Read Mongondow AYUB 15 Bible Online

AYUB 15 - Mongondow bible

AYUB 15

¹Dá ki Elipas in notubag, “Diá totuu, Ayub, pandoimu in totuubí kon diá in mangaḻenea! Diábí in intau moarip inta motubag ná iko naa, diábí in sia moduḷu kon inia tontaní takin tosingogon inta diá in mangaḻenea.

⁴Aka kuma bo tosingogonmu tua duduian, dá diábí in tobatúmai in intau in moondok andeka mosambayang bui kon i Allah.

⁵Tosingogonmu mita moponiata kon iko in kotaḷá, táe moraatmu in inoḻingoianmu in ouman diá totuu.

⁶Diá bidon paraḷu in iko poponapudanku bo potaḷáan, sin pinongin tosingogonmu tontaní iko in pinongadu.

⁷Kainimukamai yo iko in intaubí inta muna totok pinononggadí? Oyúon degá in iko kon dodai in buḷud mita binaḻí?

⁸Degá dinongogmu in ki Allah nomia kon tomayá-Nea? Degá tongá iko in oyúon pandoi in intau?

⁹Bayongan inta kinotaauanmu, kinotaauanbí doman nami; Bayongan inta kinomangaḻeanmu notarangbí doman kon inami.

¹⁰Hikmat tanaa in nouḻí nami nongkon intau inta ain uba-ubanan; mosia in oyúondon kon dodai in ki amámu pinononggadí!

¹¹Nongonu sin ḷoḻipoi i Allah in mororigamubí tarimaan? Siningog nami pinongin sabar bo moḷukó pinodoyon kon tangoi-nea.

¹²Táe iko in sinumorú totok, matamu in yumongkit;

¹³Iko in sinumorú kon i Allah bo nomayow kon i-Nia.

¹⁴Degá intau in totokbí in diá kotaḷá? Motaau degá in sia pobanaron kon tayowon i Allah?

¹⁵Nodapot in malaekat diábí doman pirisayaan i Allah; mosia in diábí motusi kon mata-Nea.

¹⁶Apadoman intau inta moraat bo tangoinea in diádon mopia, inta nonginum kon moraat naonda bo tongá tubig.

¹⁷Indongogai Ayub, oyúon in tarangkanonku kon inimu,

¹⁸Onu in sinundú in intau moarip kon inakó. Totundú tatua in sinarimanea nongkon mogoguyangnea bo iningguputan takin diá in ginaatan kon buínea.

¹⁹Tungkuḷ intua diá in intau ango-angoi kon ḻipú monia; diá in nopoḷangkam kon i monia nongkon i Allah.

²⁰Intau moraat inta nondorot kon tumpaḷa intau, in mokorasabí kon ḻia-ḻiaw in gina kinoouput in kobiagannea.

²¹Singog mita inta motoyang inta mokobongoḷ kon bongoḷannea; kon tungkuḷ in noingongow mogogagow namangoi nonubu kon inia.

²²Diádon in kamang kon inia simí nongkon sindip, sin pitow in moḷoḻimod mogaḷow kon inia kon pomuḷoi in kasampatan.

²³Ḷagapan mita mokokaan kon tapú mogoḷat kon wakutu in kopatoiannea, mosia in mokaan kon awaknea. Dá nosadardon in sia kon nodingungui in singgainea moiduduimai.

²⁴Bodito naonda bo datu inta motorindog, ain nosadia modomok kon inia.

²⁵Natuata in nasib in intau inta monayow kon i Allah, bo inta mokobaḻí moḷawang kon i Inta Totok in Mokawasa.

²⁶Takin dinumodia in sia nonubu bo noḷawang kon i Allah; sinonggónea in kaḻeawnea, doíbí in sia taḷowon.

²⁸Sia in nogutun notantú kon kotá mita inta ain nogoguyaat, kon baḷoi mita inta diá in mogogutun. Kotá mita tatua ain sinantú kon umuran mobaḻí rumbunnea.

²⁹Kaoyúonan in intau tatua in mobuḻibí takin diá in paḷotnea; kapunyaannea in modaitbí

³⁰Sia in diábí moiḷagui kon sindip; tuḷú in momokakbí kon tokatnea mita. Moputúbí in sia in tompot nongkon bibig i Allah.

³¹Aka mopirisaya in sia kon inta diá baraguna, koakaḷan in sia; bo tontuḻí inta bain tarimaannea, diá doman in baragunanea.

³²Kon dodai in diápa nodapot in wakutunea, matoi in sia,[25] naonda bo tanga mointok noḷaḷow inta diádon moḷunow bui.

³³Sia naonda bo pangkoi in anggur inta noḷabú in bungainea, naonda bo pangkoi in zaitun inta nototak in toburnea.

³⁴Intau inta moraat diábí mokouḻí kon bui; nodait nopokak in baḷoi inta pinosindognea nongkon onu inta inogoi pinosogó.

³⁵Tuata in mosia inta nonomayá kon inta moraat bo mopoaid intua; uboḷ in umuranbí oyúon kon bonu in ginanea.”