Read Mongondow AYUB 14 Bible Online

AYUB 14 - Mongondow bible

AYUB 14

¹Nongkon noitondedépamai intau tua in moyangkóbí, diá kodaya; mopoḷok in kobiagannea bo nopuḻing in roriga.

²Monubu in sia bo moḷaḷow naonda bo bungang; moinggamá naonda bo oḻinow, bodongka mobuḻi.

³Oo Allah, umpaka yo moibog in Iko moindoi kon inakó, bo mopotayow kon inakó kon pongadilan-Mu!

⁴Motaau degá in intau baradosa mokopoangoi kon inta motompod?

⁵Umur in intau ain sinantú-Mu; kobayong in buḷannea ain sinigadan-Mu. Ain doman sinantú-Mu in kodapotan in kobiagannea; diábí doman in sia ḻimimpat kon tua.

⁶Pomayádon mako in sia mogogai, dika tuyayowon in sia; sinbá korasaannea in kobiagannea modapot in mopaḷut in oaidannea.

⁷Oyúonpabí in kamang kon pangkoi in kayu inta ain pinupuḷ; buibí in sia momoḻimping, bo monanga.

⁸Umpaka kon bonu in butá uakatnea moampod, bo tuodnea in moḷaḷow sin nobongkog,

⁹táe aka kotugatan in tubig, mobiagbí bui in sia; naonda bo pinomuḷa inta noguod, poḻimpingnea mita in momukádon bui.

¹⁰Táe aka intau in matoi, modaitdon in oumannea; sia in monaḷámai kon dunia, bo kon onda in bayáannea?

¹¹Naonda bo tubig inta gumabut nongkon bonu in tabang, naonda bo ongkag momiot modapot in modait in tubignea,

¹²natua doman in intau inta ain minatoi: sia in diá bidon mokobangon bui. Sia in diá bidon mokopondam kon wakutu in ḷangit oyúonpa, diá bidon mobango-bangon nongkon pinosiugannea.

¹³Bunidon in akuoi kon bonu in dunia in intau minatoi; oḻiungaidon in akuoi modapot in Iko diádon tumorú bui. Táe tantúdon in wakutu kon monorop kon inakó.

¹⁴Sin, aka intau matoi, mobiag bui degá in sia? Pomuḷoi in singgai akuoi mogoḷat modapot in singgaiku inta mopait tanaa monaḷámai.

¹⁵Dá Iko in mogoiníbí kon inakó, bo akuoi in motubagbí doman; Iko in motabibí bui kon inakó, mahaḷuk inta pinomia-Mu.

¹⁶Bo umuran ḷukadan-Mu in ḷangkadku mita, táe diá bidon indoian-Mumai in dosaku.

¹⁷Dosaku in ampungan-Mu bidon bo posíon-Mu bidon; taḷáku dungkuḷmai in popatan-Mu bidon.

¹⁸Kon singgai moiduduimai buḷud mita in moḻitubí bo positabud, bo buḷud batu inta moroton in mopamping nongkon tampatnea.

¹⁹Batu mita in iiton in tubig inta motorú in koiḻignea; butá in iḻigon in uyan inta morogot. Natuata in pororimumud-Mu kon kamang in intau.

²⁰Sinaḷow-Mu in sia modapot in mononoi; Pinotabá-Mu in sia minayá bo binaḷuian-Mu in batangannea.

²¹Ki adínea mita in nobaḻí intau moḷoben, táe diá kinotaauannea intua. Bo aka mosia mobaḻí mohina, diábí in mopotaau kon inia.

²²Tongábí pomporí in awaknea inta korasaannea; tongábí nakit in gina in moiantug kon inia.”