Read Mongondow AYUB 16 Bible Online

AYUB 16 - Mongondow bible

AYUB 16

¹Táe ki Ayub in notubag, “Mokakit in dongogonku in singog natua; ḻipoimu tongábí mokororiga.

³Toonu in moiko mogogai mosingog kon ambungangaḷ? Onu in nokopopisí kon i monimu motubag?

⁴Aka kuma bo moiko nion in akuoi, bo akuoi in moiko, dá motaaubí doman in akuoi mosingog ná tatua. Yagi-yagidon in singogonku; totokbí in momombiḻing akuoi.

⁵Ginamu in irotonankubí in noyagi-yagimai in tongganut; tosingogonku mita in mokoḻipoibí.

⁶Aka akuoi mosingog, rorigaku in diábí mooyong; aka akuoi kibio-biómai, onu in mangaḻenea?

⁷Ki Allah, nopobaḻí kon inakó moyoyiga; bayongan in motoḷuadíku iyopú.

⁸Sia in noḷawang bo nodomok kon inakó. Tanaa in morutukdon totok in awakku, bo kain intau moantó tua in pinoniataan kon akuoi ain binaradosa.

⁹Pinongin torú ki Allah in nomera-merak kon awakku; takin noyaat totok in gina inimindoi in Sia kon inakó.

¹⁰Bukáan in intau mita koḷobenon in bibig monia sin moningkuḻe kon inakó; akuoi iḻibutan bo putongiku in sinokap.

¹¹Ki Allah in nobogoi kon inakó kon intau moraat; akuoi pinogonagnea kon kawasa in intau mokotor.

¹²Koḻipod kobiaganku in noaman bo notompia, táe ki Allah in nodaḻí nonubu kon inakó. Sindunku in dinomok-Nea bo pinogambat in akuoi; binaḻínea in akuoi pobobalajaran ponanaan.

¹³Takin diá in tabi umurannea pioton in akuoi, dá noibuntaradon in bonu in sianku.

¹⁴Sia in nonubu naonda bo intau mopoparang, bo nopobui buimai nonompaḻí kon inakó.

¹⁵Akuoi in nogiḷambung in kinopatoian nobaḻí tomponuot kon morobonoḷ in dodob, bo iḻimitú kon tudu in ḷobud sin sinaḷow.

¹⁶Pogotku inumura sin nongombaḷ, kokiap in mataku nobobagá bo inumuḷow.

¹⁷Táe diábí in akuoi nogaid kon inta moraat; noniata kon motuḻidbí in sambayangku kon i TUHAN.

¹⁸Ei dunia, raat kon inakó dikabí bunion; dika pomayá mako in kuaniku mopoigum in koadilan.

¹⁹Kinotaauanku kon mododuḷuku oyúon kon soroga; Sia in nobaḻí sakusi kon diábí in akuoi binaradosa.

²⁰Akuoi siningkuḻe in yobayatku mita bo kinosingan; koomba-ombaḷ in akuoi bo namangoi kon tayowon i Allah mopoigum in totuḷung.

²¹Ah, igumon mako ki Allah tontaní in moduḷu kon inakó kon tayowon-Nea, naonda bo intau inta totu-totuu motuḷung kon yobayatnea.

²²Taongku mita inta kiagatnea in noyakagdon; topiḻikpa bo mayá in akuoi bo diá bidon mobui mangoi.