Read Mongondow AYUB 10 Bible Online

AYUB 10 - Mongondow bible

AYUB 10

¹Akuoi in mobú bo morongó kon kobiaganku, dá oumanonkudon in roriga in dimukudku.

²Oo Allah, dikadon in akuoi potaḷáan-Mu; insilangaidon nongonu sin akuoi in iḷawang-Mubí.

³Onubí in untungnea aka Iko mopororiga nanaa, bo moḷumbú kon inta pinomia-Mu tontaní? Onubí in untungnea aka tarimaan-Mu in raian bo tomayá in inta mongoraat mita?

⁴Poyoyindoi-Mu in diábí notongkai ná poyoyindoi in intau

⁵bo umur-Mu in diábí ná kopoḷok in umurnea.

⁶Aka natua, nongonu sin tayakon-Mubí in bayongan dosaku? nongonu sin aḷowan-Mubí in pomuḷoi in taḷáku?

⁷Sabanarnea in kinotaauan-Mubí bo nosadar, kon akuoi in diá kotaḷá, táe nobanarbí. Kinotaauan-Mubí kon tobatúmai intau diábí in mokotongod in moposaḷamat kon inakó nongkon kawasa-Mu.

⁸Akuoi naa in pinomiabí in ḻima-Mu, umpaka yo tanaa[21] yopúon-Mu in akuoi?

⁹Toropdon kon nongkon butá ḷamentong[22] Pinomia-Mu in akuoi! Umpaka yo baḻíon-Mu bui in akuoi ḷobud?

¹⁰Inogoi-Mu in ki amáku nomia kon inakó bo binaḻí-Mu in akuoi noḷoben kon bonu in bobuḷadían i ináku.

¹¹Awakku pinosindog-Mu kon tuḷan bo pinakéan in ugat; tuḷanku in inoḻitan-Mu in tapú bo binakut in kuḻit.

¹²Inogoian-Mu in akuoi in kobiagan; kinotabi-Mu in akuoi, dimukudku iḷukadan-Mu pinongin pomomiag-Mu.

¹³Táe tanaa in kinotaauankudon kon tua in kino oonggot, inumuni-uni aindon pinomia-Mu in boditoku.

¹⁴Iḷukadan-Mu in akuoi dika-dikabo mogaid kon noitaḷá sinbá diá ogoian-Mu in pongampungan.

¹⁵Aka akuoi mogaid kon dosa, dá nasibku in totuudon kon mobodito! Táe aka aidku diá in noitaḷá, umuranbí doman in akuoi inanggap nomia kon dosa! Diá mokobaḻí in akuoi ḷumangag, sin morobonod in gina bo ná siningkuḻe.[23]

¹⁶Aka kodapotanku onu in inaidanku, umpaka diá moḷoben, Iko mogaḷow kon inakó naonda bo singa. Bo poontong-Mu bui in kawasa-Mu, tongábí mopogogondok kon inakó.

¹⁷Umuran poangoi-Mu in sakusi moḷawang kon inakó; bo modugangdon moḷoben in torú-Mu kon inakó. Potabá-Mu in tontara mita mobagu sin monubu bo momarang kon inakó.

¹⁸Nongonu sin pinomayá-Mubí in akuoi pinononggadí kon dunia? Mopia-piabí kon minatoi in akuoi kon dodai in diápa inontong in intau!

¹⁹Dá naonda bo diá dodai in onda in akuoi pinononggadí, sin nongkon bonu in bobuḷadían baḷúdon iḷobong.

²⁰Ah, diádon moonggot bo matoi in akuoi, dá pomayádon mako in akuoi tontaní, sinbá korasaankupa in kobiaganku inta kiagatneapa tanaa.

²¹Diádon moonggot mayá in akuoi bo diádon mobui mangoi, mopobayá in dunia inta mosindip bo modingungui totok,

²²dunia inta mosindip, nopuḻing in oḻinow bo notombauk, bayag notongkai in pungit.”