Read Mongondow AYUB 17 Bible Online

AYUB 17 - Mongondow bible

AYUB 17

¹Singgai kopatoianku in nodiugdon, gogiódon mobontow in poginaanku; dongkadon poḷoḷobongan in moyotakinku.

²Tososingkuḻe mako in intau in akuoi; inontongku in mosia moguman kon singog posigid.

³Akuoi naa in mojujur, o Allah. Pirisayadon in akuoi! Ki inepa in moginrigon kon tosingogonku?

⁴Iḻingkopan-Mu in gina monia dá diá in mosia momangaḻe; dika modapot in mosia mopokuyung kon inakó in tanaa.

⁵Podudui in singog tango-tangoion, ki ine in mopongadu kon yobayat popisí in motayak kon kauntungan, ki adínea mita tontaní in motarima kon tontuḻí.[26]

⁶Tanaa akuoi in sinigid in singog tango-tangoion tatua, mosia in namangoi sin monduyá kon pogotku.

⁷Mataku in mobuḷoḷow sin mororiga in ginaku; bayongan in awakku rumutuk in momikir.

⁸Intau inta motuḻid, moitaḻikokog bo moherang; intau inta diá kotaḷá, nonganggap kon akuoi naa in diá kotuhan.

⁹Intau inta mopia bo inta diá kotaḷá, moyakindon totok kon kobobiagnea mokosanang kon i Allah.

¹⁰Táe aka kuma bo moiko komintan mamangoi in naa, diádon tobatúmai in intau mobijaksana in mouḻíku.

¹¹Singgaiku mita in noitaḻibdon, diádon nobaḻí in bayongan tomayáku; nobuḻi domandon komintan in bayongan koibog in ginaku.

¹²Táe totakinku mita in moguman, ‘Doḷom tua in singgaibí bo bayag in motoyongdon moiangoi.’ Tongá kinotaauankubí kon bonu in ginaku kon umuranbí mosindip in kaadaanku.

¹³Tongádon dunia in popatoi in mobaḻí kamangku, kon tuata in akuoi mosiug kon bonu in sindip.

¹⁴Poḷoḷobongan kon inakó tangoianku “Ki Amáku”. bo oḷuasi mita mongongarat kon awakku tangoionku “Ki Iná” bo “Ki utatku bobay”.

¹⁵Kon onda in kamang kon inakó; ki ine in mokoontong kon oyúon in kobobiag mopia kon inakó?

¹⁶Aka akuoi[27] moponag kon dunia in intau minatoi, akuoi in diá bidon bui in kamang.”