Read Mongondow AYUB 11 Bible Online

AYUB 11 - Mongondow bible

AYUB 11

¹Onda intua ki Zopar in noguman, “Degá ouman inta diá in mangaḻenea tua in musti tubagan? Musti degá intau inta mobayong in singog tua in popobanar?

³Ayub, kainimukamai dá kami in diá mokotubag kon inimu? Inanggapmu in kami naa in kibio-biómai popisí in singkuḻemu?

⁴Podudui in raianmu tosingogonmu mita tatua in diábí noitaḷá; aka kon raianmu iko in nodaritbí kon tayowon i Allah.

⁵Táe, igumon mako ki Allah tontaní in mosingog!

⁶Bo igumon mako popotaauan-Nea in iko, kon hikmat tua in nobayongbí in batangannea, bo diábí komangaḻean in intau. Dá pokosadardon kon rorigamu in diábí tongo onu, poyobandingonmai in hukuman inta patus tarimaanmu.

⁷Umpaka dá kaadaan i Allah in kotaauanmu? Umpaka yo kawasa-Nea in komangaḻeanmu?

⁸Kawasa-Nea in moḷantu-ḷantud nongkon toḷungayá; diábí kogawadanmu bo kogamáanmu. Kawasa-Nea in moona-onag nongkon dunia in intau minatoi, totokbí in diá komangaḻeanmu.

⁹Kawasa i Allah in moḷobe-ḷoben nongkon dunia, bo mooḷa-oḷad nongkon baḷangon.

¹⁰Aka domokon-Nea bo diaan in iko kon mahkama-Nea, yo ki ine in mokobaḻí moḷamboi kon aid-Nea?

¹¹Kotaauanbí i Allah in intau inta moibog monguboḷ; aid moraat monia modaitbí ontongon-Nea.

¹²Aka ki iná in keledai ḷoḷog mopononggadí in keledai inta moyonok, bain tuata bo intau bodok mobaḻí mobijak.

¹³Ayub, daritaidon in ginamu, pomanasaḷdon! Posambayangdon kon i Allah!

¹⁴Inggamáaidon in dosa nongkon ginamu bo poyayúdon inta moraat nongkon baḷoimu!

¹⁵Dá iko in motaaudon tumayow kon kobiagan takin motaba bo moroton; iko in simindog bidon motorindog bo diá bidon umuran moḻia-ḻiaw in gina,

¹⁶modapot in rorigamu diá bidon kotoropanmu; naonda bo ḷunud inta nomiot, kinoḻiongandon in intau.

¹⁷Kobiaganmu in mobaya-bayagdon nongkon singgai, bo kobiaganmu inta mosindip in nádon onda bo kobayag in sindar doḷo-doḷom.

¹⁸Iko in moroton bo nopuḻing in kamang; Ki Allah in moḷukadbí kon inimu dá moaman in iko.

¹⁹Iko in diá bidon moondok kon musung; mobayong in intau in mopoigum in totuḷung kon inimu.

²⁰Táe intau moraat in moindoibí takin motoboḻingo, sin kon i monia in diábí in totuḷung. Totobatú in kamang monia tuata in popatoi ḷagidon moiangoi.”