Read Mongondow AYUB 28 Bible Online

AYUB 28 - Mongondow bible

AYUB 28

¹[46] Oyúonbí in pongongaḻian kon saḷaka; oyúon in pototubáan kon buḷawan.

²Uatoi in kinaḻi nongkon bonu in butá; nongkon batu pinoḷoḷayat in bitú.

³Sindip moḷoben kinoḷopangan, tampat inta moonag totok in sinaridi. Kon tua, kon bonu in sindip, intau in motayak kon batu mita.

⁴Noiyayú kon tampat inta diá in nogutun, inta diápa kon dodai in onda in iritakan bo binayáan, intau in mogaid takin kumadai kon tontogot kon bonu in bubú inta moingongow totok.

⁵Butá mobogoi in pakéon in intau, táe kon ḻimonag in butá tatua doman, komintan sinunggai magí mako dá tombonu in butá in notungkauidon.

⁶Batu kon bonu in butá in batu nilam nobidu, bo ḷobudnea in oyúon in buḷawan taakan.

⁷Ḷagapan boniá diábí nonotaau in daḷan mopobayá intua, bo ḷagapan mokokaan kon tapú diápa kon dodai in onda in iḷumayug kon ḻimonikannea.

⁸Diápa dodai onda in singa andeka mahaḷuk moraat ibanea in nongindaḷan noingongow inta mopobayá intua.

⁹Intau in mongaḻi kon bonu in batu inta motogat totok, kinokainea in buḷud nodapot kon gantognea.

¹⁰Kon dodai in sia nomia kon bubú poḷambai kon buḷud batu, nokouḻí in sia kon permata inta totok in mopia.

¹¹Modapot kon uḷuan in ongkag mita in pinongaḻiannea,[47] bo nomukayad kon onu inta noiadop.

¹²Táe kon onda in motaau potayakan kon hikmat? Kon onda in motaau pobalajaran naton sinbá momangaḻe?

¹³Hikmat in diábí in kon sigad in intau; diábí in nonotaau kon boḻinea.

¹⁴Gantog mita in dagat bo baḷangon in moguman kon hikmat in diábí in kon inia.

¹⁵Hikmat in diábí motaau in toḻiuan umpakabí buḷawan taakan, bo umpaka doman uboḻian in saḷaka.

¹⁶Buḷawan bo permata inta totok in momahaḷ diábí mokotongkai kon boḻinea.

¹⁷Buḷawan andeka posilag moaḷus in diábí motaau poyotongkaionnea, diábí kouboḻian in buḷawan mogurang.

¹⁸Hikmat in moḷantu-ḷantud komintan in boḻinea nongkon merjan, kristal, andeka mutiara.

¹⁹Batu topas taakan bo buḷawan totokanea, kon ḻimonaganbí in boḻinea nongkon hikmat.

²⁰Kon onda degá in pangkoi in kabijaksanaan? Kon onda in kouḻían naton kon komomangaḻe?

²¹Diábí in mahaḷuk nobiag in nokoimontan nokoontong, nodapot in ḷagapan kon ḷangit diábí nokoontong.

²²Popatoi bo koyopúan in noguman doman, mosia in tongábí nokodongog kon singog mita inta diá in mangaḻenea.

²³Tongábí ki Allah in nonotaau kon tampat in hikmat, tongábí Sia in nonotaau kon daḷan mopobayá intua,

²⁴sin Sia in nokoontong kon popod mita in dunia; bayongan inta kon ḻimonag in ḷangit sinaridian-Nea mako.

²⁵Kon dodai in tompot inogoian-nea in ropot, bo sinantú-Neadon in sigad mita in baḷangon;

²⁶kon dodai in sinantú-Neadon in tampat koḷabúan in uyan, bo daḷan inta sinaḻiban in kilat bo gotup;

²⁷kon dodai intuata hikmat in inontong-Nea, sinungkuḷan-Nea in boḻinea, bo sinantú-Neadon.

²⁸Ki Allah in noguman kon intau, “Sinbá mokouḻí kon hikmat, ki Allah in musti horomaton monimu. Sinbá momangaḻe, inta moraat musti poyayúon monimu.”