Read Mongondow AYUB 12 Bible Online

AYUB 12 - Mongondow bible

AYUB 12

¹Ki Ayub in notubag, “Totuubí, moiko nion in nobaḻí oḻit in intau. Aka moiko matoi, yo hikmat in matoibí doman.

³Akuoi in intaubí doman inta koakaḷ; bayongan inta siningog monimu tua in kinomangaḻeanku bidon. Apadoman, ki inebí in diá nonotaau kon tua komintan? Dá, dikabí kaimonimu kamai in noiḻiubí in moiko kon inakó!

⁴Akuoi naa in kinosingan in yobayat bo totakin, bokaka akuoi naa in nobanarbí bo diábí in taḷá. Dungkuḷmai sinubagan i Allah in sambayangku, aka akuoi mokuani mokituḷung.

⁵Moiko moningkuḻe kon intau nobodito, bo kobiaganmu in moaman; intau inta gogiódon moḷabú binongkugpa doman monimu.

⁶Táe kobiagan in mogogagow diábí ginogondok; intau inta mokobaḻí monontot kon i Allah, mobiag motompia. Bokaka dewa inta pongata-ngata monia, tongábí ropot monia tontaní.

⁷Poḻibódon kon ḷagapan bo biag ibanea dá moiko in ogoianbí monia in totundú.

⁸Poigumdon kon insilang kon mahaḷuk kon butá bo kon dagat, dá mokouḻíbí in moiko kon intarangnea.

⁹Ki ine in kon sigad intua komintan in diá nonotaau, kon inta nomia kon i monia tua in ki Allahbí tontaní?

¹⁰Sia in nonompia kon kobiagan in bayongan mahaḷuk; Sia in kitogi kawasa kon nyawa in batúan intau.

¹¹Naonda bo diláku moibog monanam kon kaanon inta mopia, natua doman in bongoḷanku moibog mokidongog kon tosingogon.

¹²Habarnea, hikmat in oyúon kon intau inta noonggotdon in kinobiagannea, táe hikmat bo ropot in tongábí oyúon kon i Allah. Kai monia in komomangaḻe in oyúon kon intau inta noonggotdon in kinobiagan, tongá komomangaḻe bo hak in tongábí oyúon kon i Allah!

¹⁴Onu in kinokai-Nea diábí motaau posindogon bui ki ine in dinakop-Nea diá bidon mokoḷuat bui.

¹⁵Sia in nodimpot kon tubig, dá noingkagdon komintan; Sia in nomukat, dá ḷunud in namuntag!

¹⁶Ki Allah tua in moropot, moroton bo ponango-nangoian! Ki inta mongonguboḷ bo ki inta kino uboḷan kon bonubí in kawasa-Nea.

¹⁷Irabut-Nea in hikmat kon pomarenta mita inta nongawasa, bo itoi mita binaḻí-Neadon kosingan in intau.

¹⁸Iḻitoi-Nea in datu bo dinakop-Nea in mosia;

¹⁹pinoompá-Nea in imang mita bo guhanga mita.

²⁰Pinomponan-Nea in bibig in intau inta motoḻindat mosingog, irabut-Nea in hikmat in guyanga mita.

²¹Pinokopo oyá-Neamai in intau inta ihoromatmai; ginamá-Nea in hak monia mongawasa.

²²Sinimbayagan-Nea in tampat mita inta nodingungui; sinindaran-Nea in oḻinow mita inta morondí bo mosindip.

²³Bangusa mita binaḻí-Nea nodugang bo nobiag notompia, bo pinutúan-Nea in mosia dapot in norimumud.

²⁴Binaḻí-Nea in itoi mita notoboḻingo, dá minayá in mosia takin diá kotaauan kon onda in bayáan.

²⁵Mosia in mongokap kon bonu in sindip, bo noikuyung mako naonda bo intau noḷoḷangu in oinumon.