Read Mongondow IḶUAIAN 8 Bible Online

IḶUAIAN 8 - Mongondow bible

IḶUAIAN 8

¹Bo ki TUHAN noguman kon i Musa, “Bayádon kon tayowon i datu bo potaaudon kon inia in koyow-Ku tanaa: ‘Ogoidon in umat-Ku tua mayá sin moibada kon i-Nakó.

²Aka diá duduianmu, yo butá tanaa in puḻinganku in tumpaḷak mobaḻí hukuman.

³Ongkag in Nil in mopuḻingbí in tumpaḷak, dapot in mahaḷuk mita tatua ḷumuai nongkon tubig bo tumuot kon bonu in komaḻigmu, kon bonu in gopot potosiuganmu, kon bonu in baḷoi mita intau moḷoben bo rayat, modapot kon pototubáan kon roti bo pansi mita.

⁴Tumpaḷak mita tatua in ḷumansik bo monomponik kon inimu, bo kon bayongan intau moḷobenmu bo rayat.’ ”

⁵Ki TUHAN noguman kon i Musa, “Potabádon in ki Harun motonggó kon tungkudnea kon tombutungmai in ongkag mita, got mita bo tabang mita sinbá tumpaḷak mita tatua moitukatdon mita bo mopuḻingdon butá in Mesir.”

⁶Dá ki Harun nopotonggó domandon in tungkudnea kon tombutung in bayongan tubig, bo noitukatdon in tumpaḷak mita nomuḻing kon bayongan butá tatua.

⁷Táe mososihir mita nomaké doman in sinotaau monia, bo pinomia doman monia in tumpaḷak mita nongoitukat nongkon butá tatua.

⁸Datu nogoiní kon i Musa bo kon i Harun, bo noguman, “Posambayangdon kon i TUHAN sinbá Sia in monginggamádon kon tumpaḷak mita tanaa, bá ogoikudon in bangusamu mayá sin moposumba in kuruban kon i TUHAN.”

⁹Ki Musa in notubag, “Takin sanang in gina akuoi in mosambayang sin podudui in oigum i Tuangku. Tantúdon in wakutunea, bá sambayangankudon in ki Tuang, pogawai mita moḷantud i Tuangku bo rayat. Dá tumpaḷak mita tatua in inggamáandon nongkon tayowonmu, nongkon baḷoimu, bo diádon in kiagatnea, koḻikudon inta kon Ongkag in Nil.”

¹⁰Tubag i datu tatua, “Sambayangaidon akuoi in ikoḷom.” Guman i Musa, “Aidankubí onu in poigumon i Tuangku. Dá kotaauandon i Tuangku kon diábí in ki Allah ibanea ná ki TUHAN, ki Allah nami.

¹¹Sia in momilatbí kon i Tuangku, kon pogawai mita moḷantud i Tuangku bo rayat nongkon tumpaḷak mita tatua. Diá bidon in tumpaḷak mita kon baḷo-baḷoiannea, koḻikud bidon in kon Ongkag in Nil.”

¹²Bo ki Musa bo ki Harun nonaḷámaidon kon i datu. Onda intua ki Musa nosambayang kon i TUHAN sinbá monginggamádon kon tumpaḷak mita inta pinoangoinea kon i datu.

¹³Dinuduian i TUHAN onu in pinoigum i Musa, bo tumpaḷak mita inta kon baḷoi mita, kon bosínea mita bo kon gobá mita nodaitdon minatoi.

¹⁴Intau in Mesir nosipun kon tumpaḷak mita inta ain minatoi tatua, nodapot in nobontu-bonturung, nodapot in bayongan butá tatua nobódon in bongkog.

¹⁵Naonda inontongdon i datu kon tumpaḷak mita tatua minatoidon, sia nokopotontogat bui kon ginanea. Bo ná inta ain pinoguman muna i TUHAN, ki datu in doíbí mopandungmai kon tosingogon i Musa bo i Harun.

¹⁶Ki TUHAN noguman kon i Musa, “Potabádon ki Harun mopomobak in tungkudnea kon butá, dá kon bayongan butá in Mesir ḷobud mobaḷuidon mobaḻí yongit.”

