Read Mongondow AYUB 21 Bible Online

AYUB 21 - Mongondow bible

AYUB 21

¹Ki Ayub in notubag, “Indongogai onu in singogonku; tongábí tua in poigumonku mobaḻí poḻipoi.

³Ogoipa in akuoi mosingog, mopaḷut mako kon tua motaaudon bui in moiko moningkuḻe!

⁴Deemanbí in akuoi mobobayowan in intau, dá diábí nongonu in akuoi aka diá totok mosabar.

⁵Indoiaidon in akuoi, dá moitongaubí in moiko, moitosindogbí mako in moiko bo bibigmu in mosingkumdon.

⁶Aka raionkumai in kaadaanku naa mourot in akuoi sin moondok.

⁷Nongonu sin intau moraat inogoibí i Allah mobiag moonggot, bo kapunyaan monia in umuranbí kodugang-kodugang?

⁸Mosia in mobiag moonggot dá mokoontong kon adí bo ompu monia modapot in moitoi.

⁹Tonibuḷoi monia in moaman motompia; Ki Allah in diábí mopoangoi in bodito kon i monia.

¹⁰Bobiagon monia modugang mobayong, bo diábí mororiga in mononggadí.

¹¹Ki adí mita in intau moraat ḷumansik magí mako takin pia in gina, naonda bo domba batánea inta moḷunganga in gina.

¹²Sinakinan in singog in rebana, bansí bo kecapi, mosia in modondong moyotakin bo motayok.

¹³Singgainea mita nouput kon bonu in kopiaan, bo minatoi in mosia kon bonu in dodamean.

¹⁴Bokaka mosia in nogumandon kon i Allah, “Pokoyayúdon kon inami bo bayádon! Kami in doíbí mopandungmai bo doíbí motayak kon mangaḻe in makusud bo ibog-Mu kon kobiagan nami.”

¹⁵Irai monia, “Mogundoi kon i Allah in diábí in baragunanea, bo mosambayang kon i-Nia in diábí in mangaḻenea.

¹⁶Sin tongábí popisí in ropot naton tontaní, dá kinodapotandon in bayongan makusud bo tujuan naton?” Táe akuoi in totokbí in diá moibog kon raian bo tosingogon natua:

¹⁷Degá nokoimontandon togá in intau moraat piniongan, bo mosia in kinoantugan in bodito bo roriga? Nokoimontandon degá in ki Allah in sinumorú kon i monia, dá mosia in ihukum-Nea?

¹⁸Nokoimontandon degá in mosia naonda bo wawa bo ḷobud inta inirup in deḷang bo tompot?

¹⁹Moiko in moguman, “Adí ihukum i Allah popisí in dosa i amánea.” Táe akuoi in moguman: Intau baradosabí tuata inta musti hukumon i Allah, sinbá mosadar in mosia kon popisí in dosa monia, dá ki Allah in nopoangoi in hukuman-Nea.

²⁰Pomayádon mako inta binaradosa mobaba kon dosanea tontaní, biódon mako korasaannea tontaní in torú i Allah Inta Totok in Moḷantud.

²¹Aka intau modaitdon in wakutunea kon dunia, mopandungpa degá in sia kon motoḷuadínea in mosanang?

²²Motaau degá in intau motundú kon i Allah, bokaka ki Allah tontaní inta mohakim kon mahaḷuk kon soroga?

²³Oyúon in intau in mosehat kino ouput in kobiagannea; sia in minatoi takin puas bo pia in gina. Kopopatoinea in mopia pinongin porasaan sanang, bo awaknea in moropotpa totok.

²⁵Táe oyúon doman kopopatoinea in diá mopia, diá kon dodai in onda in nokorasa kon mopia.

²⁶Táe kon poḷoḷobongan, mosia in tumpaḷa noiuḻid; iḻibutan in uḷod bo oḷuasi.

²⁷Totuu kon kinotaauanku onu in kon raian monimu bo bayongan inta moraat inta kon gina monimu.

²⁸Iko in noḻibó, “Kon onda in baḷoi i mongongawasa inta nomia kon inta moraat?”

²⁹Diápa degá in moiko noḻibó kon intau mobayong inta moibog mayá? Diá mopirisaya degá in moiko kon habar inta pinotaau monia?

³⁰Guman monia, “Kon singgai ki Allah nopoḷabú in hukuman, intau mita moraat in posaḷamatonbí.”

³¹Diábí in mogugat kon aidnea; diábí in motuḻí kon kororaatnea.

³²Sia in dinia kon poḷoḷobongan, bo binonu kon bonu in butá poḷoḷobongan; poḷoḷobongannea in iḷukadan bo sinompia.

³³Ribu in intau minaya sinumakin nogatod kon poḷobongan kon inia; takin pia-pia mako butá nomumbun kon inia.

³⁴Dá, ḷoḻipoimu tua in diábí in mangaḻenea bo bayongan in tubagmu in uboḷbí!”