donaai gaatan. Mosia tua in intau mita maḷat; tuamai mosia in umuran mongunsingog sinbá ogoi in mosia mayá sin moposumba in kuruban kon i Allah monia.

⁹Pakisadon totok intau mita tatua mogaid, sinbá mosia tantú mogaid kon oaidan monia bo diádon in kasampatan monia mokidongog kon ouman mita inta diá totuu.”

¹⁰Moḷoḷukad mita in bangusa Mesir bo mandor mita Israel tatua iḻumuai bo noguman kon intau mita Israel, “Datu in nomarenta sinbá moiko in diádon ogoian in wawa.

¹¹Moiko in musti motayak tontaní kon ondakabí, táe pokotorop, tela inta aidan monimu in diábí motaau mogaat in kobayongnea kon ná inta muna.”

¹²Dá minayádon intau Israel noḻibu kon bayongan butá in Mesir sin mosipun kon wawa.

¹³Moḷoḷukad kon pogaidan mita umuran mondodak sinbá pomuḷoi in singgai mosia mokoaid doman kon tela inta notongkai in kobayongnea ná kon tungkuḷ in mosia inogoian in wawa.

¹⁴Moḷoḷukad kon pogaidan mita tatua momongkug kon mandor mita intau Israel inta pinoki indoian in oaidan tatua poḷat moḻibó, “Nongonu sin masai naa bangusamu in diábí mokoaid kon tela ná koḻipod in kobayongnea?”

¹⁵Bo minayádon in mandor mita tatua kon tayowon i datu bo mopongadu in soaḷ tatua, “Nongonu sin ki Tuang momiabí nanaa kon inami?

¹⁶Kami diá inogoian in wawa, táe pakisaan doman mogaid kon tela! Bo naa in kami in binongkug bokaka intaubí mita i Tuang in kitogi taḷá!”

¹⁷Datu in notubag, “Moiko nion in totuu kon maḷat bo doí mogaid. Tuamai moiko mopoigum kon inakó sin mayá moposumba in kuruban kon i TUHANmu.

¹⁸Bayádon pogaid bui. Moiko diábí ogoian in wawa, táe moiko in musti umuran mogaid kon tela inta kobayongnea motongkai ná inta muna.”

¹⁹Kinomangaḻeandon in mandor mita tatua kon mosia kon bonudon in roriga moḷoben sin ain pinoguman kon i monia kon intau mita Israel musti mogaid kon tela inta kobayongnea in diá mogaat kon ná inta aindon inaidanmai monia koḻipod.

²⁰Naonda in mosia iḻumuai nongkon komaḻig, mosia in noyodungkuḷ i Musa bo i Harun inta mogoḷatmai kon i monia.

²¹Dá mandor mita tatua in noguman, “Kinotaauanbí i TUHAN in oaidmu nion! Hukumondon i TUHAN in moiko! Popisídon in moiko dá kami in kinodoídon i datu bo pogawainea, dapot in mosia moḻimodon kon inami.”

²²Bo ki Musa minayá kon tayowon i TUHAN bui bo noguman, “TUHAN, nongonu sin bangusa Israel pomiaan-Mubí námai tua in kororaatnea? Nongonu sin pinotabá-Mubí mangoi kon naa in akuoi?

²³Pinangkoi akuoi namangoi kon tayowon i datu bo nosingog pinodoyon kon tangoi-Mu, yo ki datu totokdon in momogutú kon bangusa tanaa. Bo Iko tongá doman kibio-biómai, diábí motuḷung kon i monia.”

²⁴Bo ki TUHAN in noguman kon i Musa, “Tanaa in ontongonmudon onu in pomiaan-Ku kon i datu. Dodakan-Kubí totok in sia sinbá pomayáneadon mako in bangusa-Ku ḷumuai. Totuubí, kon totokbí in dodakan-Ku in sia sinbá poguntunoneadon in mosia nongkon butá tanaa.”