Read Mongondow AYUB 18 Bible Online

AYUB 18 - Mongondow bible

AYUB 18

¹Dá tubag i Bildad, “Uḻe Ayub, toonu iko in mogogai mosingog? Kibio-biómaidon, bo indongogaipa in tanaa mosingog in kami.

³Nongonu sin kainimu in kami naa in dondunguḷ, bo potongkaionmu in sapi in kami?

⁴Torúmu in tongábí mokotakit kon awakmu. Musti degá tongá popisí in iko dunia naa kobuḻian in intaunea, bo buḷud mita in pampingon nongkon kinoukatannea?

⁵Togá in intau moraat in notantú bidon kon piongon; tuḷúnea in diá bidon poyongki-yongkiton bui.

⁶Bayag kon bonu in ḷoḷaigannea in mokudowdon; togá ponimbayagnea in diá bidon monindar.

⁷Ḷampangnea inta mopia mobaḻídon moipape magí-mako; tomayánea tontaní in mokopopisí kon inia moipintud.

⁸Sia in mopobayá ná pukot dá noitokigdon in sioḷnea.

⁹Singkodnea in noibaaḷ kon ḻikot, dá kinodomokandon in sia.

¹⁰Kon butá, noiadop in potait; kon daḷan, oyúon in bubú bo puḷut.

¹¹Intau moraat sinaḻikokogan in inta mokokoningkim nongkon bayongan tampat; Ondok dinumudui kon inia kon pomuḷoi in ḷampang.

¹²Koḻipod moropot in sia, tanaa in mororigadon in sia; bodito umuran moitakin kon i nia kon ondakabí

¹³Kuḻitnea kinarat in takit inta mororiga; kokaḷ bo sioḷnea in moburuk notombobog.

¹⁴Sia in inagow nongkon ḷoḷaigannea tampatnea inta moaman, bo pinogambat sin mayá tumayow kon popatoi.

¹⁵Tanaa in ki inekabí motaaubí in mogutun kon bonu in ḷoḷaigannea, bo kon tua sinabudan in balerang, ponabang kon takitnea.[28]

¹⁶Uakatnea mita in noingkag bo noḷaot; tanganea mita noingkag bo noḷaḷow.

¹⁷Sia in diá bidon kinotaauan kon bonunea andeka kon ḷuai in kotá; diá bidon in tobatúmai in intau in nokotoropa kon tangoinea.

¹⁸Nongkon nobayag in sia pinoguntun minayá in sindip; nongkon dunia in intau nobiag inuntun in sia.

¹⁹Adí bo buí diá bidon kon inia; kon ḻipúnea diá bidon tobatúmai in kiagatnea.

²⁰Nokodongogmai kon kobobiagnea intau mita kon toyopan noitaḻikokog, bo intau mita inta nogutun kon pomukaan nourot mako sin moondok.

²¹Natuata in kobiagan in intau moraat, mosia inta diá mopandungmai kon i Allah.”