Read Mongondow AYUB 26 Bible Online

AYUB 26 - Mongondow bible

AYUB 26

¹Táe ki Ayub in noguman, “Totuu mopia in pototuḷungmu kon inakó intau inta moyangkó bo mororigadon!

³Totuu mopia in tonggina bo topotundú tatua inta ain inogoimu kon inakó, intau inta pompuḷong!

⁴Ki ine in popoyaputanmu in singog ná tatua? Ki ine in nopotorop kon inimu mosingog natua?”

⁵Tubag i Bildad,[39] “Intau mita kon dunia in intau minatoi mourot; tubig bo inta nogutun momanseḷ.

⁶Kon tayowon i Allah, dunia in intau minatoi nobukat, diá noioḻingoi dá koontongan-Nea.

⁷Ki Allah in nobuká kon ḷangit, kon ḻimonikan in baḷangon, bo nobambé kon butá naa kon tampat inta diá in onu bo onu.

⁸Goḷom in dinatogan-Nea in tubig inta mobayong totok, táe goḷom in diábí noyabi umpaka mobogat.

⁹Binuni-Nea in pogot in buḷan tuḷud kon ḻikud in goḷom inta ain binuká-Nea.

¹⁰Ginambar-Nea in inta noḻimbung kon tayowon in baḷangon sin mopoyotondí in bayag nongkon sindip.

¹¹Aka Sia in mongguak pinongin singog modorasing, oigi mita pinotumbok kon ḷangit in mogugur.

¹²Baḷangon pinotungkud[40] pinongin kawasa-nea bo ki Rahab[41] in binongkug doman in pandoi-Nea.

¹³Tompot poginaan-Nea nonimpat kon ḷangit nodapot in notarang totok; ḻima-Nea in noḻimod kon naga inta ain moḷagui.[42]

¹⁴Táe bayongan intua tongábí nobaḻí tomponuot in kawasa-Nea; tongábí gombong inta nodapot kon bongoḷan naton. Totuubí mobabow in komomangaḻe naton kon i Allah bo kotoyang in kawasa-Nea!”