Read Mongondow AYUB 22 Bible Online

AYUB 22 - Mongondow bible

AYUB 22

¹Bo nosingogdon in ki Elipas, “Kon sigad in umat intau, diábí tobatúmai in baraguna kon i Allah. Intau inta totok in mopia in raian, tongábí baraguna kon inia tontaní.

³Degá oyúon in mangaḻenea kon i Allah aka iko mogaid kon kinoibog-Nea? Oyúon degá in untung kon i-Nia, aka kobobiagmu diá in bogitnea?

⁴Deemanbí popisí in ondokmu kon i Allah, iko in pinonapudan bo inanggap kotaḷá,

⁵táe popisíbí in nobayong totok in dosamu, bo totuu moraat in aid bo dodiamu.

⁶Aka ki utatmu bo diá mokouboḻi kon boḻinea, daitonmu agowon in bayongan in ḷambungnea.

⁷Intau inta noḷopí diá inogoianmu in inumon, inta gogoyon diá pinoki pongaananmu.

⁸Pinakému in jabatan bo kawasa sin mogamá kon butá komintan.

⁹Deemanbí tongá iko diá notuḷung kon intau boba-bobay mita, táe inta uno-unon in dinorotmu doman.

¹⁰Tuamai in kon diugmumai, tanaa in nopuḻingdon in potait, bo daḻídon in ginamu koaputan in ondok.

¹¹Singgai in modugangdon mosindip, diádon in iko mokoontong; noḷomot in iko in inuntag in dunuk inta motoyang.

¹²Ki Allah in nogutun kon ḷangit inta moḷantud totok, bo moḷongow monag kon tundi mita inta moḷantud totok doman!

¹³Táe iko in moḻibóbí, “Onubí in kotaauan-Nea? Sia in kon ḻimako in goḷom bo diábí motaau monisig kon inaton.”

¹⁴Kainimu kamai dá mata-Nea in kinooḻiunganbí in goḷom bo tongábí kon sigad in ḷangit bo butá[33] Sia in minaya-mayá?

¹⁵Degá iko in tantú doman moibog tumaḻib kon daḷan inta piniḻí in intau mita inta moraat?

¹⁶Mosia in irabut kon dodai in deemanpa wakutunea matoi, bo iniḻig in ḷunud inta namuntag.

¹⁷Mosia tuata inta mokobaḻí mogindoí kon i Inta Totok in mokawasa, bo kainia kamai diábí in Sia mokoaid kon onu bo onu kon i monia.

¹⁸Bokaka ki Allahbí in inta nopobaḻí kon i monia nooyúon! Totuu kon diábí in akuoi momangaḻe kon raian in intau moraat!

¹⁹Intau inta mopia, kumosing takin pia in gina, aka mokoontong kon intau moraat hukumon.

²⁰Bayongan in kapunyaan in intau moraat aindon norimumud nogoguyaat, bo kinaan in tuḷú in onu inta kinotaḷáanpa.

²¹Dá uḻe, Ayub, poyodamedon i TUHAN, sinbá mokouḻí in iko kon inta mopia. Aka aidanmu intua, notantú kon mokouḻíbí in iko kon kauntungan.

²²Tarimadon onu inta sinundú i TUHAN kon inimu; tagúdon intua komintan kon bonu in ginamu.

²³Pobuidon mangoi kon i TUHAN takin ompá in gina[34] koraatan kon baḷoimu in gogaiaidon.

²⁴Ḷumbúdon in buḷawanmu inta totok in nopira; pogambatdon kon gantog in ongkag inta diádon in tubig.

²⁵Pobiódon mako sinbá ki Inta Totok in mokawasa in mobaḻí buḷawanmu, bo saḷakamu inta totok in mopia.

²⁶Dá iko in motaaudon umuran mopirisaya kon i Allah, bo monotaaudon kon Sia in nobaḻí pangkoi in kopiaanmu.

²⁷Aka iko in mosambayang, Sia in motubag kon inimu, bo iko in motaaudon mogintompod kon bayongan in dandimu.

²⁸Onu in iḷongasimu in umuranbí kodapotanmu, bo inta mobayag in umuranbí monindar kon kobiaganmu.

²⁹Intau inta mokaḷakuang[35] pinoompá i TUHAN, táe inta moompá in gina in posaḷamaton.

³⁰Ki Allah in motuḷungbí kon inimu aka diá in iko kotaḷá, bo aka mogaid in iko kon inta kinoibog-Nea.”