Read Mongondow AYUB 29 Bible Online

AYUB 29 - Mongondow bible

AYUB 29

¹Ki Ayub in nongingguput kon tosingogonnea, kainia,

²“Igumon mako kobiaganku in moibuipa ná koḻipod, kon tungkuḷ in iḷukadan i Allah in akuoi.

³Akuoi umuran sinuḷungan-Nea, sinimbayagan-Nea kon tungkuḷ in minayá kon sindip.

⁴Tuata in singgaiku mita inta mopia, kon tungkuḷ in ki Allah noibog noyobayatku kon bonu in baḷoiku.

⁵Kon dodai intua, ki Inta mokawasa totok nodaginpa kon inakó, bo ki adíku mita in kon ḻibukumai.

⁶Bobiagonku nobogoi in susu mobarong totok. Mobayong doman in ḷana in pangkoi mita in zaitunku, umpaka pinomuḷa kon butá inta nobarong in batu.

⁷Aka guyanga mita in kotá ḻimitú moyotakin, bo mogamá in akuoi kon ḷoḻitúan kon sigad monia,

⁸simídon in intau mita inta mongobagupa, naonda in ontongondon monia in akuoi. Guyanga mita doman in simindog tumompia; sin mohoromat.

⁹Nodapot in intau mita moḷoben mogogai in mosingog,

¹⁰bo intaupa in ihoromat in diá doman mosingog.

¹¹Ki ineka yo moitongaubí in mokodongog kon soaḷ akuoi; ki ine in mokoontong kon inakó, modayow kon aidku.

¹²Sin, sinuḷunganku in intau nobogá inta mokituḷung; ná doman tua in intau mita uno-unon inta diá in mototuḷungnea.

¹³Akuoi in dinayow in intau inta totok in mosusa, sinuḷunganku in intau mita inta dongka boba-bobay dá nobiag notompia in mosia.

¹⁴Motuḻid in aidku diábí in noitaḷá; pinosindogku onu inta moadil.

¹⁵Aka kon intau bilog, akuoi in nobaḻí mata; kon intau ḻempeng, akuoi in nobaḻí sioḷnea.

¹⁶Aka kon intau nobogá, akuoi in nobaḻí ki amá; kon intau ango-angoi, akuoi in nobaḻí mododuḷu.

¹⁷Táe kawasa in intau mokotor, pinutoḷku, bo kuruban monia in pinosaḷamatku.

¹⁸Kamangku in mokouḻí kon umur moḷanggó, bo matoi pia-pia mako kon baḷoiku tontaní.

¹⁹Akuoi in naonda bo pangkoi in kayu inta nobiag noḷumbá, uakatnea tugat diá kodaitan in tubig bo oḷú momuntad kon tanganea.

²⁰Akuoi in tantú dinayow in bayongan intau, bo diá kon dodai in onda nogaat in ropotku.

²¹Intau mita kibio-biómai, aka akuoi mononggina; bayongan in singogku komintan indongogan monia kopiaan.

²²Mopaḷut mako mosingog in akuoi, diá bidon in paraḷu dugangan; tosingogon moitonop naonda bo totuyú in tubig in uyan.

²³Bayongan in intau motarima kon singogku mita takin sanang in gina, naonda bo monononggobá motarima kon uyan kon sempo in pononobur.

²⁴Nomomi in akuoi kon i monia kon dodai in mosia kinobuḻian in kamang; pogotku inta nosanang nokodugang kon ropot monia.

²⁵Akuoibí in nobaḻí itoi, bo nonantú kon bayongan in tosingogon. Diniaku in mosia naonda bo datu kon yuak in tontaranea, bo iḻipoiku in mosia kon bonu in roriga in ginanea.