¹⁷Bo ki Harun nopomobakdon i tungkudnea, bo bayongan ḷobud kon Mesir nobaḷui nobaḻí yongit inta noḻibut kon intau bo mahaḷuk.

¹⁸Mososihir mita moramuji doman mopomaké in sinotaau monia sin mopoangoi doman in yongit mita, táe diá nokoaid in mosia. Kon bayongan tampat komintan oyúon in yongit,

¹⁹dapot in mososihir mita tatua noguman kon i datu, “Naa in aidbí i Allah.” Táe ki datu tatua nokopotogatpa doman bui kon gina, bo ná inta ain muna pinoguman i TUHAN, ki datu tatua doí mopandungmai kon tosingogon i Musa bo i Harun.

²⁰Ki TUHAN noguman kon i Musa, “Bayádon in ikoḷom doḷo-doḷom mododop totok mokipodungkuḷ kon i datu kon dodai in sia moponag kon ongkag, bo potaaudon kon inia in tosingogon-Ku tanaa: ‘Ogoidon in umat-Ku mayá moibada kon i-Nakó.

²¹Aka diápa doman ogoimu, dá Akuoi in mopoangoidon in ḷangow kon inimu, kon pogawaimu mita bo kon rayatmu. Baḷoi mita intau in Mesir, nodapot in bayongan butá tanaa mopuḻing in ḷangow.

²²Táe taḻiban-Kubí butá in Gosyen, tampat pinogutunan in umat-Ku. Kon tua in diábí popoangoian-Ku in ḷangow, sinbá kotaauan monimu kon Akuoi, ki TUHAN, in nomia kon tua.

²³Pomiaan-Kubí moyoposi [8] kon sigad in umat-Ku takin rayatmu. Onu inta mokoherang tatua mobaḻídon ikoḷom.’ ”

²⁴Ki TUHAN nopoangoidon in ḷangow inta totok in mobayong kon komaḻig i datu bo kon baḷoi mita in pogawai i datu inta moḷantud. Bayongan butá in Mesir totok in mororiga popisí in ḷangow mita tatua.

²⁵Onda intua ki datu nogoiní kon i Musa bo kon i Harun poḷat noguman, “Bayádon pobogoi in sosumba kuruban kon i Allahmu, táe tongádon kon butá tanaa.”

²⁶“Maníka diá,” tubag i Musa, “sin intau mita in Mesir moyaatbí in gina monia aka mokoontong kon sosumba nami tatua, bo tantú kami in arabonbí monia in batu modapot in matoi.

²⁷Kami in mustibí mayá in padang gurun inta toḷu nosinggai kon bayáan in koyayúnea sin mayá moposumba in kuruban kon i TUHAN Allah nami, ná inta ain pinarenta-Nea kon inami.”

²⁸Ki datu in noguman, “Mopia, ogoikudon moiko mayá in padang gurun sin moposumba in kuruban kon i TUHAN, Allahmu, asaḷbí bo moiko in diá mayá moyayú. Bo toropdon, sambayangai doman in akuoi!”

²⁹Tubag i Musa, “Naonda in akuoi mayá, akuoi ḷagidon mosambayang kon i TUHAN sinbá ikoḷom ḷangow mita tatua monaḷámaidon kon i Tuangku, kon intau pogawai mita moḷantud i Tuang bo kon rayat mita. Táe donaaidon bui monguboḷ kon inami, bo donaaidon moḷamboi kon bangusa Israel mayá sin moposumba in kuruban kon i TUHAN.”

³⁰Ki Musa in nonaḷámaidon kon i datu, bodongka nosambayang kon i TUHAN,

³¹bo inindogogan i TUHAN in sambayang i Musa. Ḷangow mita tatua iḷumayugdon nonaḷámai kon i datu, kon pogawai mita moḷantud i datu bo kon rayat. Diádon tobatúmai in kinotaḷáanpa.

³²Táe tanaa datu buipa doman nokopotontogat kon gina bo diádon inogoinea in bangusa tatua mayá.