Read Mongondow AYUB 3 Bible Online

AYUB 3 - Mongondow bible

AYUB 3

¹Bo nomangkoidon in ki Ayub nosingog bo nongutuk kon singgai pinononggadían kon inia, kainia,

²“O Allah, kutukdon in singgai pinononggadían kon inakó, bo doḷom kon pinomangkoian pinonogusianan i ináku kon inakó!

⁴O Allah, baḻídon in singgai tatua mosindip, popatdon intua nongkon raian-Mu sinbá diádon; dika domandon pomayá-Mu in sindar mopia monimbayag kon tua.

⁵Baḻídon in singgai tua mosindip totok, pungit totok, moḷobog bo modingungui; puḻingaidon in goḷom mita, oḻingoiaidon nongkon sindar in mata in singgai.

⁶Maníkabo doḷom tua in inggamáandon nongkon pogiapan kon taong bo buḷan; dikadon toropon bui, dika domandon kotangoian.

⁷Biódon mako in doḷom tua in mopungitdon totok diá in popiaan, diá in ḷunganga in gina.

⁸Ei intau mita inta mongongundam bo inta monompia kon Lewiatan,[6] dantugaidon in singgai tua pongin ibot bo kutukan;

⁹dika modapot in tundi pariama monindar, dika pomayá mako in sindar doḷo-doḷom monindar! Biódon mako in doḷom tua diá in mangaḻe in pogoḷatan kon koangoian in singgai bo kamang inta mobagu.

¹⁰Kinutukdon in doḷom mokobodito kon tungkuḷ in akuoi pinononggadí i ináku, bo biódon in mobaba kon roriga.

¹¹Nongonu sin akuoi in diábí minatoi kon bonu in bobuḷadían i ináku, andeka minatoi kon dodai in pinononggadí?

¹²Nongonu sin akuoi in kinokoyotanbí i ináku, poḷat pinoteténea kon teténea?

¹³Aka kuma bo kon dodai intua akuoi bo minatoidon, dá nosiugbí in akuoi bo nogogai takin pia-pia,

¹⁴naonda bo datu mita bo pongawasa tungkuḷ intua, inta noposindog bui in komaḻig dungkuḷmai.

¹⁵Akuoi in noḷoḷot naonda bo ki adí ḷoḷaki in datu, inta nosipun kon saḷaka taakan kon bonu in baḷoinea.

¹⁶Nongonu sin akuoi in diábí pinononggadí poḷat minatoi sinbá akuoi in mosiug bo moḷoḷot totok?

¹⁷Kon tua, kon bonu in poḷoḷobongan, intau moraat in diábí mogaid kon inta moraat, bo mogogaid inta kinodaitandon in ropotnea in motaau mopoguḻí in ḷopínea.

¹⁸Bo intau inta dinakop in moiḷuatdon, moiḷuatdon kon guak in moḷoḷukad mita.

¹⁹Kon tua bayongan in intau in notongkaidon: inta ponango-nangoian bo inta diá ponango-nangoian. Bo ata mita in noiḷuatdon kon imbuitnea.

²⁰Nongonu sin intau in pinomayábí mako in umuran mobiag mororiga? Nongonu sin bayag in inogoibí kon i monia inta morobonoḷ in gina?

²¹Poḷoḷobonganbí in koibo-ibog monia nongkon kapunyaan, mogoḷat kon popatoi táe diápa doman moiango-angoi.

²²Kobiagan mopia bain korasaan aka mosia in matoi bo ḷobongondon.

²³Kobiagan monia moiduduimai in inoḻiungan i Allah, mosia in iḻibu-Nea iḷukadan nongkon posibotak.

²⁴Toḻiu in mongaan akuoi in mogamui, diá mogoga-gogai in akuoi mokuani.

²⁵Bayongan inta kino ḻia-ḻiaw in ginaku, noiantug kon inakó bayongan inta kinoondokku, noitugat kon inakó.

²⁶Diá in mokosanang in kon inakó, akuoi inumaan in roriga diá moobo-obot.”