Read Mongondow AYUB 19 Bible Online

AYUB 19 - Mongondow bible

AYUB 19

¹Táe ki Ayub in notubag, “Nongonu sin umuranbí monimu potaḷáan in akuoi, bo rorigaan monimu in tosingogon?

³Mopobui-buimaidon in moiko moningkuḻe kon inakó, bo pogutúon monimu in akuoi takin diá in oyá.

⁴Aka kuma bo noitaḷá in aidku, yo diábí intua mokoporugimai kon i monimu.

⁵Kai monimukamai dá moikobí in mopia-pia in akuoi; rorigaku in inanggap monimu poponiataan in taḷáku.

⁶Pokotaaudon kon akuoi naa in koyogot iroriga i Allah, bo dinomok kon bonu in poyogaḷap-Nea.

⁷Akuoi in nomanseḷ sin iroriga-Nea totok tua, táe diá tobatúmai in intau in nopandungmai kon inakó. “Kon onda in koadilan,” baḷúku, táe diá in nokidongog kon inakó.

⁸Iḷamboian i Allah in daḷanku, diá motaau tumaḻib in akuoi, lorongku mita binaḻí-Nea nosindip totok.

⁹Inagow-Nea komintan in bayongan kapunyaanku, bo tangoiku mopia in pinoguyaat-Nea.

¹⁰Sia in nondangat kon inakó nongkon bayongan tampat, naonda bo intau norabut kon uakat in pinomuḷa, bo pinomayánea mako natua bo noḷaḷow, natuata in pinogogamá-Nea kon bayongan in kamangku.

¹¹Torú i Allah kon inakó dumoko-dokot; akuoi in inanggap-Nea nobaḻí musung-Nea.

¹²Tontara-Nea in nonubu diá koḷamboian; daḷanku iḷamboian, bo ḷoḷaiganku kinopung.

¹³Ginaḷum bo utatku pinoyayú-Nea kon inakó; akuoi in naonda bo intau ango-angoi kon bayongan in intau inta nogogintaauanku.

¹⁴Inanakanku komintan yumayú; yobayatku mita diádon mokotorop kon inakó bui.

¹⁵Bobantungku bobay kinoḻionganneadon in akuoi, ki tuang monia; inanggapnea in akuoi intau inta diá nogogintaauannea.

¹⁶Inoiníku in bobantungku, táe doí in sia sinumubag, umpaka dinondouḷuganku kinopia in sia.

¹⁷Ki buḷoiku doídon mokobó kon poginaanku, kiutatku nogaḷum kon iná bo amá morongó in dimiug kon inakó.

¹⁸Akuoi in siningkuḻe in mongoadí mita kon daḷan; aka akuoi simindog, akuoi kosingan.

¹⁹Mokoontong kon inakó yobayatku modagin morongó; akuoi sinaḷáan monia inta kinotabiku.

²⁰Awakku dongkadon kuḻit nobakut kon tuḷan. Gogiódon akuoi matoi bo dimukudku in mayá.

²¹Uḻe yobayatku mita, kotabipa in akuoi, sin ḻima i Allah nosambok kon inakó.

²²Ki Allah tantú mondorot kon inakó; nongonu sin dayananbí monimu in Sia? Diápa degá moguḻí in ibog monimu in moposikisa?

²³Ah, igumon mako singogku mita in paison, dá umuran toropon;

²⁴igumon mako pakangon in uatoi kon batu, sinbá monahang kino ouput in wakutu.[29]

²⁵Kinotaauanku kon soroga oyúon in mototuḷungku; kon imbuitnea mamangoi in Sia motuḷung kon inakó.

²⁶Umpaka kuḻitku pinaḻi-paḻían bo nobotak, táe kon dodai in akuoi oyúonpa in awakku,[30] indoiankubí in ki Allah.

²⁷Matakubí tontaní in poindoiku kon i-Nia, bo kon inakó Sia in mobaḻí yobayat. Nonakit totok in ginaku sin moiko in moguman,

²⁸‘Naonda in pononuntut kon inia?’ Moiko in notayak kon dodoyonan sin momia kon pelekara.

²⁹Táe, tanaa in koondokdon kon pitow! Sin ki Allah in tumorú bo mohukum kon intau binaradosa; dá kotaauandon monimu, kon oyúonbí in ki Allah inta monisig[31] kon intau.”