Read Mongondow IḶUAIAN 6 Bible Online

IḶUAIAN 6 - Mongondow bible

IḶUAIAN 6

¹Ki Allah in noguman kon i Musa, kai-Nia, “Akuoi naa in ki TUHAN.

²Akuoi nokipogontong kon i Abraham, kon i Ishak bo kon i Yakub mobaḻí ki Allah Inta Totok in Mokawasa, táe Akuoi in diábí ginumuman kon i monia takin tangoi ki ‘TUHAN’.[7]

³Akuoi nomia doman kon dodandian takin i monia. Akuoi nodandi kon Akuoi in mobogoi kon butá in Kanaan kon i monia, butá tampat kinobiagan monia nobaḻí intau ango-angoi.

⁴Kinodongogan-Kudon in amui intau Israel inta sinonggata in intau in Mesir, bo kinotoropan-Kudon in dandi-Ku tatua.

⁵Dá potaaudon kon bangusa Israel kon Akuoi ain noguman: Akuoi naa in ki TUHAN; moiko in pilatan-Ku nongkon pinononggataan in bangusa Mesir. Akuoi in mopoontongdon in kawasa-Ku inta motoyang sin moposaḷamat kon i monimu bo mopoḷabú in hukuman inta mobogat kon bangusa Mesir.

⁶Moiko in baḻíon-Ku umat-Ku, bo Akuoi in mobaḻí ki Allahmu. Dá kotaauandon monimu kon Akuoi naa in ki TUHAN, Allahmu, inta nopoḷuat kon i monimu nongkon pinononggataan kon Mesir.

⁷Moiko in diaan-Ku mayá in butá inta pinodandi-Ku takin nongibot kon i Abraham, kon i Ishak bo kon i Yakub; butá tatua in ogoi-Ku kon inimu mobaḻí kapunyaanmu tontaní. Akuoi naa in ki TUHAN.”

⁸Bayongan koyow i TUHAN tatua pinotaau i Musa kon bangusa Israel, táe mosia in doí mopandungmai kon i Musa, sin pinononggataan inta totok in moraat tatua ain nokoinggamádon kon kamang monia.

⁹Onda intua ki TUHAN noguman kon i Musa,

¹⁰“Bayádon kon tayowon i datu in Mesir bo poguman kon mustibí ogoinea in bangusa Israel monaḷámai kon butánea.”

¹¹Táe ki Musa in notubag, “Intau Israel tontaní doí mokidongog kon inakó. Yo umpaka dá ki datu in Mesir moibog mokidongog kon intau inta diá motoḻindat ná akuoi naa?”

¹²Natuata in pinopopotabá i TUHAN kon i Musa bo kon i Harun sin mopotaau kon bangusa Israel bo kon i datu in Mesir kon mosia in pinotabábí i TUHAN modia kon intau in Israel ḷumuai nongkon butá in Mesir.

¹³Naa in mogoguyang i Musa bo i Harun: Ki Ruben, ki adí guya-guyang i Yakub, kogadí kon adí ḷoḷaki opat: ki Henokh, ki Palu, ki Hezron, bo ki Karmi. Mosia tua in mogoguyang in suku i Ruben.

¹⁴Ki Simeon bo ki buḷoinea inta bobay in Kanaan kogadí kon adí ḷoḷaki onom: Ki Yemuel, ki Yamin, ki Ohad, ki Yakhin, ki Zohar bo ki Saul. Mosia tua in mogoguyang in suku Simeon.

¹⁵Ki Lewi kogadí kon adí ḷoḷaki toḷu: ki Gerson, ki Kehat bo ki Merari; mosia tua in nobaḻí mogoguyang in suku Lewi. Umur i Lewi in 137 notaong.

¹⁶Ki Gerson kogadí kon adí ḷoḷaki doyowa: ki Libni bo ki Simei; nobarong in buí monia.

¹⁷Ki Kehat kogadí kon adí ḷoḷaki opat: ki Amram, ki Yizhar, ki Hebron bo ki Uziel. Umur i Kehat 133 notaong.

¹⁸Ki Merari kogadí kon adí ḷoḷaki doyowa: Ki Mahli bo ki Musi. Tuata in inanakan in suku Lewi takin buí mita monia.

¹⁹Ki Amran in notonibuḷoi i Yokhebed, ki ai-ai bobay i amánea, bo ki adí monia in ki Harun bo ki Musa. Umur i Amran in 137 notaong.

²⁰Ki Yizhar kogadí kon adí ḷoḷaki toḷu: ki Korah, ki Nepeg bo ki Zikhri.

²¹Ki Uziel doman kogadí kon adí ḷoḷaki toḷu: ki Misael, ki Elsapan bo ki Sitri.

²²Ki Harun notonibuḷoi i Eliseba, ki adí bobay i Aminadab; ki Eliseba in mogutat doman i Nahason. Ki Eliseba nopononggadí kon i Nadab, Abihu, Eleazer bo kon i Itamar.

²³Ki Korah kogadí kon adí ḷoḷaki toḷu: ki Asir, ki Elkana bo ki Abiasap. Mosia tua in mogoguyang nai Korah.

²⁴Ki Eleazer, adí ḷoḷaki i Harun, notonibuḷoi i adí i Putiel tobatú, bo ki adí monia tua in ki Pinehas. Tuata in bayongan tongguḷu in inanakan bo tongguḷu in baḷoi in suku Lewi.

²⁵Ki Harun bo ki Musa tuata inta pinarentaan i TUHAN modia kon intau mita Israel ḷumuai nongkon butá in Mesir.

²⁶Taya dua minayá kon tayowon i datu in Mesir sinbá sia mopoḷuatdon kon intau israel.

²⁷Tungkuḷ in ki TUHAN noyosingog i Musa kon Mesir,

²⁸Ki TUHAN noguman, “Akuoi naa in ki TUHAN. Potaaudon kon i datu in Mesir in bayongan inta ain pinoguman-Ku kon inimu.”

²⁹Táe ki Musa in notubag, “TUHAN, kinotaauan-Mudon kon akuoi naa in diá motoḻindat mosingog. Dá umpaka yo ki datu moibog mokidongog kon inakó?”