Read Mongondow AYUB 24 Bible Online

AYUB 24 - Mongondow bible

AYUB 24

¹Nongonu sin ki Allah in diábí nonantú kon singgai pohakiman, sinbá intau mita inta nonotaau kon i-Nia in mokouḻí kon koadilan?

²Oyúon in intau in momamping kon sigad, sinbá butánea in mooḷad. Mosia in monakow kon paanan in domba, bo ḷantungon monia kon ḷantung in domba monia.

³Keledai in intau uno-unon, pinoḷagui monia; sapi in intau boba-bobay, ginamá monia nobaḻí tontagú.

⁴Mosia in mogamá kon hak in intau bogá, dá pakisadon nogadop in intau inta moyangkó.

⁵Dá, ki inta nomasiking tua in naonda bo keledai ḷoḷog inta motayak kon kaanon kon rawang bonok; tongábí kon tampat mita tatua in oyúon in kaanon kon i adínea mita.

⁶Gobá in intau ibanea[37] pakisabí aidannea; bungai in anggur in intau moraat mustibí sipunonnea.

⁷Diá in sia kodaing bo koḷambung pomatú kon awaknea aka doḷom.

⁸Sia in nobuntad in uyan morogot kon buḷud, bo dinimiug kon buḷud batu sin moniung.

⁹Intau moraat in mononggata kon adí inta uno-unondon, bo mogamá kon ki adí mointok in intau nobogá inta koboḻi kon inia.

¹⁰Intau nobogá minayá takin diá koḷambung; ginogoi in sia kon dodai in mokoyut kon gandum kon gobá.

¹¹Nongkon zaitun sia momia kon ḷana bo nongkon bungai in anggur, pomiaannea in inumon, táe sia tontaní in moyogangdon totok.

¹²Kon kotá mita kodongogandon in amui in intau inta dongkadon oḷaton, intau mita inta pinaḻían nokuani mokituḷung, táe ki Allah in diábí nokidongog kon sambayang monia; Sia in doíbí mopandungmai kon i monia.

¹³Oyúon in intau mita inta doí motarima kon bayag bo mosaturu, diábí kinotaauan monia bo doíbí dumudui kon daḷannea.

¹⁴Kon dodai in modiug mobayag ki moḷoḻimod in mobangon nongkon pinosiugannea, bo ḷumuai moḻimod kon intau inta moyangkó, bo kon dodai in diápa mobayag, sia in umado-adop naonda bo mononakow.

¹⁵Ki Mononuaḻing mogoḷat mako kon moiangoi in doḷom; inoḻingoiannea in pogot sinbá diádon kotaauan in intau in sia.

¹⁶Mononakow in noḻisik kon baḷoi kon dodai in doḷom, kon dodai in singgai sia mogadop kon bayag.

¹⁷Aka kon inia, doḷo-doḷom tua in totokbí in mokoondok, táe doḷom inta sindip totok, in mokosanangbí.”

¹⁸Bo ki Zopar in noguman,[38] “Intau moraat in noiḻig kon ḷunud moḷoben, butánea in kinutuk i Allah; gobá in anggurnea noingongowdon; diádon in intau nogaid kon tua.

¹⁹Naonda bo salju noinggamá sin kinotugatan in mata in singgai, natuata in intau binaradosa iḻiom kon bonu in dunia in intau minatoi.

²⁰Ki inánea tontaní in nokoḻiongdon kon inia, bo oḷuasi mita mongarat kon awaknea. Tangoinea in diá bidon toropon bui; sia in iyompat naonda bo pangkoi in kayu inta noumpag.

²¹Tua komintan in nobaḻí sin sia in nondorot kon intau inta dongkadon boba-bobay mita, bo nopoaid kon inta moraat kon iná inta diá kogadí kon ḷoḷaki.

²²Táe ki Allah, takin kawasa-Nea, nobuntun kon intau motorindog ki Allah in notuḷung, dá minatoi in intau moraat.

²³Inogoian i Allah in sia in kobiagan motompia, táe umuran iḷukadannea mako.

²⁴Tongá notoyong in sia in nobiag notompia, onda intua minayá in sia diádon nobuimai. Sia in noḷaḷow naonda bo bonok inta diá in baragunanea; naonda bo batoḷ in payoi inta iratab nongkon pangkoinea.

²⁵Ki ine in mokobayow kon tua mita, andeka diá mopirisaya kon totuubí in tosingogonku?”