Read Mongondow AYUB 13 Bible Online

AYUB 13 - Mongondow bible

AYUB 13

¹Bayongan intua nokoimontandon inontong bo dinongogku tontaní, bo totu-totuubí kinomangaḻeanku.

²Onu in kinotaauan monimu, kinotaauankubí doman; dikabí kai monimu kamai akuoi in sinaḷowmu.

³Táe akuoi in moibog moyosingog takin in Inta Totok in Mokawasa; moibog in akuoi mobela kon pelekaraku kon tayowon i Allah.

⁴Sin moiko in nogoḻingoi kon bodokmu takin uboḷ, diá noyoposi in mongongundam mita inta diá totuu.

⁵Aka kuma moiko diá mosingog, dá degá inanggap mobijaksana in moiko.

⁶Dá indongogaidon in bayowku; tondudutku in pinobelaanku.

⁷Motaau degá in moiko monguboḷ podoyon kon i Allah? Motaau degá in moiko mongakaḷ popisí in kopontingan-Nea?

⁸Motaau degá in moiko dumotá kon i Allah, bo moduḷu kon i-Nia mobaḻí pongacara?

⁹Aka ki Allah in monaridi kon inimu, mopia degá in mouḻí? Mokoakaḷ degá in moiko kon i-Nia ná mongakaḷ kon intau?

¹⁰Aka moiko in dumotá, umpaka tongá umuni-uni, moiko in hukumonbí i Allah takin roriga.

¹¹Eta degá kokokawasa i Allah in diá mokotaḻikokog kon dimukudmu? Eta degá kototoyang-Nea in diá mokoponag kon ginamu?

¹²Bayongan in tongginamu naonda bo ḷobud inta diá in baragunanea; pobelaanmu ná butá motobai inta mogampang moitabud.

¹³Tuamai in kibio-biómaidon, biódon mako mosingog in akuoi! Diábí pandungonku onu in tompobuinea!

¹⁴Akuoi[24] mobaranibí in mopotaru in kobiagan!

¹⁵Nopoḷok bidon in raianku sin diádon in kamang! Aka ki Allah in moḻimod kon inakó, diábí nongonu, tongá belaankupa in oaidku kon tayowon-Nea.

¹⁶Degá popisí in baraniku tatua mosaḷamat in akuoi, tuamai intau moraat in diá mokobaḻí tumayow kon i Allah!

¹⁷Tanaa in indongogaidon kopia in tosingogonku; taridiaidon in kataranganku.

¹⁸Nosadia bidon in akuoi mopotaau in pelekaraku; moyakinbí in akuoi, diábí in akuoi motaau potaḷáan!

¹⁹TUHAN, aka Iko in mamangoi bo moponapud kon inakó, yo kibio-biómai in akuoi bo mogoḷat kon kopatoianku.

²⁰Táe indongogaipa in oigumku doyowa naa, sinbá mokobaḻípa in akuoi mamangoi bui kon tayowon-Mu:

²¹pogogaidon in mopororiga kon inakó, bo dikadon popoantugan-Mu in kototoyang-Mu in akuoi!

²²Posingogdon, dá tubagankubí. Andeka pomayádon mako mosingog in akuoi, bo tubagaipa!

²³Tongonu in kobayong in taḷá bo dosa inta inaidanku? Bayongan aidku inta noitabat in poguman-Mukadon!

²⁴Nongonu sin simíbí in Iko bo momarut kon inakó? Nongonu sin inanggap-Mubí in akuoi musung-Mu?

²⁵Akuoi naa in tongábí daun inta nototak inirup in tompot noitaḻib, yo umpaka dá pinourot-Mu in ondok in akuoi! Akuoi naa in tongábí wawa inta noingkag bo noḷaḷow, umpaka dá aḷo-aḷowan-Mu mako in akuoi!

²⁶Sinantú-Mudon in kobiagan inta mopait kon inakó; Sinuḻían-Mu in taḷáku kon dodai in akuoi noguodpa.

²⁷Sioḷku in sinogot-Mu in rante uatoi; bayongan in ḷampangku inindoian-Mu. Nodapot in paḷad in sioḷku, diábí moiḷagui kon mata-Mu.

²⁸Dá noyapakdon in akuoi ná kayu ampod; naonda bo daing kinarat in anoi sinumopad.